ନୂଆଦିଲ୍ଲୀ,୦୮/୧୧: ଏଚ୍ସିଏଲ୍ର ସହ-ପ୍ରତିଷ୍ଠାତା ଶିବ ନାଦାର ଦେଶର ସବୁଠୁ ବଡ଼ ଦାନବୀର । ଶିବ ଏବଂ ତାଙ୍କ ପରିବାର ଗତବର୍ଷ ଅର୍ଥାତ୍ ୨୦୨୩-୨୪ ଆର୍ଥିକବର୍ଷରେ ୨,୧୫୩ କୋଟି ଟଙ୍କା ଦାନ କରିଛନ୍ତି । ଅର୍ଥାତ୍ ଦୈନିକ ୫.୯୦ କୋଟି ଟଙ୍କା ଦାନ କରିଛନ୍ତି ନାଦାର ପରିବାର । ଏଡେଲ୍ଗିଭ୍ ହୁରୁନ୍ ଇଣ୍ଡିଆ ପରୋପକାରୀ ତାଲିକା-୨୦୨୪ରେ ଏହା ଉଲ୍ଲେଖ କରାଯାଇଛି । ଗୁରୁବାର ଜାରି ଏହି ତାଲିକାରେ ଶୀର୍ଷ ସ୍ଥାନରେ ଅଛନ୍ତି ନାଦାର ପରିବାର ।
ରିଲାଏନ୍ସ ଇଣ୍ଡଷ୍ଟ୍ରିଜ୍ର ଅଧ୍ୟକ୍ଷ ମୁକେଶ ଅମ୍ବାନି ଏବଂ ତାଙ୍କ ପରିବାର ଦ୍ୱିତୀୟ ସ୍ଥାନରେ ରହିଛନ୍ତି । ୨୦୨୩-୨୪ ଆର୍ଥିକବର୍ଷରେ ମୁକେଶ ଅମ୍ବାନି ଏବଂ ପରିବାର ୪୦୭ କୋଟି ଟଙ୍କା ଦାନ କରିଛନ୍ତି । ବଜାଜ ପରିବାର ୩୫୨ କୋଟି ଟଙ୍କା ଦାନ କରି ତାଲିକାରେ ତୃତୀୟ ସ୍ଥାନ ହାସଲ କରିଛନ୍ତି । ଏହା ୨୦୨୨-୨୩ ତୁଳନାରେ ୩୩% ଅଧିକ ।
ଦାନବୀର ତାଲିକାରେ ଶ୍ରେଷ୍ଠ ୧୦ ଜଣ ବ୍ୟକ୍ତି ୪,୬୨୫ କୋଟି ଟଙ୍କା ଦାନ କରିଛନ୍ତି, ଯାହା ତାଲିକାରେ ଥିବା ମୋଟ ଦାନରାଶିର ପ୍ରାୟ ୫୩% । ତାଲିକାରେ କୃଷ୍ଣା ଚିବୁକୁଲା ସପ୍ତମ ସ୍ଥାନରେ ଥିବାବେଳେ ସୁଶ୍ମିତା ଏବଂ ସୁବ୍ରତୋ ବାଗ୍ଚୀ ନବମ ସ୍ଥାନ ହାସଲ କରିଛନ୍ତି । ଟପ୍ ୧୦ରୁ ୬ ଜଣ ଦାନବୀର ନିଜର କର୍ପୋରେଟ ସାମାଜିକ ଦାୟିତ୍ୱବୋଧ(ସିଏସ୍ଆର୍) ଅଧୀନରେ ଶିକ୍ଷାରେ ଅଧିକ ଟଙ୍କା ଦାନ କରିଛନ୍ତି । ତାଲିକାରେ ଏସିଆନ୍ ପେଣ୍ଟ୍ସ ସହ ଜଡ଼ିତ ୩୫ ବର୍ଷୀୟ ବିବେକ ବକିଲ ସର୍ବକନିଷ୍ଠ ଦାନବୀର ରହିଛନ୍ତି । ସେ ୮ କୋଟି ଟଙ୍କା ଦାନ କରିଛନ୍ତି । ସେହିଭଳି ୨୦୨୩ରେ ସର୍ବକନିଷ୍ଠ ଦାନବୀର ରହିଥିବା ଜେରୋଧାର ସହ-ପ୍ରତିଷ୍ଠାତା ନିଖିଲ କାମାଥ(୩୮) ଏ ବର୍ଷ ତୃତୀୟ ସ୍ଥାନକୁ ଖସିଆସିଛନ୍ତି ।
