କଟକ/ଭୁବନେଶ୍ୱର,୦୯/୧୨: ସୟଦ ମୁସ୍ତାକ ଅଲି ଟ୍ରଫିରେ (ଟି-ଟ୍ୱେଣ୍ଟି) ଓଡ଼ିଶା ଅତି ନୈରାଶ୍ୟଜନକ ପ୍ରଦର୍ଶନ କରି ଗ୍ରୁପ୍ ପର୍ଯ୍ୟାୟରେ ମାତ୍ର ଗୋଟିଏ ମ୍ୟାଚ୍ ଜିତିବାରେ ସଫଳ ହୋଇଥିଲା । ଦଳର ଏହି ବିଫଳତା ପାଇଁ ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ)ର ସିନିୟର ଚୟନ କମିଟି ଅଧ୍ୟକ୍ଷ ଅମିୟ ରାୟଙ୍କୁ ସିଧାସଳଖ ଦାୟୀ କରିଛନ୍ତି ବରିଷ୍ଠ ଦ୍ରୁତ ବୋଲର ସୂର୍ଯ୍ୟକାନ୍ତ ପ୍ରଧାନ । ଦଳ ଚୟନରେ ପାତରଅନ୍ତର କରାଯାଉଥିବା ସେ ଅଭିଯୋଗ କରିଛନ୍ତି । ଓସିଏ ତରଫରୁ ଏ ବିଷୟରେ କୌଣସି ପ୍ରତିକ୍ରିୟା ଆସିନାହିଁ ।
ସୂର୍ଯ୍ୟକାନ୍ତ କହିଛନ୍ତି, ‘ଖେଳାଳିଙ୍କ ପ୍ରଦର୍ଶନକୁ ଗୁରୁତ୍ୱ ନଦେଇ ଚୟନ କମିଟି ଅଧ୍ୟକ୍ଷ ଅମିୟ ରାୟ ନିଜ ପରିଚିତ କ୍ଲବ୍ର ଖେଳାଳିମାନଙ୍କୁ ଟି-ଟ୍ୱେଣ୍ଟି ଦଳରେ ସୁଯୋଗ ଦେଲେ । ଯଦି ମୋ କଥା କହିବି, ଗତ ଓଡ଼ିଶା ପ୍ରିମିୟର ଲିଗ୍ (ଓପିଏଲ୍)ରେ ଗୋଟିଏ ଦଳର ନେତୃତ୍ୱ ନେବା ସହ ପ୍ଲେୟାର ଅଫ୍ ଦ ଟୁର୍ଣ୍ଣାମେଣ୍ଟ ବିବେଚିତ ହୋଇଥିଲି । ଧଳା ବଲରେ ଭଲ ପ୍ରଦର୍ଶନ ସତ୍ତେ୍ୱ ମୋତେ ସୁଯୋଗ ଦେଲେ ନାହିଁ । ଯଦି ଦଳ ଚୟନରେ ପ୍ରଦର୍ଶନକୁ ଗୁରୁତ୍ୱ ଦିଆ ନଯିବ ତେବେ ଓପିଏଲ୍ କାହିଁକି ଖେଳାଯାଉଛି ?’
୩୧ ବର୍ଷୀୟ ସୂର୍ଯ୍ୟକାନ୍ତ ଦୀର୍ଘ ୧୧ବର୍ଷ ଧରି ଓଡ଼ିଶା ସିନିୟର କ୍ରିକେଟ ଦଳର ସଦସ୍ୟ ରହିଆସିଛନ୍ତି । ଚଳିତ ରଣଜୀ ସିଜନରେ ସେ ଜାମ୍ମୁ-କାଶ୍ମୀର, ବରୋଦା, ମୁମ୍ବାଇ ଓ ମହାରାଷ୍ଟ୍ର ବିପକ୍ଷରେ ମ୍ୟାଚ୍ ଖେଳି ୭ ୱିକେଟ୍ ହାସଲ କରିବାରେ ସଫଳ ହୋଇଛନ୍ତି । ଦୀର୍ଘ ଦିନ ଧରି କିଛି ଖେଳାଳି ଅଭିଜ୍ଞତା ଆଧାରରେ ଓଡ଼ିଶା ଦଳରେ ସୁଯୋଗ ପାଉଛନ୍ତି । ଯେଉଁଥିପାଇଁ ଦଳର ପ୍ରଦର୍ଶନ ଜାତୀୟ ସ୍ତରରେ ଆଦୌ ଭଲ ରହୁନି ।
