ବ୍ରହ୍ମଗିରି, ୧୫/୦୫: ବିଶ୍ୱପ୍ରସିଦ୍ଧ ଠାକୁର ହେଉଛନ୍ତି ଶ୍ରୀଅଲାରନାଥ । କୋଟି କୋଟି ଟଙ୍କା ଭୂସମ୍ପତ୍ତିର ମାଲିକ । ବିଭିନ୍ନ ମାର୍ଗରୁ ପ୍ରତିବର୍ଷ ଲକ୍ଷାଧିକ ଟଙ୍କା ଆୟ ହୋଇଥାଏ । ଠାକୁରଙ୍କ ପରିଚାଳନା ଦାୟିତ୍ୱ ଖୋଦ ଦେବୋତ୍ତର ବିଭାଗ ବହନ କରିଥିବା ବେଳେ ମଧ୍ୟବର୍ତ୍ତୀକାଳୀନ ଟ୍ରଷ୍ଟି ଅଛନ୍ତି ବ୍ରହ୍ମଗିରି ତହସିଲ୍ଦାର । ହେଲେ ଦୁଃଖ ଓ ପରିତାପର ବିଷୟ ଚନ୍ଦନ ଯାତ୍ରା ସମୟରେ ଠାକୁରଙ୍କ ଚଳନ୍ତି ବିଗ୍ରହ ରାମକୃଷ୍ଣ ଭଙ୍ଗା ଦଦରା ପାଲିଙ୍କିରେ ପ୍ରତ୍ୟେହ ଚନ୍ଦନ ପୁଷ୍କରିଣୀକୁ ଯାତ୍ରା କରୁଛନ୍ତି । ଛିଣ୍ଡା କନାଧଡ଼ି ଓ କତା ଦଉଡ଼ି ବନ୍ଧା ପାଲିଙ୍କିରେ ଶ୍ରୀଜିଉଙ୍କୁ ବିଜେ କରାଯାଇ ଚାପକୁ ନିଆଯାଉଛି ।
ମହାପ୍ରଭୁ ଶ୍ରୀଜଗନ୍ନାଥଙ୍କ ସଂସ୍କୃତି ଓ ପରମ୍ପରା ସହିତ ଶ୍ରୀଅଲାରନାଥଙ୍କ ରୀତିନୀତି ଜଡ଼ିତ । କାଳିଆ ଠାକୁରଙ୍କ ୧୨ ମାସରେ ୧୩ ପର୍ବ ଅନୁଷ୍ଠିତ ହେଉଥିବା ବେଳେ ଶ୍ରୀଅଲାରନାଥଙ୍କ ନିକଟରେ ଅନବସର ଯାତ୍ରା ଓ ଚନ୍ଦନ ଯାତ୍ରା ଅନ୍ୟତମ । ପରିତାପର ବିଷୟ କୋଟି କୋଟି ଟଙ୍କା ଭୂସମ୍ପତ୍ତିର ମାଲିକ ହୋଇ ମଧ୍ୟ ଠାକୁରଙ୍କ ପର୍ବ ଓ ପରମ୍ପରା ପ୍ରତି ଅଣଦେଖା କରାଯାଉଛି । ଦୀର୍ଘ ବର୍ଷ ତଳୁ ଚନ୍ଦନ ଚାପରେ ବ୍ୟବହୃତ ହେଉଥିବା ପାଲିଙ୍କି ଅବସ୍ଥା ଭଲନାହିଁ । ଏହାର ବାହାଙ୍ଗି କାଠ ପୋକରା ହୋଇଯାଇଛି । ମରାମତି କିମ୍ବା ନୂଆ ପାଲିଙ୍କି ନିର୍ମାଣ ପାଇଁ ମଧ୍ୟବର୍ତ୍ତୀକାଳୀନ ଟ୍ରଷ୍ଟି, ସେବାୟତ ନିଯୋଗ, ପରିଚାଳନା କମିଟିର ନିଘା ନାହିଁ । ଏଭଳି ଘଟଣା କୋଟି କୋଟି ଶ୍ରଦ୍ଧାଳୁଙ୍କ ଭାବାବେଗକୁ ଶକ୍ତ ଧକ୍କା ଦେଇଛି । ଶ୍ରୀଅଲାରନାଥଙ୍କ ପ୍ରତି ଏଭଳି ହତାଦରକୁ ନେଇ ଭକ୍ତଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି ।
ଏନେଇ ଅଲାରନାଥଙ୍କ ସେବାୟତ ମଧୁସୂଦନ ପଣ୍ଡା କୁହନ୍ତି, ସେବାୟତ କମିଟି ତରଫରୁ ବାରମ୍ବାର ମଧ୍ୟବର୍ତ୍ତୀକାଳୀନ ଟ୍ରଷ୍ଟି ତଥା ତହସିଲ୍ଦାରଙ୍କ ନିକଟରେ ଅଭିଯୋଗ କରାଯାଇଇଛି । ପରିଚାଳନା କମିଟି ବୈଠକରେ ମଧ୍ୟ ଆଲୋଚନା ହୋଇଛି । କିନ୍ତୁ ଏଥିପ୍ରତି ଧ୍ୟାନ ଦିଆଯାଉନି ।
