ଚନ୍ଦ୍ରଶେଖରପୁର,୦୮/୧୧: ମେଧାବୀ ଛାତ୍ରୀଜଣକ ଯୁକ୍ତ ଦୁଇ (ବିଜ୍ଞାନ)ରେ ପଢୁଥିଲେ । ତା’ ସହ ନିଟ୍ ପାଇଁ କୋଚିଂ ନେଉଥିଲେ । ହେଲେ କୋଚିଂ ସେଣ୍ଟରର ମାତ୍ରାଧିକ ପାଠପଢ଼ା ଚାପ ସହିପାରିଲେନି । ଶେଷରେ ଚରମ ନିଷ୍ପତ୍ତି ନେଲେ । ହଷ୍ଟେଲ ରୁମ ଫ୍ୟାନରେ ଝୁଲି ପଡ଼ିଲେ । ପଟିଆର ଏକ ଘରୋଇ କୋଚିଂ ସେଣ୍ଟର ହଷ୍ଟେଲରେ ଏମିତି ଅଭାବନୀୟ ଘଟଣା ଘଟିଛି । ମୃତକ ଜଣକ ହେଲେ ୧୭ ବର୍ଷୀୟ କଲ୍ୟାଣୀ ସାହୁ । ଘର କଟକ ଜିଲ୍ଲା ଜଗତପୁର ଥାନା ସିଙ୍ଗାମାପୁର ଗାଁରେ । ଚନ୍ଦ୍ରଶେଖରପୁର ଥାନା ପୁଲିସ ମୃତଦେହକୁ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି । ବ୍ୟବଚ୍ଛେଦ ରିପୋର୍ଟରୁ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ପୁଲିସ କହିଛି । ପାଠପଢ଼ା ଚାପ ସହିନପାରି ଝିଅ ଆତ୍ମହତ୍ୟା କରିଥିବା ପରିବାର ଲୋକ ଅଭିଯୋଗ ଆଣିଛନ୍ତି ।
୩ ମାସ ତଳେ ସମାନ କୋଚିଂ ସେଣ୍ଟରର ଜଣେ ଅଣଓଡି଼ଆ ଛାତ୍ର ଜୀବନ ହାରିଥିଲେ । ଚଳିତବର୍ଷ ରାଜଧାନୀରେ ଛାତ୍ରଛାତ୍ରୀଙ୍କ ଆତ୍ମହତ୍ୟା ଉଦ୍ବେଗଜନକ ଭାବେ ବଢ଼ିଚାଲିଛି । ପାଖାପାଖି ଡଜନେରୁ ଅଧିକ ଛାତ୍ରଛାତ୍ରୀ ଆତ୍ମହତ୍ୟା କଲେଣି । ସେଥିରୁ ଅଧିକାଂଶ ପାଠପଢ଼ା ଚାପ ସହିନପାରି ଚରମ ନିଷ୍ପତ୍ତି ନେଉଛନ୍ତି । ମୃତକଙ୍କ ବାପା ମହିମା ମହେଶ ସାହୁ କହିଛନ୍ତି, ଜେଇଇ କୋଚିଂ ପାଇଁ କିଛି ମାସ ପୂର୍ବରୁ ଝିଅକୁ ଉକ୍ତ କୋଚିଂ ସେଣ୍ଟରରେ ନାମ ଲେଖାଇଥିଲୁ । ହଷ୍ଟେଲରେ ରହିବା ସହ କୋଚିଂ ନେଉଥିଲା । ଗତ ପରୀକ୍ଷାରେ ଫିଜିକ୍ସରେ କିଛି ମାର୍କ କମି ଯାଇଥିବାରୁ ସେ ଚିନ୍ତାରେ ରହୁଥିଲା । ଫିଜିକ୍ସ କଷ୍ଟ ଲାଗୁଛି ବୋଲି ଆମକୁ ଜଣାଇଥିଲା । ପାଠପଢ଼ାକୁ ନେଇ ଅଧିକ ଚାପ ନ ନେବାକୁ ତାକୁ ଆମେ ବୁଝାଇଥିଲୁ । ଆଜି କୋଚିଂ ସେଣ୍ଟରରେ ଫିଜିକ୍ସ ପରୀକ୍ଷା ଥିବା ନେଇ ଗତକାଲି ରାତିରେ ଆମକୁ ଫୋନ୍ରେ କହିଥିଲା । ଭଲ ମାର୍କ ପାଇଁ କୋଚିଂ ସେଣ୍ଟରରେ ଚାପ ପକାଉଥିବା କହି କାନ୍ଦିଥିଲା ବି ।
