ତେଲକୋଇ,୨୭/୦୯: ଗଣେଶ ପୂଜାରେ ଅଘଟଣ । ପୂଜା ସମୟରେ ଟଳି ପଡ଼ିଲେ ଶିକ୍ଷକ । ଚାଲିଗଲା ଜୀବନ । ଏଭଳି ଅଭାବନୀୟ ଖବର କେନ୍ଦୁଝର ଜିଲ୍ଲା ତେଲକୋଇ ବ୍ଲକ ସଲେଇକେନା ଉଚ୍ଚ ପ୍ରାଥମିକ ବିଦ୍ୟାଳୟରୁ ଆସିଛି । ମୃତକ ଶିକ୍ଷକ ହେଲେ ୩୫ବର୍ଷୀୟ ଚନ୍ଦନ କୁମାର ଜେନା ।
ସୂଚନା ଅନୁଯାୟୀ, ସଲେଇକେନା ଉଚ୍ଚ ପ୍ରାଥମିକ ବିଦ୍ୟାଳୟରେ ଗଣେଶ ପୂଜା ଚାଲିଥିଲା। ସେହି ସମୟରେ ଶିକ୍ଷକ ଜଣଙ୍କ ହଠାତ୍ ତଳେ ପଡ଼ିଯାଇଥିଲେ । ଏନେଇ ସହକାରୀ ଶିକ୍ଷକମାନେ ସଙ୍ଗେ ସଙ୍ଗେ ତାଙ୍କୁ ଉଦ୍ଧାର କରି ତେଲକୋଇ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଶିକ୍ଷକଙ୍କ ମୃତ୍ୟୁ ଖବର ଜଣାପଡ଼ିବା ପରେ ତେଲକୋଇ ବ୍ଲକ୍ ଶିକ୍ଷା ବିଭାଗରେ ଶୋକର ଛାୟା ଖେଳିଯାଇଛି । ବିଭିନ୍ନ ବିଦ୍ୟାଳୟରୁ ଶିକ୍ଷକମାନେ ଆସି ସ୍ବାସ୍ଥ୍ୟକେନ୍ଦ୍ରରେ ଶେଷ ଦର୍ଶନ କରିଛନ୍ତି । ସେପଟେ ଖବରପାଇ ତେଲକୋଇ ଥାନା ପୁଲିସ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ମୃତଦେହକୁ ଜବତ କରିବା ସହିତ ପ୍ରାଥମିକ ତଦନ୍ତ ଆରମ୍ଭ କରିଛି । ତେବେ ହୃଦଘାତ୍ କିମ୍ବା ବ୍ରେନ୍ ଷ୍ଟ୍ରୋକ କାରଣରୁ ଶିକ୍ଷକଙ୍କ ମୃତ୍ୟୁ ହୋଇଥାଇ ପାରେ ବୋଲି ଅନୁମାନ କରାଯାଉଛି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡିବ ବୋଲି ପୁଲିସ ସୂଚନା ଦେଇଛି ।
