ଦୁବାଇ,୨୨/୦୮: ଆଗାମୀ ଆଇସିସି ଦିନିକିଆ ବିଶ୍ୱକପ୍ ପାଇଁ କାଉଣ୍ଟ ଡାଉନ୍ ଆରମ୍ଭ ହୋଇଯାଇଛି । ୨୦୨୭ ସଂସ୍କରଣକୁ ଦକ୍ଷିଣ ଆଫ୍ରିକା, ଜିମ୍ବାୱେ ଓ ନାମିବିୟା ମିଳିତ ଭାବେ ଆୟୋଜନ କରିବେ । ଇତି ମଧ୍ୟରେ ଆୟୋଜକ ଦେଶମାନଙ୍କ ମଧ୍ୟରେ ମ୍ୟାଚ୍ ଭାଗ କରାଯାଇଛି । ଦକ୍ଷିଣ ଆଫ୍ରିକା ମୋଟ୍ ୪୪ଟି ମ୍ୟାଚ, ଜିମ୍ବାୱେ ଓ ନାମିବିୟା ବାକି ୧୦ଟି ମ୍ୟାଚ୍ ଆୟୋଜନ କରିବେ । ଆଇସିସି ପକ୍ଷରୁ ମ୍ୟାଚ୍ ଓ ଭେନ୍ୟୁ ବିଷୟରେ କୌଣସି ଘୋଷଣା କରାଯାଇ ନାହିଁ । ଦକ୍ଷିଣ ଆଫ୍ରିକା କ୍ରିକେଟ୍ ବୋର୍ଡ ପକ୍ଷରୁ ଏକ ଘରୋଇ ଆୟୋଜନ କମିଟି ଗଠନ କରାଯାଇ ମ୍ୟାଚ୍ ଭେନ୍ୟୁ ବିଷୟରେ ଘୋଷଣା କରାଯାଇଛି । ଦକ୍ଷିଣ ଆଫ୍ରିକାର ପୂର୍ବତନ ଅର୍ଥମନ୍ତ୍ରୀ ଟ୍ରେଭର ମାନୁଏଲଙ୍କୁ ଉକ୍ତ କମିଟିର ଅଧ୍ୟକ୍ଷ ନିଯୁକ୍ତ କରାଯାଇଛି ।
ସୂଚନାଯୋଗ୍ୟ, ଆଗାମୀ ଦିନିକିଆ ବିଶ୍ୱକପ୍ରେ ୧୪ଟି ଦେଶ ଭାଗ ନେବେ ଓ ମୋଟ୍ ୫୪ଟି ମ୍ୟାଚ୍ ଖେଳାଯିବ । ଦକ୍ଷିଣ ଆଫ୍ରିକା ଆୟୋଜନ କରୁଥିବା ୪୪ଟି ମ୍ୟାଚ୍ ପାଇଁ ମୋଟ୍ ୮ଟି ଭେନ୍ୟୁ ଯଥା: ଜୋହାନେସବର୍ଗ, ପ୍ରିଟୋରିୟା, କେପ ଟାଉନ, ଡର୍ବାନ, ବ୍ଲୋଏମ୍ଫଟନ, ଇଷ୍ଟ ଲଣ୍ଡନ, ପାର୍ଲ ଓ ଗେବର୍ହା ଚୂଡ଼ାନ୍ତ କରାଯାଇଛି । ଦକ୍ଷିଣ ଆଫ୍ରିକା ପୂର୍ବରୁ ଜିମ୍ବାୱେ ଓ କେନିଆ ସହ ମିଶି ୨୦୦୩ ଦିନିକିଆ ବିଶ୍ୱକପ୍ ଆୟୋଜନ କରିଥିଲା । ଏଥିସହ ୨୦୦୭ରେ ଟି-ଟ୍ୱେଣ୍ଟି ବିଶ୍ୱକପ୍, ୨୦୦୯ରେ ଚାମ୍ପିଅନ୍ସ ଟ୍ରଫି, ୨୦୦୫ରେ ମହିଳା ଦିନିକିଆ ବିଶ୍ୱକପ ଓ ୨୦୨୩ରେ ମହିଳା ଟି-ଟ୍ୱେଣ୍ଟି ବିଶ୍ୱକପ୍କୁ ଏକକ ଭାବେ ଆୟୋଜନ କରିଥିଲା ।
