ନୂଆଦିଲ୍ଲୀ, ୨୩/୦୧ : ଥାଇଲ୍ୟାଣ୍ଡରେ ସମଲିଙ୍ଗୀ ବିବାହକୁ ଅନୁମତି। ମ୍ୟାରେଜ୍ ଇକ୍ଵାଲିଟି ଆକ୍ଟକୁ ଆଇନଗତ ମାନ୍ୟତା। ଗୁରୁବାର ଠାରୁ ଦେଶରେ କାର୍ଯ୍ୟକାରୀ ହେଲା ନୂଆ ଆଇନ। ସମଲିଙ୍ଗୀ ବିବାହକୁ ମାନ୍ୟତା ଦେବାରେ ଥାଇଲ୍ୟାଣ୍ଡ ଏସିଆର ତୃତୀୟ ଦେଶ ଏବଂ ଦକ୍ଷିଣ ପୂର୍ବ ଏସିଆର ପ୍ରଥମ ଦେଶ ହୋଇପାରିଛି। ଏହା ପୂର୍ବରୁ ନେପାଳ ଏବଂ ତାଇବାନ ସମଲିଙ୍ଗୀ ବିବାହକୁ ଅନୁମତି ଦେଇସାରିଛନ୍ତି। ତେବେ ଦେଶରେ ଏହି ଆଇନ ଲାଗୁ ହେବାପରେ ପ୍ରଥମ ଦିନରେ ୩୦୦ LGBTQ ଦମ୍ପତି ବିବାହ କରିବେ ବୋଲି ଅନୁମାନ କରାଯାଉଛି।
ସୂଚନାନୁଯାୟୀ, ଥାଇଲ୍ୟାଣ୍ଡରେ LGBTQ ସମୁଦାୟ ସମଲିଙ୍ଗୀ ବିବାହକୁ ମାନ୍ୟତା ଦେବାକୁ ୨୦ ବର୍ଷ ହେଲା ଦାବି କରିଆସୁଥିଲେ। ଏବେ ଏହାକୁ ସରକାର ମାନ୍ୟତା ଦେଇଛନ୍ତି। ଏବେ ଦେଶରେ ୧୮ ବର୍ଷରୁ ଉର୍ଦ୍ଧ୍ଵ ଯେକୌଣସି ବ୍ୟକ୍ତି ସମଲିଙ୍ଗୀ ବିବାହ କରିପାରିବେ। ଏହି ଅବସରରେ ଗୁରୁବାର ରାଜଧାନୀ ବ୍ୟାଙ୍କକକ୍ର ଏକ ସପିଂ ମଲ୍ରେ ଭବ୍ୟ ସମାରୋହ ଆୟୋଜନ କରାଯାଇଛି। ଏଠାରେ ୩୦୦ ସମଲିଙ୍ଗୀ ବିବାହ କରିବେ ବୋଲି ଅନୁମାନ କରାଯାଉଛି। ତେବେ ବିବାହ ପରେ ଏହି ଦମ୍ପତିଙ୍କୁ ସମସ୍ତ ଅଧିକାର ମିଳିବ, ଯାହା ଅନ୍ୟ ପତି-ପତ୍ନୀଙ୍କୁ ମିଳୁଛି। ଏତଦ୍ ବ୍ୟତୀତ ଥାଇଲ୍ୟାଣ୍ଡ ସଂସଦ ସିଭିଲ୍ ଏବଂ କମର୍ସିଆଲ୍ କୋଡ୍ରେ ସଂଶୋଧନ କରିଛନ୍ତି। ଏହି କୋଡ୍ରେ ସ୍ଵାମୀ ଏବଂ ସ୍ତ୍ରୀ ବଦଳରେ ଇଣ୍ଡିଭିଜୁଆଲ୍ ଏବଂ ମ୍ୟାରେଜ୍ ପାର୍ଟନର କରାଯାଇଛି। ସମଲିଙ୍ଗୀ ଦମ୍ପତିଙ୍କୁ ଆଇନଗତ, ଅର୍ଥନୈତିକ ଏବଂ ସ୍ଵାସ୍ଥ୍ୟଗତ ସମାନ ଅଧିକାର ମିଳିବ। ଏହା ସହିତ ସମ୍ପତ୍ତିରେ ଜଏଣ୍ଟ ଆକ୍ସେସ୍ ଅଧିକାର ମିଳିବ।
ଏହି ଖବରଟିକୁ ପଢନ୍ତୁ-ଫିଲିପିନ୍ସରେ ଭୂକମ୍ପ ଝଟକା, କ୍ଷୟକ୍ଷତିର ନାହିଁ ସୂଚନା
ଜର୍ମାନୀ, ଫ୍ରାନ୍ସ, ବେଲଜିୟମ ସମେତ ୧୩ଟି ଦେଶରେ ସମଲିଙ୍ଗୀ ବିବାହକୁ ମାନ୍ୟତା ମିଳିଛି। ସେହିପରି ୟମନ, ଇରାନ, ବ୍ରୁନେଇ, ନାଇଜେରିଆ, କତାର ସମେତ ୧୩ଟି ଦେଶରେ ସମଲିଙ୍ଗୀ ବିବାହକୁ ବ୍ୟାନ୍ କରାଯାଇଛି। ଏପରିକି ଏହି ଦେଶ ଗୁଡ଼ିକରେ ସମଲିଙ୍ଗୀ ବିବାହ କଲେ ଦଣ୍ଡବିଧାନ ହେବାର ବ୍ୟବସ୍ଥା ରହିଛି। ମୃତ୍ୟୁଦଣ୍ଡ ଦିଆଯାଉଛି। ସେହିପରି ଆଉ କିଛି ଦେଶ ଅଛନ୍ତି, ଯେଉଁଠାରେ ସମଲିଙ୍ଗୀ ବିବାହ ଅପରାଧ ନୁହେଁ କିନ୍ତୁ ଏହାକୁ ଆଇନ ମାନ୍ୟତା ଦିଆଯାଇ ନାହିଁ। ଏହି ତାଲିକାରେ ଭାରତ, ଚୀନ, ଋଷ, ବ୍ରିଟେନ ଏବଂ ଶ୍ରୀଲଙ୍କା ଅଛନ୍ତି। ଭାରତରେ ସୁପ୍ରିମକୋର୍ଟ ମଧ୍ୟ ସମଲିଙ୍ଗୀ ବିବାହକୁ ମାନ୍ୟତା ଦେବାକୁ ମନା କରି ଦେଇଛନ୍ତି।
