କଟକ, ୧୨।୧୧ : ଥାନାରେ ସେନାବାହିନୀର ଅଧିକାରୀ କିମ୍ବା କର୍ମଚାରୀମାନଙ୍କୁ ପୁଲିସ କିପରି ବ୍ୟବହାର କରିବ, ଥାନାରେ ସେମାନଙ୍କୁ କେଉଁ ପ୍ରକାରର ସେବା ମିଳିବା ଆବଶ୍ୟକ ସେ ନେଇ ରାଜ୍ୟ ସରକାର ଏସଓପି ଜାରି କରିଛନ୍ତି। ମଙ୍ଗଳବାର ଭରତପୁର ଥାନା ବିବାଦ ମାମଲାର ଶୁଣାଣି ବେଳେ ହାଇକୋର୍ଟଙ୍କୁ ଏ ବାବଦରେ ଅବଗତ କରାଇଛନ୍ତି ଆଡ଼ଭୋକେଟ ଜେନେରାଲ। ତେବେ ଉକ୍ତ ଏସଓପିର ନକଲ ଆମିକଶ କ୍ୟୁରୀଙ୍କୁ ଦେବା ସହିତ ହାଇକୋର୍ଟରେ ମଧ୍ୟ ଦାଖଲ କରିବା ଲାଗି ନିର୍ଦେଶ ଦିଆଯାଇଛି।
ଆଜି ମାମଲାର ଶୁଣାଣି ସମୟରେ ଏଡିଜି ଆଧୁନିକୀକରଣ ଉପସ୍ଥିତ ରହି ନିଜର ପକ୍ଷ ରଖିଛନ୍ତି। ରାଜ୍ୟରେ ଥିବା ୯୬ ପ୍ରତିଶତ ଥାନାରେ ସିସିଟିଭି ଲାଗି ସାରିଛି। ନଭେମ୍ବର ସୁଦ୍ଧା ଅବଶିଷ୍ଟ କାମ ଶେଷ ହେବ ବୋଲି ଏଡିଜି କୋର୍ଟଙ୍କୁ ଜଣାଇଛନ୍ତି। ତେବେ ସିସିଟିଭି ଇନଷ୍ଟଲେସନ କାର୍ଯ୍ୟ ମାର୍ଚ୍ଚ ସୁଦ୍ଧା ସାରିବାଲାଗି ଆଜି ପୋଲିସ ବିଭାଗକୁ ନିର୍ଦେଶ ଦେଇଛନ୍ତି ହାଇକୋର୍ଟ। ଅନ୍ୟପଟେ ଭରତପୁର ଥାନା ବିବାଦ ମାମଲାକୁ ନେଇ ତଦନ୍ତ ଜାରି ରହିଛି। ଏବଂ ଏହାର ନ୍ୟାୟିକ ତଦନ୍ତ ପ୍ରକ୍ରିୟାର ଅଗ୍ରଗତି ସମ୍ପର୍କରେ ଆଡ଼ଭୋକେଟ ଜେନେରାଲ ଆଜି ହାଇକୋର୍ଟଙ୍କୁ ଅବଗତ କରାଇଛନ୍ତି। ଆସନ୍ତା ମଙ୍ଗଳବାର ମାମଲାର ପରବର୍ତ୍ତୀ ଶୁଣାଣି ପାଇଁ ଆଜି ଦିନ ଧାର୍ଯ୍ୟ କରୁଛନ୍ତି ହାଇକୋର୍ଟ।