ନୂଆ ଖେଳାଳିଙ୍କୁ ସୁଯୋଗ ଦେଇ ଆଗକୁ ଆଇପିଏଲ୍, ଟିମ୍ ଇଣ୍ଡିଆ ପାଇଁ ଖେଳାଳି ବାହାର କରିବାକୁ ଚୟନ କମିଟି ଉଦ୍ୟମ କରୁଥିବା କୁହାଯାଉଛି । ଚୟନକମିଟିର ଏଭଳି ଚିନ୍ତଧାରାକୁ ସୂର୍ଯ୍ୟକାନ୍ତ ଖଣ୍ଡନ କରିଛନ୍ତି । ‘କେବଳ ଅଧ୍ୟକ୍ଷ ନୁହଁନ୍ତି, କମିଟିର ଅନ୍ୟ ସଦସ୍ୟମାନେ ମଧ୍ୟ ସେମିତି କରୁଛନ୍ତି । ନିଜ ପିଲାଙ୍କୁ ଖେଳାଉଛନ୍ତି । ଫଳରେ ପ୍ରତିଭା ଓ ପ୍ରଦର୍ଶନକୁ ବିଚାର କରୁ ନାହାନ୍ତି । ଭଲ ଖେଳାଳି ଦଳରୁ ବାଦ ପଡ଼ୁଛନ୍ତି । ସୟଦ ମୁସ୍ତାକ ଅଲିରେ ଦଳର ପ୍ରଦର୍ଶନ ପାଇଁ କେବଳ ଚୟନ କମିଟି ହିଁ ଦାୟୀ । ଯଦି ଠିକ୍ ଭାବେ ଦଳ ଚୟନ ନହେବ ପ୍ରଦର୍ଶନ କେମିତି ଭଲ ରହିବ । ଚୟନକର୍ତ୍ତା ମାନେ ଟ୍ରାଏଲ୍ସ ମ୍ୟାଚ ସମୟରେ ନିଦରେ ଶୋଇ ପଡୁଛନ୍ତି । ଜଣେ ଚୟନକର୍ତ୍ତା ଢୁଳାଉଥିବାର ଏକ ଫଟୋ ମଧ୍ୟ ଭାଇରାଲ୍ ହୋଇଛି ବୋଲି ସୂର୍ଯ୍ୟକାନ୍ତ କହିଛନ୍ତି ।
ସେ ଆହୁରି ମଧ୍ୟ କହିଛନ୍ତି, ‘ଦଳ ଚୟନରେ ଏଭଳି ଅନିୟମିତତା ପାଇଁ ଓସିଏ ସମ୍ପାଦକଙ୍କ ଦୃଷ୍ଟି ଆକର୍ଷଣ କରିବାକୁ ଚାହେଁ । ଧଳା ବଲରେ ଭଲ ପ୍ରଦର୍ଶନ କଲେ ସୁଯୋଗ ନାହିଁ । କିନ୍ତୁ ୨ ବର୍ଷ ଧରି ଭଲ ପ୍ରଦର୍ଶନ କରି ପାରୁ ନଥିବା ଖେଳାଳି ଶିବିରରେ ନଥାଇ ମଧ୍ୟ ଦଳରେ ସୁଯୋଗ ପାଇଲେ । ଏଭଳି ହେଲେ ଓଡ଼ିଶା କ୍ରିକେଟ୍ କେମିତି ଆଗେଇବ କୁହନ୍ତୁ । ତେଣୁ ମୋର ବିଶ୍ୱାସ ଓସିଏ ଏ ଦିଗରେ ଦୃଷ୍ଟି ଦେବେ ।’ ସୟଦ ମୁସ୍ତାକ ଅଲି ଟ୍ରଫିରେ ଓଡ଼ିଶା ଗ୍ରୁପ୍ ଡି’ରେ ସାମିଲ ରହିଥିଲା । କେବଳ ଗୋଟିଏ ମ୍ୟାଚ୍ ଆସାମ ଠାରୁ ଦଳ ବିଜୟୀ ହୋଇଥିଲା । ୪ଟି ମ୍ୟାଚ୍ରେ ପରାଜୟ ଏବଂ ଗୋଟିଏ ମ୍ୟାଚ୍ ବର୍ଷା ଯୋଗୁ ଧୋଇ ଯାଇଥିଲା । ମୋଟରେ ୬ ପଏଣ୍ଟ ସହ ଟେବୁଲରେ ସପ୍ତମ ସ୍ଥାନରେ ରହି ଅଭିଯାନ ଶେଷ କରିଥିଲା ।
