ଭୁବନେଶ୍ୱର/ରାଉରକେଲା,୨୧/୦୧: ସୋମବାର ସୁରମା ହକି କ୍ଲବ୍ ଏଚ୍ଆଇଏଲ୍ରେ ଡବଲ ବିଜୟ ହାସଲ କରିଛି । ପୁରୁଷ ଦଳ ୨-୧ ଗୋଲରେ ବେଙ୍ଗଲ ଟାଇଗର୍ସକୁ ଏବଂ ମହିଳା ଦଳ ୫-୧ରେ ଦିଲ୍ଲୀ ଏସ୍ଜି ପିପର୍ସକୁ ହରାଇଥିଲା । ମହିଳା ଦଳ ପଏଣ୍ଟ ଟେବୁଲରେ ଶୀର୍ଷ ସ୍ଥାନକୁ ଉନ୍ନୀତ ହୋଇଛି । ପୁରୁଷ ଦଳ ସିଜନରେ ୭ଟି ମ୍ୟାଚ୍ ଖେଳି ୧୧ ପଏଣ୍ଟ ପାଇ ଟେବୁଲରେ ଷଷ୍ଠ ସ୍ଥାନରେ ରହିଛି ।
ପୁରୁଷରେ ସୁରମା ଓ ବେଙ୍ଗଲ୍ ଟାଇଗର୍ସ ମଧ୍ୟରେ ଖେଳ ସଂଘର୍ଷପୂର୍ଣ୍ଣ ହୋଇଥିଲା । ପ୍ରଥମ କ୍ୱାର୍ଟର ଗୋଲ ଶୂନ୍ୟ ରହିଥିଲା । ଦ୍ୱିତୀୟ କ୍ୱାର୍ଟରରେ ସୁରମା ୨ଟି ଗୋଲ୍ ଦେଇ ଅଗ୍ରଣୀ ଲାଭ କରିଥିଲା । ୨୧ ମିନିଟରେ ପ୍ରଭଜୋତ ସିଂ ଏବଂ ୨୮ ମିନିଟରେ ମନିନ୍ଦର ସିଂ ଗୋଲ୍ ସ୍କୋର କରିଥିଲେ । ତୃତୀୟ କ୍ୱାର୍ଟରରେ ଟାଇଗର୍ସ ଗୋଲ୍ ଖାତା ଖୋଲିଥିଲା । ୩୯ ମିନିଟରେ ଯୁଗରାଜ ସିଂ ଗୋଲ୍ ଦେଇ ସ୍ଥିତି ୧-୨ କରିଥିଲେ । ଅନ୍ତିମ କ୍ୱାର୍ଟର ଖେଳ ପ୍ରବଳ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ହୋଇଥିଲା । ଶେଷରେ ଗୋଟିଏ ଗୋଲ୍ରେ ଅଗ୍ରଣୀ ସହ ସୁରମା ମ୍ୟାଚ୍ ଜିତି ନେଇଥିଲା ।
ସୁରମା ୫-୧ରେ ଜିତିଲା
ଦିଲ୍ଲୀ ଏସ୍ଜି ପିପର୍ସ ବିପକ୍ଷରେ ସୁରମା ହକି କ୍ଲବ୍ ବଡ଼ ବିଜୟ ହାସଲ କରିଛି । ଦଳ ଖେଳକୁ ସଂପୂର୍ଣ୍ଣ ନିୟନ୍ତ୍ରଣରେ ରଖି ୫-୧ ଗୋଲରେ ବିଜୟୀ ହୋଇଥିଲା । ପ୍ରଥମ କ୍ୱାର୍ଟରରେ ସୁରମା ୩ଟି ଗୋଲ୍ ଦେଇଥିଲା । ୬, ୯ ଓ ୧୦ ମିନିଟରେ ଗୋଲ୍ ହୋଇଥିଲା । ଦ୍ୱିତୀୟ କ୍ୱାର୍ଟର ଖେଳ ଗୋଲ ଶୂନ୍ୟ ରହିଥିଲା । ପୁଣି ୩୬ ମିନିଟରେ ସୁରମା ଆଉ ଏକ ଗୋଲ୍ ଦେଇ ୪-୦ରେ ଅଗ୍ରଣୀ ହୋଇଥିଲା । ୩୮ ମିନିଟରେ ଦିଲ୍ଲୀ ପ୍ରଥମ ଗୋଲ୍ ସ୍କୋର କରିଥିଲା । ପରବର୍ତ୍ତୀ ସମୟ ଖେଳ ସଂଘର୍ଷପୂର୍ଣ୍ଣ ହୋଇଥିଲା। ତଥାପି ସୁରମା ଶେଷ ମୁହୂର୍ତ୍ତରେ (୬୦ ମିନିଟ) ପଞ୍ଚମ ଗୋଲ୍ ଦେଇ ୫-୧ରେ ମ୍ୟାଚ୍ ଜିତି ନେଇଥିଲା । ଚଳିତ ମହିଳା ଏଚ୍ଆଇଏଲ୍ରେ ୪ଟି ମ୍ୟାଚ୍ରୁ ୩ଟି ବିଜୟ ସହ ସୁରମା ପଏଣ୍ଟ ଟେବୁଲରେ ଶୀର୍ଷ ସ୍ଥାନ ଦଖଲ କରିଛି । ଓଡ଼ିଶା ୱାରିୟସ ଗୋଟିଏ ସ୍ଥାନ ତଳକୁ ଖସି ଦ୍ୱିତୀୟ ଏବଂ ବେଙ୍ଗଲ ଟାଇଗର୍ସ ତୃତୀୟ ସ୍ଥାନରେ ରହିଛି ।
