ସୁନ୍ଦରଗଡ଼, ୦୧/୦୮:ମିଲେଟ୍ ଜାତୀୟ ଶସ୍ୟରୁ ପ୍ରସ୍ତୁତ ହେବ ଗୁଣାତ୍ମକ ମାନର କୁକିଜ୍ । ପାଉଁରୁଟି, କେକ୍, କ୍ରିମ୍ ଭଳି ସୁସ୍ୱାଦୁ ଖାଦ୍ୟ ତିଆରି କରାଯିବ । ସ୍ଥାନୀୟ ବଜାରରେ ଅତି ଶସ୍ତାରେ ଉପଲବ୍ଧ ହେବ ଏସବୁ ସାମଗ୍ରୀ । ସୁନ୍ଦରଗଡ଼କୁ ମିଲେଟ୍ ଖାଦ୍ୟର ହବ୍ କରିବାକୁ ଜିଲ୍ଲା କୃଷି ବିଭାଗ ପକ୍ଷରୁ ନିଆଯାଇଛି ଗୁରୁତ୍ୱପୂର୍ଣ୍ଣ ପଦକ୍ଷେପ । ଶ୍ରୀ ଅନ୍ନ ଅଭିଯାନ (ଏସ୍ଏଏ) ଅନ୍ତର୍ଗତ ୧୨ ବ୍ଲକରେ ବେକେରି ୟୁନିଟ୍ ଖୋଲିବାକୁ ପ୍ରାରମ୍ଭିକ ପ୍ରକ୍ରିୟା ଆରମ୍ଭ ହୋଇଛି । ଏହା ଦ୍ୱାରା କେବଳ ମିଲେଟ୍ ପ୍ରସ୍ତୁତ ଖାଦ୍ୟଶସ୍ୟକୁ ପ୍ରୋତ୍ସାହନ ମିଳିବ ନାହିଁ³ ଉତ୍ପାଦକ ଗୋଷ୍ଠୀ ବି ଲାଭବାନ ହେବେ ।
ମୁଖ୍ୟ ଜିଲ୍ଲା କୃଷି ଅଧିକାରୀ (ସିଡିଏଓ) ଏଲ୍. ବି. ମଲ୍ଲିକ କହିଛନ୍ତି, ହେମଗିର, ଲେଫ୍ରିପଡ଼ା, ଟାଙ୍ଗରାପାଲି, ବାଲିଶଙ୍କରା, ନୂଆଗାଁ, କୁଆଁରମୁଣ୍ଡା, କୁତ୍ରା, ରାଜଗାଙ୍ଗପୁର, ଲାଠିକଟା, ବଣାଇଁ, ଲହୁଣିପଡ଼ା ଏବଂ ଗୁରୁଣ୍ଡିଆ ବ୍ଲକରେ ବେକେରି ମ୍ୟାନୁଫାକ୍ଚରିଂ ୟୁନିଟ୍ ସ୍ଥାପନ ହେବ । ସମ୍ପୃକ୍ତ ବ୍ଲକକୁ ବୈଷୟିକ ଉପକରଣ ପଠାଯିବା ପ୍ରକ୍ରିୟା ଆରମ୍ଭ ହୋଇଛି । ତନ୍ମଧ୍ୟରେ ଗ୍ୟାସ୍ ଓଭନ, ମିକ୍ଚର ମେସିନ, କୁକିଜ କଟିଂ ମେସିନ ଆଦି ୫ରୁ ୬ ଲକ୍ଷ ଟଙ୍କାର ଉପକରଣ ରହିଛି । ବ୍ଲକ କୃଷି କାର୍ଯ୍ୟାଳୟରୁ ଇଚ୍ଛୁକ ଚାଷୀ ସଙ୍ଗଠନର ସିଇଓ, ସଭାପତି, ସମ୍ପାଦକ ଆବଶ୍ୟକ କାଗଜପତ୍ର ଦେଇ ଏହାକୁ ଗ୍ରହଣ କରିବେ ।