ଗୁରୁବାର ସକାଳୁ ଝିଅ ଦୀର୍ଘ ସମୟ ଯାଏଁ ଫୋନ୍ ଉଠାଇଲାନି । ସନ୍ଦେହ ଉପୁଜିବାରୁ ହଷ୍ଟେଲର ୱାଡେନକୁ ଜଣାଇଥିଲୁ । ରୁମ୍ ଭିତରେ ଫ୍ୟାନ୍ରେ ଝୁଲନ୍ତା ମୃତଦେହ ଦେଖି ହଷ୍ଟେଲ କର୍ତ୍ତୃପକ୍ଷ ପରିବାର ଲୋକଙ୍କୁ ଜଣାଇଥିଲେ । କଲ୍ୟାଣୀଙ୍କ ସମ୍ପର୍କୀୟ ହଷ୍ଟେଲରେ ପହଞ୍ଚିବା ପରେ ସେଠାରେ ଉତ୍ତେଜନା ପ୍ରକାଶ ପାଇଥିଲା । ଝିଅକୁ ନିର୍ଯାତନା ଦିଆଯାଇଥିବା ସେମାନେ ଅଭିଯୋଗ ଆଣିଥିଲେ । ବ୍ୟବଚ୍ଛେଦ ପରେ ପରିବାର ଲୋକ କଲ୍ୟାଣୀଙ୍କ ଚକ୍ଷୁଦାନ କରିଛନ୍ତି । ସେ ଜଣେ ମେଧାବୀ ଛାତ୍ରୀ ଥିଲେ । ତାଙ୍କ ଆଖି ଅନ୍ୟ କାହା ଜୀବନକୁ ଆଲୋକିତ କରୁ ବୋଲି ପରିବାର ଲୋକ କହିଛନ୍ତି ।
ଉକ୍ତ କୋଚିଂ ସେଣ୍ଟର ହଷ୍ଟେଲରେ ଗତ ଅଗଷ୍ଟ ୩୦ରେ ଆଉ ଏକ ଅଘଟଣ ଘଟିଥିଲା । ହଷ୍ଟେଲ ରୁମ୍ରୁ ଝାଡ଼ଖଣ୍ଡ ଛାତ୍ର ଅର୍ଣ୍ଣବ କୃଷ୍ଣଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା । ପରିବାର ଲୋକ ଅର୍ଣ୍ଣବର ହତ୍ୟା ଅଭିଯୋଗ ଆଣି କହିଥିଲେ, ଅର୍ଣ୍ଣବ ଅଣଓଡି଼ଆ ବୋଲି ତାକୁ ସବୁବେଳେ ହଇରାଣ କରାଯାଉଥିଲା । ପାଠପଢ଼ା ଚାପ ଅସହ୍ୟ ହେଉଥିଲା । ଏମିତିକି ମଝିରେ ମଝିରେ ଅର୍ଣ୍ଣବକୁ ହଷ୍ଟେଲରେ ଖାଇବାକୁ ଦିଆଯାଉନଥିଲା । ହଷ୍ଟେଲ କର୍ତ୍ତୃପକ୍ଷ ୨ ଦିନ ଧରି ଘଟଣାକୁ ଚାପି ଅର୍ଣ୍ଣବର ଅଙ୍ଗପ୍ରତ୍ୟଙ୍ଗ ଚାଲାଣ ଷଡ଼ଯନ୍ତ୍ରରେ ଲାଗିଥିଲେ ବୋଲି ମୃତକଙ୍କ ଭଉଣୀ ଦିବ୍ୟାକ୍ରିଷ୍ଣା କହିଥିଲେ । ସେହିପରି ଜଟଣୀ ଆଇଆଇଟିରେ ପଢ଼ୁଥିବା ଦିଲ୍ଲୀର କିର୍ତ୍ତୀକା ରାଜ୍ ସେପ୍ଟେମ୍ବର ୪ ତାରିଖରେ ଶିକ୍ଷାନୁଷ୍ଠାନର ପଞ୍ଚମ ମହଲାରୁ ଡେଇଁ ପ୍ରାଣ ହରାଇଥିଲେ।
