ନୂଆଦିଲ୍ଲୀ, ୧୪।୧୧: କିଏ ହେବ ଦିଲ୍ଲୀର ନୂଆ ମେୟର ? ମଇଦାନରେ ଆପ୍ ଏବଂ ବିଜେପି ପ୍ରାର୍ଥୀଙ୍କ ମଧ୍ୟରେ କଡ଼ା ଟକ୍କର । ନିର୍ବାଚନ ଜିତିବାକୁ ଉଭୟ ଦଳର ରଣନୀତି ପ୍ରସ୍ତୁତ । ଅପରାହ୍ନ ୨ଟାରେ ଅନୁଷ୍ଠିତ ହେବ ନିର୍ବାଚନ । ଅନୁସୂଚିତ ଜାତିର ହେବ ଉଭୟ ପଦ । 

ଦିଲ୍ଲୀର ମେୟର ଏବଂ ଡେପୁଟି ମେୟର ନିର୍ବାଚନ । ଏପ୍ରିଲରେ ଅନୁଷ୍ଠିତ ହେବାକୁ ଥିବା ଏହି ନିର୍ବାଚନ କୌଣସି କାରଣରୁ ସ୍ଥଗିତ ରଖାଯାଇଥିଲା । ପରେ ନଭେମ୍ବର ୪ରେ ଅର୍ଥାତ୍ ଗୁରୁବାର ଏହି ନିର୍ବାଚନ ଆୟୋଜିତ ହେବା ନେଇ ନିର୍ଦ୍ଦେଶ ଦେଇଥିଲେ ଦିଲ୍ଲୀ ମେୟର । ଦିଲ୍ଲୀ ମୁନିସିପାଲ କର୍ପୋରେସନରେ ଆମ୍ ଆଦମୀ ପାର୍ଟି ଏବଂ ଭାରତୀୟ ଜନତା ପାର୍ଟି ତରଫରୁ ନିର୍ବାଚନ ଜିତିବା ପାଇଁ ସମସ୍ତ ରଣନୀତି ପ୍ରସ୍ତୁତ ସରିଛି । ମେୟରଙ୍କ ନିର୍ଦ୍ଦେଶ ଅନୁଯାୟୀ, ଅପରାହ୍ନ ୨ଟାରେ ନିର୍ବାଚନ ଅନୁଷ୍ଠିତ ହେବ । ଏଥିପାଇଁ ପ୍ରିଜାଇଡିଂ ଅଫିସର ଭାବରେ ୱାର୍ଡ ସଂଖ୍ୟା ୨୨୬ ଗୌତମ ପୁରୀର କାଉନସିଲର ସତ୍ୟ ଶର୍ମାଙ୍କୁ ମନୋନିତ କରାଯାଇଥିଲା । 

ଏମ୍‌ସିଡି ଆକ୍ଟ ୧୯୫୭ର ଧାରା ୭୭(ଏ) ଅନୁଯାୟୀ, ପ୍ରଦତ୍ତ କ୍ଷମତାକୁ ବ୍ୟବହାର କରି ଦିଲ୍ଲୀର ଉପରାଜ୍ୟପାଳ ସତ୍ୟ ଶର୍ମାଙ୍କୁ ମେୟର ନିର୍ବାଚନ ପାଇଁ ବୈଠକର ଅଧ୍ୟକ୍ଷତା କରିବା ପାଇଁ ନିଯୁକ୍ତ କରିଛନ୍ତି । ଚଳିତ ବର୍ଷ ଏମ୍‌ସିଡି ଆକ୍ଟ ଅନୁଯାୟୀ, ତୃତୀୟ ବର୍ଷ ମେୟର ଏବଂ ଡେପୁଟି ମେୟର ଅନୁସୂଚିତ ଜାତିର ହେବେ । ଏନେଇ ଆପ୍ ଏବଂ ବିଜେପି ଏପ୍ରିଲରେ ପ୍ରାର୍ଥୀ ଘୋଷଣା କରିଥିଲେ । ଆପ୍ ପକ୍ଷରୁ ଦେବ ନଗର ୱାର୍ଡ ନମ୍ବର ୮୪ର କାଉନସିଲର ମହେଶ ଖିଚି ଏବଂ ଡେପୁଟି ମେୟର ଭାବେ ଅମନ ବିହାର ୱାର୍ଡ ନମ୍ବର ୪୧ର କାଉନସିଲର ରବୀନ୍ଦ୍ର ଭରଦ୍ୱାଜଙ୍କ ନାଁ ଘୋଷଣା କରିଥିଲା । ସେହିପରି ବିଜେପି ମେୟର ଭାବେ କିଶନ ଲାଲ ଏବଂ ଡେପୁଟି ମେୟର ଭାବେ ନୀତା ବିଷ୍ଟଙ୍କ ନାଁ ପ୍ରାର୍ଥୀ ଭାବେ ଘୋଷଣା କରିଥିଲା ।