ବଲାଙ୍ଗିର: ଭୁବନେଶ୍ଵର ମହାନଗର ନିଗମ କାର୍ଯ୍ୟାଳୟରେ ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣାକୁ ୨୪ ଘଣ୍ଟା ବିତି ନଥିବା ବେଳେ ବଲାଙ୍ଗିର ଜିଲ୍ଲା ପୁଇଁତଳା ତହସିଲରେ ପୁଣି ଏକ ସମାନ ଧରଣର ଘଟଣା ଘଟିଛି ।
ସୂଚନା ମୁତାବକ, ଆଜି ଅପରାହ୍ନରେ କୌଣସି ଏକ ପ୍ରସଙ୍ଗକୁ କେନ୍ଦ୍ର କରି ଦୁଇ ନିଶାସକ୍ତ ଯୁବକ ତହସିଲ କାର୍ଯ୍ୟାଳୟରେ ଉନ୍ମତ୍ତ କାଣ୍ଡ ଭିଆଇଛନ୍ତି । ପ୍ରଥମେ ସେମାନେ ଗାଳିଗୁଲଜ କରିବା ସହ ଦୁଇଜଣ କିରାଣୀଙ୍କୁ ଆକ୍ରମଣ କରିଛନ୍ତି ଏବଂ ଭିଡିଓ କରୁଥିବା ଜଣେ ମହିଳା କର୍ମଚାରୀଙ୍କୁ ଟଣା ଓଟରା କରିଛନ୍ତି । ପରେ ଖବର ପାଇ ତହସିଲଦାର ଗୌରବ ବର୍ଗେ ପୁଲିସ ସହାୟତାରେ ସେମାନଙ୍କୁ ଠାବ କରି କାବୁ କରିଛନ୍ତି ।
ଯୁବକଦ୍ୱୟ ପୁଇଁତଳା ଥାନା ଅନ୍ତର୍ଗତ ପିପିର୍ଜା ଗାଁର ପ୍ରେମରାଜ ବାଗ ଓ କାଲିଘନା ଗାଁର ସୁବାସ ଭଞ୍ଜ ବୋଲି ଜଣା ପଡିଛି । ସେମାନେ ଆଜି ତହସିଲ କାର୍ଯ୍ୟାଳୟକୁ ଆସି ଜୁନିୟର ରେଭେନ୍ୟୁ ଆସିଷ୍ଟାଣ୍ଟ ସୁଯୟା ସାଏ ଓ ନୟନ କୁମାର ସାଙ୍କୁ ଗାଳିଗୁଲଜ କରୁଥିଲେ । ତେବେ ଏନେଇ ପୁଇଁନ୍ତଳା ଥାନାରେ ମାମଲା ରୁଜୁ ହୋଇଥିବା ବେଳେ ଦୁଇ ଜଣ ଅଟକ ଥିବା ଜଣାପଡିଛି ।
