ଭୁବନେଶ୍ୱର, ୦୪/୦୩: ବରିଷ୍ଠ କଂଗ୍ରେସ ନେତା ସୁର ରାଉତରାୟଙ୍କ ସାନ ପୁଅ ତଥା ବିଜେଡି ନେତା ମନ୍ମଥ ରାଉତରାୟଙ୍କ ଦ୍ୱିତୀୟ ଇଂନିସ ଆରମ୍ଭ ହୋଇଛି । ପ୍ରଥମ ବିବାହ ବିଚ୍ଛେଦ ପରେ ସେ ପଟିଆ ଅଞ୍ଚଳର ଜଣେ ଯୁବତୀଙ୍କୁ ଜୀବନସାଥୀ ବାଛିଛନ୍ତି । ରାଜଧାନୀ ଉପକଣ୍ଠ ଡେରାସ ନିକଟ ଚନ୍ଦକା ନେଚର ରିସର୍ଟରେ ବେଶ୍ ଆଡମ୍ବରପୂର୍ଣ୍ଣ ଭାବେ ବିବାହ ଉତ୍ସବ ସମ୍ପନ୍ନ ହୋଇଛି । ରିସର୍ଟ ଭିତରେ ଫଟୋ ଉଠା ଉପରେ କଟକଣା ଲାଗିଛି । ତାଙ୍କ ବାହାଘରରେ ଅଳ୍ପ କିଛି ହାତଗଣତି ସମ୍ପର୍କୀୟ ଓ ବନ୍ଧୁବାନ୍ଧବ ସାମିଲ୍ ହୋଇଥିଲେ ।
ମନ୍ମଥଙ୍କ ପତ୍ନୀଙ୍କ ନାଁ ରୋଜାଲିନ୍ ପଟ୍ଟନାୟକ । ସେ ମୁମ୍ବାଇର ଏକ ଘରୋଇ ବ୍ୟାଙ୍କରେ ଉଚ୍ଚପଦସ୍ଥ ଅଧିକାରୀ ଅଛନ୍ତି । ରୋଚକ କଥା ହେଉଛି, ରୋଜାଲିନ୍ ହେଉଛନ୍ତି ମନ୍ମଥଙ୍କ ପ୍ରଥମ ପତ୍ନୀ ସୁଚିସ୍ମିତା ମହାପାତ୍ରଙ୍କ ବାନ୍ଧବୀ । ବିବାହ ଉତ୍ସବ ପାଇଁ ଚନ୍ଦକା ରିସର୍ଟକୁ ୨ ଦିନ ପାଇଁ ବୁକ୍ କରାଯାଇଛି । ଉଭୟ ବର ଓ କନ୍ୟା ପରିବାର ଲୋକ ଓ ବନ୍ଧୁବାନ୍ଧବ ଉକ୍ତ ରିସର୍ଟରେ ରହିଥିଲେ । କିନ୍ତୁ ବିବାହ ବେଳେ ରିସର୍ଟ ଭିତରେ ମୋବାଇଲ୍ରେ ଫଟୋ ଉଠାଇବା ଓ ଭିଡିଓ ଉତ୍ତୋଳନ କରିବା ବାରଣ କରାଯାଇଥିଲା । ପ୍ରଥମ ଦିନ ରିସର୍ଟରେ ମେହେନ୍ଦୀ ଉତ୍ସବ ପାଳନ ହୋଇଥିଲା । ସୋମବାର ସନ୍ଧ୍ୟାରେ ରିସର୍ଟର ଅଳ୍ପ ଦୂରରୁ ବର ବେଶରେ ବାହାରିଥିଲେ ମନ୍ମଥ । ସାଙ୍ଗରେ ଅଳ୍ପ କିଛି ବରଯାତ୍ରୀ ଥିଲେ । ମନ୍ମଥଙ୍କ ସମ୍ପର୍କୀୟ ତଥା ପୂର୍ବତନ ପିସିସି ସଭାପତି ପ୍ରସାଦ ହରିଚନ୍ଦନ ବରଯାତ୍ରୀ ଭାବେ ଯାଇଥିଲେ । ବିଜେଡି କିମ୍ବା କଂଗ୍ରେସ ଦଳରୁ ଅନ୍ୟ କେହି ନେତା ବିବାହରେ ସାମିଲ୍ ହୋଇନଥିଲେ । ବିଳମ୍ବିତ ରାତିରେ ଚନ୍ଦକା ରିସର୍ଟରେ ବୈଦିକ ରୀତିନୀତିରେ ତାଙ୍କର ବାହାଘର ସମ୍ପନ୍ନ ହୋଇଥିବା ସୂଚନା ମିଳିଛି ।
