ଜୟପୁର,୦୫/୧୧: ପୁଣିଥରେ ରୂପେଲି ପରଦାରେ ଦେଖିବାକୁ ମିଳିବ ବରିଷ୍ଠ କଳାକାର ଜୟନ୍ତ ସାନ୍ତ୍ରାଙ୍କ ଅଭିନୟ । ‘ଦମନ’ର ପ୍ରଯୋଜକ ଦୀପେନ୍ଦ୍ର ସାମଲଙ୍କ ‘ପରବ’ ସିନେମାରେ ତାଙ୍କୁ ଦେଖିବାକୁ ପାଇବେ ଦର୍ଶକ । ବାପା ଭୂମିକାରେ ଅଭିନୟ କରିଛନ୍ତି ଜୟନ୍ତ । ‘ପାହାଡର ଲୁହ’, ‘ଫେରିଆ’, ‘ବାଘ ବଜାରୀ’, ‘ହେ ରାମ’ ପରେ ଏହା ହେଉଛି ଜୟନ୍ତଙ୍କ ପଞ୍ଚମ ସିଲଭର ସ୍କ୍ରିନର ସିନେମା । ଆସନ୍ତା ଡିସେମ୍ବର ୨୦ରେ ଏହା ମୁକ୍ତିଲାଭ କରିବ ।
ଜୟନ୍ତ କହିଛନ୍ତି, ଓଲିଉଡର ଏକ ବ୍ୟବବହୁଳ ବଜେଟରେ ପ୍ରସ୍ତୁତ ହୋଇଛି ‘ପରବ’ । ଗଜପତି ଜିଲ୍ଲା ଏବଂ ଭୁବନେଶ୍ୱରରେ ଏହାର ସୁଟିଂ ହୋଇଛି । ଏହି ସିନେମାର ଅଭିନେତା ଦୀପାନମିତ୍ ମହାପାତ୍ରଙ୍କ ବାପା ଭୂମିକାରେ ତାଙ୍କୁ ଅଭିନୟ କରିବାର ସୁଯୋଗ ମିଳିଛି । ପ୍ରାୟ ସପ୍ତାହେ ଧରି ତାଙ୍କର ସୁଟିଂ ଚାଲିଥିଲା । ଏହି ସିନେମାରେ ବରିଷ୍ଠ ସିନେ ଅଭିନେତା ସିଦ୍ଧାନ୍ତ ମହାପାତ୍ର, ଅଭିନେତ୍ରୀ ଅନୁ ଚୌଧୁରୀ ଓ ସୂର୍ଯ୍ୟାମାୟୀ, ଜୟପ୍ରକାଶ ଦାଶ ପ୍ରମୁଖ ରହିଛନ୍ତି । ଏଠାରେ ପ୍ରସ୍ତୁତ ହୋଇଥିବା କ୍ଷୁଦ୍ର ଚଳଚ୍ଚିତ୍ର ‘ପେନସନ୍’ରେ ବୃଦ୍ଧ ବାପାର ଅଭିନୟକୁ ଦେଖିବା ପରେ ‘ପରବ’ ସିନେମା ଲାଗି ତାଙ୍କୁ ଚୟନ କରାଯାଇଥିଲା । ଅଭିନୟ ଭଲଭାବେ କରିଛନ୍ତି । ସିନେମାକୁ ଦର୍ଶକ ପସନ୍ଦ କରିବେ ବୋଲି ଆଶା କରାଯାଉଛି ।
ସୂଚନାଥାଉକି,୧୯୭୫ ମସିହାରୁ ଜୟନ୍ତ ମଞ୍ଚ ଅଭିନେତା ଭାବେ ନିଜ ପ୍ରତିଭାର ପରାକାଷ୍ଠା ଦେଖାଇ ଆସୁଛନ୍ତି । ଏ ଭିତରେ କ୍ଷୁଦ୍ର ଚଳଚ୍ଚିତ୍ର ଚଣ୍ଡାଳ, ମାଳିପୁଟ ମେଲୋଡି, ମହାନାଟକ, ମାଟି ଓ ମା, ପେନସନରେ ନିଖୁଣ ଅଭିନୟ କରି ଦର୍ଶକଙ୍କ ହୃଦୟ ଜିତିଛନ୍ତି । ୧୦୦ରୁ ଅଧିକ ମଞ୍ଚ ନାଟକରେ ଅଭିନୟ କରି ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି ।
