ନୂଆଦିଲ୍ଲୀ,୨୬/୦୮: ବିଶ୍ବ ଅର୍ଥନୀତିରେ ଟ୍ରମ୍ପ ଝଡ଼ । ଆମେରିକା ରାଷ୍ଟ୍ରପତିଙ୍କ ନୂତନ ଶୁଳ୍କ ନିଷ୍ପତ୍ତି ପରେ ସେୟାର ବଜ଼ାରରେ କମ୍ପନ । ଟ୍ରମ୍ପ୍ ପ୍ରଶାସନ ପୂର୍ବରୁ ଭାରତ ଉପରେ ୨୫% ଶୁଳ୍କ ଲାଗୁ କରିଥିଲେ। ଭାରତ ରୁଷିଆରୁ ତେଲ କିଣୁ ଥିବାରୁ ଏବେ ଟ୍ରମ୍ପ୍ ପ୍ରଶାସନ ପକ୍ଷରୁ ଅତିରିକ୍ତ ୨୫% ଟିକସ ଲାଗୁ କରାଯାଇଛି। ଯାହା ଅଗଷ୍ଟ ୨୭ରୁ ଅର୍ଥାତ୍ ଆସନ୍ତାକାଲିଠାରୁ କାର୍ଯ୍ୟକାରୀ ହେବାକୁଥିବା ଏହି ନିଷ୍ପତ୍ତି ଦ୍ବାରା ଭାରତକୁ ମୋଟ୍ ୫୦% ଶୁଳ୍କ ଦେବାକୁ ପଡିବ। ପ୍ରଭାବରେ ମଙ୍ଗଳବାର ଷ୍ଟକ୍ ବଜାର ଏକ ବଡ଼ ହ୍ରାସ ଦେଖାଦେଇଛି ।
କାରବାରର ପ୍ରଥମ ଦିନରେ ନିବେଶକମାନଙ୍କୁ ଏକ ଝଟକା ଲାଗିଛି। ଷ୍ଟକ୍ ମାର୍କେଟ ଖୋଲିବା ମାତ୍ରେ କ୍ରାସ୍ ହୋଇ ଯାଇଛି। ବମ୍ବେ ଷ୍ଟକ୍ ଏକ୍ସଚେଞ୍ଜ୍ ବା ବିଏସଇର ୩୦ ସେୟାର ବିଶିଷ୍ଟ ସେନସେକ୍ସ ୮୧,୩୭୭.୯୧ରେ ଖୋଲିଥିଲା । ଏହା ପୂର୍ବରୁ ୮୧,୬୩୫.୯୧ ଅଙ୍କରେ ବନ୍ଦ ହୋଇଥିଲା । ଯାହା ଆରମ୍ଭରୁ ବଡ ହ୍ରାସ ବୋଲି କୁହାଯାଉଛି । ସେହିପରି ମଙ୍ଗଳବାରର କାରବାରରେ ସେନସେକ୍ସ ସହିତ ନିଫ୍ଟିରେ ମଧ୍ୟ ଏକ ବଡ଼ ହ୍ରାସ ଦେଖିବାକୁ ମିଳିଛି। ସେନସେକ୍ସ ୬୦୦ ପଏଣ୍ଟରୁ ଅଧିକ ହ୍ରାସ ପାଇଛି । ଅପରପକ୍ଷରେ ନିଫ୍ଟି ୫୦, ୨୪,୮୦୦ ସ୍ତର ତଳକୁ ଖସିଛି। ମିଡକ୍ୟାପ୍ ଏବଂ ସ୍ମଲକ୍ୟାପ୍ ଷ୍ଟକରେ ସବୁଠାରୁ ବଡ଼ ହ୍ରାସ ଦେଖାଯାଇଛି। ଏହା ସହିତ ମେଟାଲ, ରିଅଲ୍ଟି ଏବଂ ବ୍ୟାଙ୍କିଙ୍ଗ୍ ଷ୍ଟକରେ ମଧ୍ୟ ବଡ଼ ବିକ୍ରୟ ହୋଇଛି। ସରକାରଙ୍କଠାରୁ ରିଲିଫ୍ ପ୍ୟାକେଜ୍ ନ ମିଳିବା ଖବର ପରେ,ଭୋଡାଫୋନ୍ ଆଇଡିଆ ସେୟାର ମଧ୍ୟ ପ୍ରାୟ ୯ ପ୍ରତିଶତ ହ୍ରାସ ପାଇଛି।
ବ୍ରୋକରେଜ୍ ଫାର୍ମଗୁଡ଼ିକର ମତରେ, ଆମେରିକାର ଶୁଳ୍କର ସବୁଠାରୁ ବଡ଼ ପ୍ରଭାବ କପଡ଼ା,ଇଞ୍ଜିନିୟରିଂ ସାମଗ୍ରୀ,ଚମଡା ଏବଂ ରାସାୟନିକ ପଦାର୍ଥ ଭଳି କମ୍ପାନୀଗୁଡ଼ିକ ଉପରେ ପଡ଼ିପାରେ। ଯାହାର ଆମେରିକା ବଜାରରେ ଏକ ବଡ଼ ଅଂଶ ରହିଛି। ବିଶେଷଜ୍ଞମାନେ କହିଛନ୍ତି ଯେ, ଯଦି ବିକଳ୍ପ ବଜାର ଖୋଜିବା ଏବଂ ଘରୋଇ ବ୍ୟବହାରକୁ ପ୍ରୋତ୍ସାହିତ କରିବା ପାଇଁ ଶୀଘ୍ର ଦୃଢ଼ ପଦକ୍ଷେପ ନିଆ ନ ଯାଏ, ତେବେ ଏହାର ପ୍ରଭାବ ଆଗାମୀ ତ୍ରୈମାସିକରେ କର୍ପୋରେଟ୍ ଆୟ ଏବଂ ବଜାର ଗତିବିଧି ଉପରେ ଅଧିକ ଗଭୀର ହୋଇପାରେ।ଅନ୍ୟପକ୍ଷରେ, ୱାଶିଂଟନ୍ ଭାରତ ଉପରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲାଗୁ କରିବା ପାଇଁ ଏକ ବିଜ୍ଞପ୍ତି ଜାରି କରିଛି। ଏହା ପରେ, ବୁଧବାରଠାରୁ ଭାରତୀୟ ସାମଗ୍ରୀର ରପ୍ତାନି ଉପରେ ଶୁଳ୍କ ହାର ଦୁଇଗୁଣ ବୃଦ୍ଧି ପାଇ ୫୦ ପ୍ରତିଶତ ହୋଇଯିବ। ୟୁକ୍ରେନ ଯୁଦ୍ଧ ସମୟରେ ରୁଷରୁ ତେଲ କିଣିବା କାରଣରୁ ଆମେରିକା ଭାରତ ବିରୁଦ୍ଧରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଟ୍ରମ୍ପଙ୍କ ନିଷ୍ପତ୍ତି ଏବଂ ଭାରତ ଉପରେ ୫୦ ପ୍ରତିଶତ ଶୁଳ୍କ ଲାଗୁ ହେବା ଦ୍ୱାରା ନୂଆଦିଲ୍ଲୀର ଆମେରିକାକୁ ପ୍ରାୟ ୮୬.୫ ବିଲିୟନ ଡଲାରର ବାଣିଜ୍ୟିକ ରପ୍ତାନି ଉପରେ ସିଧାସଳଖ ପ୍ରଭାବ ପଡ଼ିବ।
