ନୂଆଦିଲ୍ଲୀ,୨୩/୦୧: ଭୟଙ୍କର ଭୂମିକମ୍ପରେ ଦୋହଲିଲା ଫିଲିପିନ୍ସ। ଆଜି ସକାଳେ ସେଣ୍ଟ୍ରାଲ ଫିଲିପିନ୍ସରେ ଦୁଇଥର ଭୂକମ୍ପ ଅନୁଭୂତ ହୋଇଛି।  ଯାହାର ରିକ୍ଟର ସ୍କେଲରେ ତୀବ୍ରତା ୫.୪ ଓ ୫.୯ ରେକର୍ଡ କରାଯାଇଛି।

ଭୂକମ୍ପ ଝଟ୍‌କା ଅନୁଭୂତ ହେବା ଲୋକେ ଭୟଭୀତ ହୋଇପଡିଛନ୍ତି। ଭୟରେ ଲୋକ ଘରୁ ବାହାରକୁ ବାହାରି ଆସିଛନ୍ତି। ତେବେ ଏଥିରେ କେହି ମୃତାହତ ହୋଇ ନଥିବା ସୂଚନା ମିଳିଛି। ଭୂମିକମ୍ପର କେନ୍ଦ୍ର ଭୂମି ଠାରୁ ୧୦ କିଲୋମିଟର ଗଭୀରରେ ଥିଲା ବୋଲି ଭୂ-ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ମିଳିଛି।  ଫିଲିପାଇନ୍ସର ଭୂକମ୍ପ ବିଜ୍ଞାନ ଏଜେନ୍ସି PHIVOLCS କହିଛି ଯେ, ଏହି ଭୂକମ୍ପରେ ବର୍ତ୍ତମାନ ଯାଏଁ କୌଣସି କ୍ଷୟକ୍ଷତି ହେବାର ଆଶଙ୍କା ନାହିଁ। ଡ଼େକନ ହେରାଲ଼୍ଡର ରିପୋର୍ଟ ଅନୁସାରେ , ଭୂକମ୍ପ ଝଟକାରେ ଫିଲିପିନ୍ସର ରାସ୍ତାରେ ଫାଟ ସୃଷ୍ଟି ହେବା ସହ ଅନେକ ଘରର କାନ୍ଥରେ ମଧ୍ୟ ଫାଟ ସୃଷ୍ଟି ହୋଇଥିବା ଜଣାପଡ଼ିଛି। ସାନ ଫ୍ରାନ୍‌ସିସ୍କୋ ପୋଲିସ୍ ମୁଖ୍ୟ ବାର୍ନି କ୍ୟାପିଙ୍ଗ୍ କହିଛନ୍ତି ଯେ, ଏହି ଭୂକମ୍ପ ଯଥେଷ୍ଟ ଶକ୍ତିଶାଳୀ ଥିଲା। କିନ୍ତୁ ଏଥିରେ କୌଣସି କ୍ଷୟକ୍ଷତି ହୋଇ ନାହିଁ। ଫିଲିପାଇନ୍ସରେ ଭୂକମ୍ପ ସାଧାରଣ, କାରଣ ଏହି ଦେଶ ପ୍ରଶାନ୍ତ ମହାସାଗରର 'ରିଙ୍ଗ ଅଫ୍ ଫାୟାର'ରେ ଅବସ୍ଥିତ।  ତେଣୁ ଫିଲିପାଇନ୍ସରେ ସବୁବେଳେ ଭୂକମ୍ପ ପାଇଁ ସତର୍କ କରାଯାଇଥାଏ।