ନୂଆଦିଲ୍ଲୀ: ଗୁଜରାଟର ସୁରଟରେ ଜଣେ ବିଜେପି ନେତ୍ରୀଙ୍କ ଆତ୍ମହତ୍ୟା ଖବର ଚର୍ଚ୍ଚାର ପ୍ରସଙ୍ଗ ପାଲଟିଛି । ସୁରଟର ଓ୍ବାର୍ଡ ୩୦ରେ ମହିଳା ମୋର୍ଚ୍ଚା ସଭାପତି ଦୀପିକା ପଟେଲ ଫ୍ୟାନ୍ରେ ରଶି ଲଗାଇ ଆତ୍ମହତ୍ୟା କରିଥିବା ‘ହିନ୍ଦୁସ୍ତାନ ଟାଇମ୍ସ’ରେ ରିପୋର୍ଟ ପ୍ରକାଶ ପାଇଛି । ଗତକାଲି (ରବିବାର) ଅପରାହ୍ଣ ୨ଟା ସମୟରେ ଭିମରାଡସ୍ଥିତ ନିଜ ଘରେ ମହିଳା ନେତ୍ରୀ ଜୀବନ ହାରିଛନ୍ତି । ଏନେଇ ଡିସିପି ବିଜୟ ସିଂହ ଗୁର୍ଜାର ସୂଚନା ଦଇେଛନ୍ତି ।
ପୋଷ୍ଟମର୍ଟମ ରିପୋର୍ଟ ଅନୁସାରେ, ଦୀପିକା ବେକରେ ରଶି ଲଗାଇ ଆତ୍ମହତ୍ୟା କରିଛନ୍ତି । ଆତ୍ମହତ୍ୟା ପଛର କାରଣ ସଂପର୍କରେ ଡିସିପି କହିଛନ୍ତି ଯେ, ଦୀପିକା ଓ୍ବାର୍ଡ ୩୦ର କର୍ପୋରେଟର ଚିରାଗ ସୋଲଙ୍କିଙ୍କୁ ଭାଇ ଭଳି ସ୍ନେହ କରୁଥିଲେ । ଆତ୍ମହତ୍ୟା କରିବା ପୂର୍ବରୁ ଦୀପିକା, ସୋଲଙ୍କିକୁ ଫୋନ୍ କରି ଚାପରେ ଅଛନ୍ତି ବୋଲି କହିବା ସହ ଜୀବନ ହାରିବାକୁ ଚାହୁଁଥିବା କହିଥିଲେ । ଏହା ଶୁଣିବା ପରେ ସୋଲଙ୍କି ବିଜେପି ନେତ୍ରୀଙ୍କ ଘରେ ପହଞ୍ଚିଥିଲେ ।
ଦୀପିକାଙ୍କ ପାଖରୁ କୌଣସି ଉତ୍ତର ନପାଇବାରୁ କର୍ପୋରେଟର ତାଙ୍କ ବେଡରୁମ୍ର କବାଟ ଭାଙ୍ଗି ଭିତରକୁ ପଶିଥିଲେ । ଦୀପିକା ଫ୍ୟାନରେ ରଶି ଲଗାଇ ଝୁଲି ପଡ଼ିଥିବା ସେ ଦେଖିଥିଲେ ବୋଲି ଡିସିପି କହିଛନ୍ତି । ସେପଟେ ସୋଲଙ୍କି ବିଜେପି ନେତ୍ରୀଙ୍କ ଘରେ ପହଞ୍ଚିବା ବେଳକୁ ତାଙ୍କ ପତି ସେଠାରେ ନଥିଲେ । ଦୀପିକାଙ୍କ ପିଲାମାନେ ଘରେ ଥିଲେ । ସୋଲଙ୍କି ସାଙ୍ଗେସାଙ୍ଗେ ଦୀପିକା ପଟେଲଙ୍କୁ ପାଖରେ ଥିବା ଏକ ଘରୋଇ ହସ୍ପିଟାଲକୁ ନେଇଯାଇଥିଲେ । କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଖବର ଅନୁସାରେ, ଦୀପିକାଙ୍କ ପତି ଜଣେ ଚାଷୀ ହୋଇଥିବା ବେଳେ ତାଙ୍କର ୩ ଜଣ ପିଲା ଅଛନ୍ତି । ପିଲାମାନଙ୍କ ବୟସ ଯଥାକ୍ରମେ ୧୩, ୧୪ ଏବଂ ୧୬ ବର୍ଷ । ତେବେ ଦୀପିକାଙ୍କ ଆତ୍ମହତ୍ୟା ଲାଗି ପରିବାର ଲୋକେ କୌଣସି ବ୍ୟକ୍ତିଙ୍କୁ ଦାୟୀ କରିନାହାନ୍ତି । ପୋଲିସ ବିଜେପି ନେତ୍ରୀଙ୍କ ଫୋନ୍ ଡାଟାକୁ ଏକାଠି କରି ଆତ୍ମହତ୍ୟାର କାରଣ ଖୋଜୁଛି ବୋଲି ଡିସିପି ବିଜୟ ସିଂହ କହିଛନ୍ତି ।।
