ନୂଆଦିଲ୍ଲୀ,୩।୫ : ପହଲଗାମ୍ ଆତଙ୍କବାଦୀ ଆକ୍ରମଣ ପ୍ରତିଟି ଭାରତୀୟଙ୍କୁ ଶୋକରେ ବୁଡାଇଛି। ପାକିସ୍ତାନକୁ ଏହାର କଡା ଜବାବ୍ ଦେବାକୁ ଦେଶବାସୀ କରିଛନ୍ତି ଦାବି। ଏପରିକି କେନ୍ଦ୍ର ସରକାର ମଧ୍ୟ ନେଇଛନ୍ତି ବଡ଼ ପଦକ୍ଷେପ। ଆକ୍ରମଣକାରୀଙ୍କୁ ଖୋଜିବା ଜାରି ରହିଛି। ତେବେ ଏହା ଭିତରେ ସୂଚନା ମିଳିଛି ଯେ, ପହଲଗାମ୍ ଆତଙ୍କୀ ହମଲାର ୬ ସନ୍ଦିଗ୍ଧ ଏବେ ଶ୍ରୀଲଙ୍କା ଚାଲିଯାଇଛି। ଶନିବାର ଚେନ୍ନାଇରୁ କଲୋମ୍ବୋ ପହଁଞ୍ଚିଥିବା ବିମାନରେ ସେ ଥିବାର ଆଶଙ୍କା କରାଯାଉଛି।
ଶ୍ରୀଲଙ୍କାନ୍ ଏୟାରଲାଇନ୍ସର କହିବା ଅନୁସାରେ, ଗୋଟିଏ ବିମାନ ଚେନ୍ନାଇରୁ କଲୋମ୍ବୋର ବନ୍ଦରନାୟକେ ଅନ୍ତର୍ଜାତୀୟ ବିମାନ ବନ୍ଦରରେ ୧୧ଟା ୫୯ ମିନିଟରେ ପହଁଞ୍ଚିଥିଲା। ବିମାନ ଆସିବା ମାତ୍ରେ ବଡ଼ ଧରଣର ଯାଞ୍ଚ କରାଯାଇଥିଲା। ରିପୋର୍ଟରେ କୁହାଯାଇଥିଲା, ପହଲଗାମ୍ ଆକ୍ରମଣର ସନ୍ଦିଗ୍ଧ ବିମାନରେ ଥିବାର ଖବର ପରେ ବଡ଼ ଧରଣର ତଲାସୀ ଅଭିଯାନ ଚାଲିଥିଲା।
ଚେନ୍ନାଇ ଏରିଆ କନଟ୍ରୋଲ ସେଣ୍ଟରକୁ ଆର୍ଲଟ କରାଯାଇଥିଲା। ଏହାର ତୁରନ୍ତ ପରେ ଲୋକାଲ ଅଥରିଟି ସହ ମିଶି ସର୍ଚ୍ଚ ଅପରେସନ୍ ଚଳାଯାଇଥିଲା। ସୂଚନା ମିଳିଥିଲା ଯେ,୬ ଜଣ ସନ୍ଦିଗ୍ଧ, ଯିଏକି ଭାରତରେ ଓ୍ବାଣ୍ଟେଡ୍, ସେ ବିମାନରେ ଯାତ୍ରା କରୁଛନ୍ତି। ଏହାପରେ ବିମାନକୁ ଭଲ ଭାବରେ ଚେକିଂ କରାଯାଇଥିଲା। ଏହାପରେ ବିମାନକୁ ଉଡାଣ ପାଇଁ କ୍ଲିୟରାନ୍ସ ମିଳିଥିଲା। ଏଥିରେ କୁହାଯାଇଥିଲା, ଶ୍ରୀଲଙ୍କା ଏୟାରଲାଇନ୍ସର ସବୁ ଯାତ୍ରୀ ଓ କ୍ରୁ ମେମ୍ବରଙ୍କ ସୁରକ୍ଷାକୁ ପ୍ରାଧାନ୍ୟ ଦିଏ। ଉଚ୍ଚତମ ସୁରକ୍ଷାମାନକକୁ ବଜାୟ ରଖିବା ପାଇଁ ଆମେ ପ୍ରତିଶୃତିବଦ୍ଧ।
ଜମ୍ମୁ-କାଶ୍ମୀରର ପହଲଗାମରେ ଏପ୍ରିଲ ୨୨ ତାରିଖରେ ହୋଇଥିବା ଆତଙ୍କବାଦୀ ଆକ୍ରମଣରେ ସମ୍ପୃକ୍ତ ଆତଙ୍କବାଦୀଙ୍କୁ ଚିହ୍ନଟ କରିଛନ୍ତି ଭାରତୀୟ ସୁରକ୍ଷା ଏଜେନ୍ସି। ଏହି ଆକ୍ରମଣରେ ୨୬ ଜଣ ପ୍ରାଣ ହରାଇଥିଲେ, ସେମାନଙ୍କ ମଧ୍ୟରୁ ଅଧିକାଂଶ ପର୍ଯ୍ୟଟକ ଥିଲେ। ପୀଡିତ ଏବଂ ତଦନ୍ତକାରୀ ସଂସ୍ଥାଙ୍କ ଅନୁଯାୟୀ, ଏହି ଆକ୍ରମଣରେ ୪ ରୁ ୬ ଜଣ ଆତଙ୍କବାଦୀ ସାମିଲ ଥିଲେ। ଆକ୍ରମଣରେ ସମ୍ପୃକ୍ତ ପ୍ରାୟ ସମସ୍ତଙ୍କୁ ଚିହ୍ନଟ କରାଯାଇଛି। ତିନି ଜଣ ଆତଙ୍କବାଦୀଙ୍କ ସ୍କେଚ୍ ମଧ୍ୟ ଜାରି କରାଯାଇଛି। ଯାହାର ନାମ ଆସିଫ, ଫୌଜି, ସୁଲେମାନ ଶାହା ଏବଂ ଅବୁ ତାଲହା |ସେଭଳି ଦୁଇଜଣ ସ୍ଥାନୀୟ ଆତଙ୍କବାଦୀ ଆଦିଲ ହୁସେନ ଠୋକର ଏବଂ ଆସିଫ ଶେଖଙ୍କୁ ଚିହ୍ନଟ କରାଯାଇଛି।
