ଗୁରୁଗ୍ରାମ: ହରିୟାଣାର ଗୁରୁଗ୍ରାମର ସେକ୍ଟର ୫୭ରେ ଥିବା ବିଗ୍ ବସ୍ ଓଟିଟି ବିଜେତା ତଥା ଜନପ୍ରିୟ ୟୁଟ୍ୟୁବର ଏଲଭିଶ ଯାଦବଙ୍କ ବାସଭବନ ବାହାରେ ରବିବାର ସକାଳେ ଅଜଣା ଦୁର୍ବୃତ୍ତମାନେ ଗୁଳିଚାଳନା କରିଛନ୍ତି। ପୁଲିସ ସୂଚନା ଅନୁସାରେ, ଏହି ଘଟଣା ସକାଳ ୫:୩୦ରୁ ୬:୦୦ ମଧ୍ୟରେ ଘଟିଥିଲା। ଯେତେବେଳେ ତିନି ଜଣ ମୁଖାପିନ୍ଧା ବ୍ୟକ୍ତି ବାଇକରେ ଆସି ଏଲଭିଶଙ୍କ ଘର ବାହାରେ ଏକ ଡଜନରୁ ଅଧିକ ଫାଙ୍କା ଗୁଳି ଚାଳନା କରିଥିଲେ। ସୌଭାଗ୍ୟବଶତଃ, ଏହି ସମୟରେ ଏଲଭିଶ ଯାଦବ ତାଙ୍କ ଘରେ ଉପସ୍ଥିତ ନଥିଲେ।
ପୁଲିସ ଘଟଣାସ୍ଥଳରୁ ଗୁଳିର ଖୋକା ଜବତ କରିଛି ଏବଂ ତଦନ୍ତ ଆରମ୍ଭ କରିଛି। ଏହାସହ ସନ୍ଧିଗ୍ଧଙ୍କ ଯାଞ୍ଚ ପାଇଁ ସିସିଟିଭି ଫୁଟେଜ ମଧ୍ୟ ପରୀକ୍ଷା କରାଯାଉଛି। ପୁଲିସ ଅଭିଯୁକ୍ତମାନଙ୍କୁ ଚିହ୍ନଟ କରିବା ପାଇଁ ଅନୁସନ୍ଧାନ ଜାରି ରହିଛି। ଏହି ଘଟଣା ଏଲଭିଶଙ୍କ ପୂର୍ବ ବିବାଦମାନଙ୍କ ସହ ଜଡ଼ିତ କି ନାହିଁ, ତାହା ମଧ୍ୟ ତଦନ୍ତରେ ଅନୁସନ୍ଧାନ କରାଯାଉଛି। କାରଣ ପୂର୍ବରୁ ଏଲଭିଶ ଆଗ୍ରେସିଭ କଣ୍ଟେଣ୍ଟ ଓ ଅନ୍ୟ କିଛି ମାମଲାରେ ବିବାଦରେ ରହିଆସିଛନ୍ତି।
ଏଲଭିଶ ଯାଦବଙ୍କ ଟିମ୍ ଏବଂ ସେ ନିଜେ ଏହି ଘଟଣା ସମ୍ପର୍କରେ ଏପର୍ଯ୍ୟନ୍ତ କୌଣସି ବୟାନ ଜାରି କରିନାହାନ୍ତି। ଏକ୍ସରେ ଏଲଭିଶଙ୍କ ସମର୍ଥକମାନେ ଏହି ଘଟଣା ପ୍ରତି ଚିନ୍ତା ପ୍ରକାଶ କରିଛନ୍ତି ଏବଂ ତାଙ୍କ ସୁରକ୍ଷା ପାଇଁ ଦାବି କରିଛନ୍ତି।
