ନୂଆଦିଲ୍ଲୀ: ବିଶ୍ୱର ଲୋକପ୍ରିୟ ବୈଦ୍ୟୁତିକ କାର ନିର୍ମାତା ଟେସଲା ଭାରତରେ ଏହାର ପ୍ରଥମ ଚାର୍ଜିଂ ଷ୍ଟେସନ୍ ଲଞ୍ଚ କରିବାର ତାରିଖ ଘୋଷଣା କରିଛି । ଏହି ସୁପରଚାର୍ଜିଂ ଷ୍ଟେସନ୍ ମୁମ୍ବାଇର ୱାନ୍ ବିକେସିରେ ତିଆରି ହୋଇଛି । ଏହା ସୋମବାର (ଅଗଷ୍ଟ ୪, ୨୦୨୫) ଠାରୁ ଆନୁଷ୍ଠାନିକ ଭାବରେ ଆରମ୍ଭ ହେବ । ଟେସଲାର ଏହି ପ୍ରଥମ ଚାର୍ଜିଂ ଷ୍ଟେସନରେ, ଗ୍ରାହକମାନଙ୍କୁ ଦ୍ରୁତ(ଫାଷ୍ଟ) ଚାର୍ଜିଂ ଏବଂ ନିୟମିତ(ରେଗୁଲାର) ଚାର୍ଜିଂ ସୁବିଧା ଉଭୟ ଯୋଗାଇ ଦିଆଯିବ । 

ଷ୍ଟେସନରେ ମୋଟ ଚାରୋଟି V4 ସୁପରଚାର୍ଜିଂ ଷ୍ଟଲ୍ ସ୍ଥାପନ କରାଯାଇଛି । ଏହା 250kW ପର୍ଯ୍ୟନ୍ତ ହାଇ-ସ୍ପିଡ୍ ଡିସି ଚାର୍ଜିଂ ପ୍ରଦାନ କରିପାରିବ । ଏହି ସୁପରଚାର୍ଜିଂ ସୁବିଧା ପାଇଁ ଗ୍ରାହକମାନଙ୍କୁ ପ୍ରତି ୟୁନିଟ୍ ୨୪ ଟଙ୍କା ଦେୟ ଦେବାକୁ ପଡିବ। ଏହା ବ୍ୟତୀତ, ଚାରୋଟି ଏସି ଡେଷ୍ଟିନେସନ୍ ଚାର୍ଜିଂ ଷ୍ଟଲ୍ ମଧ୍ୟ ରହିବ । ଏହି ଷ୍ଟଲ୍ ଗୁଡ଼ିକ 11kW ପର୍ଯ୍ୟନ୍ତ ଚାର୍ଜିଂ ଗତି ପ୍ରଦାନ କରିବ । 

ମୁମ୍ବାଇରେ ନିର୍ମିତ ଚାର୍ଜିଂ ଷ୍ଟେସନ ଭାରତରେ ନିର୍ମିତ ହେବାକୁ ଥିବା ୮ଟି ସୁପରଚାର୍ଜିଂ ଷ୍ଟେସନ ମଧ୍ୟରୁ ପ୍ରଥମ । ଏହି ଷ୍ଟେସନରେ ମାତ୍ର ୧୫ ମିନିଟ ଚାର୍ଜ ହେଲେ ଟେସଲା ମଡେଲ Y ୨୬୭ କିଲୋମିଟର ରେଞ୍ଜ ଦେଇପାରିବ । ଏହି ଦୂରତା ଏତେ ଯେ ଆପଣ ମୁମ୍ବାଇ ବିମାନବନ୍ଦରରୁ ଗେଟୱେ ଅଫ୍ ଇଣ୍ଡିଆକୁ ପାଞ୍ଚଥର ଯାତ୍ରା କରିପାରିବେ । ଟେସଲାର ସୁପରଚାର୍ଜର ସବୁ ସମୟରେ କାର୍ଯ୍ୟକ୍ଷମ ହୋଇପାରିବ । 

ଚାର୍ଜିଂ ଷ୍ଟେସନ୍ ଲଞ୍ଚ ସହିତ, ଟେସଲା ଭାରତରେ ଏହାର ଡିଜାଇନ୍ ଷ୍ଟୁଡିଓ ମଧ୍ୟ ଲଞ୍ଚ କରିଛି। ଏହି ସୁବିଧା ମାଧ୍ୟମରେ, ଗ୍ରାହକମାନେ ଏବେ ଦେଶର ଯେକୌଣସି ସ୍ଥାନରୁ ଅନଲାଇନରେ ସେମାନଙ୍କର କାରକୁ କଷ୍ଟମାଇଜ୍ ଏବଂ ବୁକ୍ କରିପାରିବେ । ବର୍ତ୍ତମାନ ଟେସଲା ଏହାର ଲୋକପ୍ରିୟ ମଡେଲ୍ Y ପାଇଁ ବୁକିଂ ଆରମ୍ଭ କରିଛି । ଏହାର ଡେଲିଭରି ପ୍ରଥମେ ମୁମ୍ବାଇ, ପୁଣେ, ଦିଲ୍ଲୀ ଏବଂ ଗୁରୁଗ୍ରାମ ଭଳି ପ୍ରମୁଖ ସହରରେ ଦିଆଯିବ । ଏହି ସହରଗୁଡ଼ିକରେ ଡେଲିଭରି ଅଗଷ୍ଟ ସେପ୍ଟେମ୍ବର ମଧ୍ୟରେ ଆରମ୍ଭ ହେବ ।