ରାଜଗାଙ୍ଗପୁର୨୪/୬: ରାଜଗାଙ୍ଗପୁର ଅଞ୍ଚଳରେ ସାପ କାମୁଡ଼ାରେ ଦୁଇ ନାବାଳିକାଙ୍କ ମୃତ୍ୟୁ ଘଟିଛି । ମୃତକ ଦୁଇ ଜଣ ହେଲେ ରାଜଗାଙ୍ଗପୁର ପୌରାଞ୍ଚଳର ରାଣୀବନ୍ଧ ଧୁବାପଡାର ଲଳିତା ସିଂ ମିଶ୍ରମ (୧୦) ଏବଂ ରାଜଗାଙ୍ଗପୁର ବ୍ଲକ ବିଜା ଖମନ ଗ୍ରାମର ସଞ୍ଜୁ ଲାକ୍ରା (୧୭)।
ପ୍ରାପ୍ତ ସୂଚନା ମୁତାବକ ଗତ ରାତ୍ରୀରେ ଲଳିତା ଘରେ ଶୋଇଥିବା ବେଳେ ଏକ ବିଷାକ୍ତ ସାପ କାମୁଡ଼ିଥିଲା । ତାଙ୍କୁ ତୁରନ୍ତ ଚିକିତ୍ସା ପାଇଁ ରାଜଗାଙ୍ଗପୁର ସିଏଚସିକୁ ଅଣାଯାଇଥିଲା। ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ରାଉରକେଲା ସ୍ଥିତ ଆରଜିଏଚକୁ ସ୍ଥାନାନ୍ତର କରାଯାଇଥିଲା। ସେଠାରେ ପହଞ୍ଚିବା ପରେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟ ଏକ ଘଟଣାରେ ଗତ ୨୦ ତାରିଖରେ ସଞ୍ଜୁ ଲାକ୍ରାଙ୍କୁ ଏକ ବିଷାକ୍ତ ସାପ କାମୁଡିଥିଲା । ତାଙ୍କୁ ରାଉରକେଲା ସ୍ଥିତ ଏକ ଘରୋଇ ଡାକ୍ତରଖାନାରେ ଚିକିତ୍ସା ଚାଲିଥିବା ବେଳେ ଆଜି ଚିକିତ୍ସାଧୀନ ଅବସ୍ଥାରେ ତାଙ୍କ ମୃତ୍ୟୁ ଘଟିଛି । ପୋଲିସ ଦୁଇଟି ଅପମୃତ୍ୟୁ ମାମଲା ରୁଜୁ କରି ଉଭୟଙ୍କର ରାଉରକେଲାରେ ଶବ ବ୍ୟବଛେଦ କରିବା ପରେ ମୃତଦେହକୁ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି।
