ବଡବିଲ, ୨୩।୧ : ଚମ୍ପୁଆରୁ ମଙ୍ଗଳବାର ବିଳମ୍ବିତ ରାତିରେ ଚୋରି ହୋଇଥିବା ଏକ ଇକୋ ଭ୍ୟାନକୁ ଝାଡ଼ଖଣ୍ଡ ଚାଇଁବାସାରୁ ପୋଲିସ୍ ଜବତ କରିଛି। ଗାଡ଼ି ଭିତରୁ ଅନେକ ଗୁଡ଼ିଏ ମଦ ପେଟି ମିଳିଛି । ଘଟଣାରେ ସଂପୃକ୍ତ ଅଭିଯୁକ୍ତମାନେ ଫେରାର ହୋଇଯାଇଛନ୍ତି ।
ଚମ୍ପୁଆର ଏମ୍ ଡି ଖୁରସିଦଙ୍କ ଇକୋ ଭ୍ୟାନଟି ସବୁଦିନ ପରି ଘର ସମ୍ମୁଖରେ ମଙ୍ଗଳବାର ରାତିରେ ରଖାଯାଇଥିଲା। ବିଳମ୍ବିତ ରାତିରେ ଦୁବୃର୍ତ୍ତମାନେ ଘର ସମ୍ମୁଖରୁ ଗାଡ଼ିଟି ଚୋରି କରି ନେଇ ଫେରାର ହୋଇଯାଇଥିଲେ । ଏନେଇ ଗାଡ଼ି ମାଲିକ ଚମ୍ପୁଆ ଥାନାରେ ଅଭିଯୋଗ କରିଥିଲେ। ଚମ୍ପୁଆ ପୋଲିସ୍ ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରି ତଦନ୍ତ ଆରମ୍ଭ କରିଥିଲା । ତଦନ୍ତରୁ ଜଣାପଡ଼ିଥିଲା ଯେ, ଗୋଧୂଳି ରାସ୍ତା ଦେଇ ଗାଡିଟି ଝାଡ଼ଖଣ୍ଡ ଯାଇଛି। ଯିବାବେଳେ ଝାଡ଼ଖଣ୍ଡ ସୀମାରେ ଥିବା ଦେଓଗାଁ ସରକାରୀ ମଦ ଦୋକାନର ସଟର ଭାଙ୍ଗି ମଦ ଲୁଟ କରି ଗାଡ଼ିରେ ନେଇ ଦୁବୃର୍ତ୍ତ ଫେରାର ହୋଇଯାଇଥିଲେ । ଗାଡିରୁ ତେଲ ସରିଯିବା ଫଳରେ ଦୁବୃର୍ତ୍ତମାନେ ଗାଡ଼ିକୁ ଚାଇଁବାସା ନିକଟରେ ଛାଡ଼ି ଫେରାର ହୋଇଯାଇଥିଲେ। ତେବେ ପୋଲିସ୍ ସେମାନଙ୍କୁ ଅନୁସରଣ କରି ଚାଇଁବାସା ନିକଟରେ ଗାଡ଼ିକୁ ଜବତ କରିଥିଲା । ତେବେ ଅଭିଯୁକ୍ତମାନଙ୍କୁ ଧରିବା ପାଇଁ ପୋଲିସ ତଦନ୍ତ ଜୋରଦାର କରିଛି।
