ନବରଙ୍ଗପୁର,୩/୬ : ତେନ୍ତୁଳିଖୁଣ୍ଟି ବ୍ଲକରେ କୃଷି ବିଭାଗର ବିହନ ଓ ସାର ସ୍କ୍ବାର୍ଡ଼ ଟିମ୍ ପକ୍ଷରୁ ବିଭିନ୍ନ ସାର ଓ ବିହନ ଦୋକାନ ଉପରେ ଚଢଉ କରାଯାଇଛି । ବ୍ଲକରେ ୧୦ଟି ସାର ଓ ବିହନ ଦୋକାନ ଯାଞ୍ଚ କରାଯାଇଥିଲା । ସେଥିରୁ ୫ଜଣଙ୍କୁ କାରଣ ଦର୍ଶାଅ ନୋଟିସ୍ ଜାରୀ କରାଯାଇଛି। ୩ଜଣ ବ୍ୟବସାୟୀ ଆବଶ୍ୟକ କାଗଜପତ୍ର ଦେଖାଇପାରିନଥିବାରୁ ବିହନ ବିକ୍ରି ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି । ସେହିଭଳି ବେଆଇନ ଭାବେ ୨ଜଣ ବ୍ୟବସାୟୀ ବିହନ ବିକ୍ରି ପାଇଁ ମକା ଓ ଧାନ ବିହନ ଗଚ୍ଛିତ ରଖୁଥିଲେ ।
ଦୁଇଜଣଙ୍କଠାରୁ ୧୯ଲକ୍ଷ ଟଙ୍କାର ବିହନ ଜବତ କରାଯାଇଛି । ସେମାନେ ହେଲେ ଝାନିରାଣୀ ଟେଡର୍ସର କେ.ଶ୍ରୀକାନ୍ତଙ୍କ ଦୋକାନରୁ ଶଙ୍କରଜାତୀୟ ମକା ବିହନର ୧୬ଟି ବ୍ୟାଗ ଓ ୬୨ବ୍ୟାଗ ଧାନ ଜବତ କରାଯାଇଛି । ଏହି ବିହନର ମୂଲ୍ୟ ୧୦ଲକ୍ଷ ଟଙ୍କା ହେବ । ସେହିଭଳି ଜେ.କେ ଟ୍ରେଡର୍ସ ବ୍ୟବସାୟୀ ବାବୁଲି ଜୈନଙ୍କଠାରୁ ୫୪ବ୍ୟାଗ ଶଙ୍କର କିସମର ମକା ଓ ୧୦ବ୍ୟାଗ ଧାନ ବିହନ ଜବତ କରାଯାଇଛି । ଏହି ବିହନର ମୂଲ୍ୟ ୯ଲକ୍ଷ ଟଙ୍କା ହେବ। ଏଭଳି ବିହନ ଓ ସାରର କଳାବଜାରୀ କାରବାରକୁ ବନ୍ଦ କରିବାକୁ ଅନ୍ୟ ବିହନ ଦୋକାନୀଙ୍କୁ ସ୍କ୍ବାର୍ଡ଼ ଟିମ୍ ସତର୍କ କରିଦେଇଛି। ଜିଲ୍ଲାପାଳ ଡା.ଶୁଭଙ୍କର ମହାପାତ୍ରଙ୍କ ନିର୍ଦ୍ଦେଶରେ ଜିଲ୍ଲା ମୁଖ୍ୟ କୃଷି ଅଧିକାରୀ ପ୍ରତିନିଧ ପ୍ରଣୟ କୁମାର ମନ୍ତ୍ରୀ, ଅତିରିକ୍ତ ତହସିଲଦାର ସିମାଞ୍ଚଳପାତ୍ର, କୃଷି ଜିଲ୍ଲା ଅଧିକାରୀ ଅନୀଲ କୁମାର ପ୍ରହରାଜ, ବ୍ଲକ କୃଷି ଅଧିକାରୀ ଅମିତ କୁମାର ମଲ୍ଲିକ ପ୍ରମୁଖ ଚଢଉରେ ସାମିଲ ଥିଲେ।