ୟୁନିଟ୍ଗୁଡ଼ିକ କାର୍ଯ୍ୟକ୍ଷମ ହେବା ପରେ କୃଷି ବିଭାଗ ପକ୍ଷରୁ ନିୟମିତ ବ୍ୟବଧାନରେ ନିରୀକ୍ଷଣ କରାଯିବ । ମିଲେଟ୍ ପ୍ରସ୍ତୁତ ସାମଗ୍ରୀକୁ ଆଞ୍ଚଳିକ ବଜାରରେ ବିକ୍ରି କରାଯିବ । ଏହାବାଦ୍ ମେଳା, ମହୋତ୍ସବ, ଯାନିଯାତ୍ରା, ପ୍ରଦର୍ଶନୀରେ ବିକ୍ରିବଟା ବ୍ୟବସ୍ଥା କରାଯିବ । ଏହା ଉତ୍ପାଦକ ଗୋଷ୍ଠୀର ଆୟକୁ ବହୁଗୁଣିତ କରିବ ବୋଲି ସିଇଓମାନେ ଆଶା ରଖିଛନ୍ତି । ସୁନ୍ଦରଗଡ଼ରେ ଏହା ଯେପରି ସଫଳତା ହାସଲ କରିବ ସେ ନେଇ କୃଷି ବିଭାଗ ସବୁପ୍ରକାର ଉଦ୍ୟମ କରିବ ବୋଲି ଶ୍ରୀ ମଲ୍ଲିକ କହିଛନ୍ତି ।
ସୂଚନାଯୋଗ୍ୟ, ଜିଲ୍ଲାର ୧୭ଟି ବ୍ଲକ ମଧ୍ୟରୁ ୧୫ଟିରେ ମାଣ୍ଡିଆ ଜାତୀୟ ଶସ୍ୟ ଚାଷ ହେଉଛି । ତନ୍ମଧ୍ୟରୁ ୭ଟି ବ୍ଲକରେ ରାଜ୍ୟ ସରକାରଙ୍କ ପ୍ରୋତ୍ସାହନରେ ଶ୍ରୀ ଅନ୍ନ ଅଭିଯାନ ଜାରି ରହଛି । ଅବଶିଷ୍ଟ ୮ଟି ବ୍ଲକରେ ଜିଲ୍ଲା ଖଣିଜ ପାଣ୍ଠିରୁ ଏହି କାର୍ଯ୍ୟକ୍ରମ ଜାରି ରହିଛି । ସେହିପରି ଜିଲ୍ଲାବ୍ୟାପୀ ୬୭ଟି ମିଲେଟ୍ ଶକ୍ତି ଟିଫିନ ସେଣ୍ଟର ମହିଳା ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ପରିଚାଳିତ ହେଉଛି । ସେଠାରେ ଜଳଖିଆ, ପିଠାଠାରୁ ଆରମ୍ଭ କରି ମିଲେଟ୍ ପ୍ରସ୍ତୁତ ବିଭିନ୍ନ ଖାଦ୍ୟଦ୍ରବ୍ୟ ମିଳୁଛି ।
ଚଳିତ ଖରିଫ ଋତୁରେ ଜିଲ୍ଲାରେ ପ୍ରାୟ ୧୩ ହଜାର ହେକ୍ଟର ଜମିରେ ମିଲେଟ୍ ଜାତୀୟ ଚାଷ କରାଯାଇଛି । ଉତ୍ପାଦିତ ଶସ୍ୟକୁ ଠିକ୍ ଭାବେ ଉପଯୋଗ କରିବାରେ ବେକେରି ୟୁନିଟ୍ଗୁଡ଼ିକ ପ୍ରଭାବୀ ହୋଇପାରିବେ । ବଜାରରେ ମିଳୁଥିବା ମଇଦା ଜାତୀୟ ଖାଦ୍ୟ ଶରୀର ଉପରେ ପ୍ରତିକୂଳ ପ୍ରଭାବ ପକାଉଛି । ଏହାର ସ୍ଥାନ ମିଲେଟ୍ ଖାଦ୍ୟ ନେଇପାରିବ । କାରଣ ଏଥିରେ ଥିବା ପୌଷ୍ଟିକ ତତ୍ତ୍ୱ ପିଲାରୁ ବୟସ୍କଙ୍କ ପାଇଁ ଉପଯୋଗୀ ବୋଲି ବିଶେଷଜ୍ଞମାନେ କହିଛନ୍ତି ।
