ନ୍ୟୁୟର୍କ: ମହଙ୍ଗା ମାଡରେ ଆଉଠୁ ପାଉଟୁ ହେଉଛନ୍ତି ଆମେରିକାର ଜନତା। ଅବସ୍ଥା ଏମିତି ହେଲାଣି ଯେ ଲୋକମାନେ ସରକାର ବିରୋଧରେ ରାସ୍ତା ଉପରକୁ ଓହ୍ଲାଇବାକୁ ଆରମ୍ଭ କଲେଣି। ୱାଲମାର୍ଟଠୁ ଆରମ୍ଭ କରି ସ୍ଥାନୀୟ ବଜାର ଯାଏ ସବୁଠି ମହଙ୍ଗାମାଡର ପରିବେଶ। କ୍ଷୀରଠୁ ଆରମ୍ଭ କରି କଦଳୀ ଭଳି ନିତ୍ୟ ବ୍ୟବହାର୍ଯ୍ୟ ଦ୍ରବ୍ୟର ଦର ଆକାଶ ଛୁଇଁଲାଣି। ସୌଖିନ ଓ ଅନ୍ୟ ପଣ୍ୟ ସାମଗ୍ରୀ କଥା ନକହିବା ଭଲ। ବିଗତ ମାତ୍ର ତିନି ସପ୍ତାହ ଭିତରେ ଆମେରିକାର ବିଗ୍ ବଜାର କୁହାଯାଉଥିବା ୱାଲମାର୍ଟରେ ପାଚିଲା କଦଳିର ଦରରେ ୮ ପ୍ରତିଶତ ଅଭିବୃଦ୍ଧି ପରିଲକ୍ଷିତ ହେଲାଣି।
ଆପଣ ଜାଣି ଆଶ୍ଚର୍ଯ୍ୟ ହେବେ ଆମେରିକାରେ ରାଷ୍ଟ୍ରପତି ନିର୍ବାଚନ ସମୟରେ ନିଜ ନିର୍ବାଚନୀ ପ୍ରଚାରରେ ଡୋନାଲ୍ଡ ଟ୍ରମ୍ପ ଦେଶରେ ବଢୁଥିବା ମୁଦ୍ରାସ୍ପିତି ଉପରେ ରୋକ ଲଗାଇବାକୁ ନେଇ ଜୋର ଦେଇଥିଲେ। ଯେତେବେଳେ ମୁଁ ଜିତିବି, ସେତେବେଳେ ପ୍ରଥମ ଦିନରୁ ହିଁ ମହଙ୍ଗାମାଡ ଉପରେ କାମ କରିବା ଆରମ୍ଭ କରିବି ବୋଲି ଟ୍ରମ୍ପ ନିଜର ପ୍ରିତିଟି ଭାଷଣରେ ମତ ରଖୁଥିଲେ। ଏମିତିକି ସେ "ମେକ୍ ଆମେରିକା ଆଫୋର୍ଡେବଲ ଏଗେନ" ବୋଲି ଏକ ନାରା ମଧ୍ୟ ଦେଇଥିଲେ।
କିନ୍ତୁ ଟ୍ରମ୍ପ ଜାନୁଆରି ମାସରେ ନିକର ଦ୍ୱିତୀୟ ପାଳି ଆରମ୍ଭ କରିବା ପରେ ସ୍ଥିତି ଆହୁରି ଜଟିଳ ହେବାରେ ଲାଗିଛି। ନିକଟରେ ଆମେରିକାର ବିଭନ୍ନ ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଦେଶର ଅସଲ ଚିତ୍ରକୁ ସମସ୍ତଙ୍କ ସାମ୍ନାକୁ ଆଣିଛି। ମିଳିଥିବା ଅର୍ଥନୈତିକ ଡାଟା ଓ ବିଶେଷଜ୍ଞମାନଙ୍କ ବିଶ୍ଲେଷଣ ମୁତାବକ ଆମେରିକାର ଖାଉଟି ଉପଭୋକ୍ତା ମାନଙ୍କ ଉପରେ ମହଙ୍ଗା ମାଡ ବୃଦ୍ଧି ପାଇବାରେ ଲାଗିଛି। ଖାସ୍ କରି ରାସନ ସାମଗ୍ରୀ କ୍ରୟ ଓ ଇଲେକ୍ଟ୍ରିସିଟି ବ୍ୟବହାର ଦିଗରେ ଆମେରିକାର ଉପଭୋକ୍ତାମାନଙ୍କୁ ଅଧିକ ଖର୍ଚ୍ଚ କରବାକୁ ପଡୁଛି। ବିଭିନ୍ନ ସରକାରୀ ପଲିସି ଯେପରିକି ଆମଦାନୀ ଉପରେ ଟାରିଫ ବୃଦ୍ଧି ଓ ୱାନ ବିଗ ବିଉଟିଫୁଲ ବିଲ ଆକ୍ଟ ଆମେରିକାରେ ବିଭିନ୍ନ ଦର ବୃଦ୍ଧି ହେବାର ପ୍ରମୁଖ କାରଣ ବୋଲି ବିଶେଷଜ୍ଞମାନେ ମତ୍ତ ପ୍ରକାଶ କରିଛନ୍ତି।
ଆଉ ଖାସ୍ ଏଇଥିପାଇଁ ଆମେରିକାର ଅନେକ ଅର୍ଥନୀତିଜ୍ଞମାନେ ଟ୍ରମ୍ପ ପ୍ରଶାସନକୁ ଏନେଇ ସତର୍କ ମଧ୍ୟ କରିସାରିଲେଣି। ଯଦି ଟ୍ରମ୍ପ ନିଜର ଟାରିଫ୍ ନୀତିକୁ କୋହଳ ନକରିନ୍ତି ତେବେ ଆମେରିକା ଉପଭୋକ୍ତା ମାନଙ୍କୁ ପ୍ରତିଦିନ ପ୍ରାୟ ଅତିରିକ୍ତ ୮୦୦ ମିଲିଅନ ଡଲାରରୁ ଅଧିକ ଟଙ୍କା ଖର୍ଚ୍ଚ କରିବାକୁ ପଡିବ ବୋଲି ଅନୁମାନ କରାଯାଉଛି। ଏହାସହ ଆମେରିକାକୁ ଆମଦାନୀ ହେଉଥିବା ଅନେକ ସାମଗ୍ରୀରେ ଅଭାବ ପରିଲକ୍ଷିତ ହେବ ଯାହା ଆମେରିକା ଅର୍ଥନୀତି ପାଇଁ ଆଦୌ ଶୁଭଙ୍କର ନୁହେଁ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
ଏହାର ପୂର୍ବାଭାସ ମିଳିବା ଆରମ୍ଭ ହୋଇଗଲାଣି। ଟ୍ରମ୍ପଙ୍କ ମିନିମିସ ମୋଭ ପରେ ଭାରତର ପୋଷ୍ଟାଲ ସେବା ସହ ବିଶ୍ୱର ୨୫ଟି କୋରିଅର ସେବା ପ୍ରଦାନକାରୀ ସଂସ୍ଥା ଆମେରିକାରେ ନିଜ ସେବା ଦେବା ବନ୍ଦ କରିଥିଲେ। ଯାହାଫଳରେ ଆମେରିକାରେ ବିଭିନ୍ନ ଭାରତୀୟ ଓ ୟୁରୋପୀୟ ସାମଗ୍ରୀର ଦର ଆକାଶଛୁଆଁ ହେବାରେ ଲାଗିଛି। କାରଣ ରପ୍ତାନୀକାରି ମାନେ କୋରିଅର ସେବା ପାଉନତିବାରୁ ନିଜ ସାମଗ୍ରୀ ରପ୍ତାନୀ ପାଇଁ ଜାହାଜର ବ୍ୟବହାର କରୁଛନ୍ତି। ଯାହା ରପ୍ତାନୀ ଦରକୁ ବୃଦ୍ଧି କରିବା ସହ ପଣ୍ୟ ଦ୍ରବ୍ୟର ଦରରେ ମଧ୍ୟ ବୃଦ୍ଧି ଘଟାଉଛି।
ସମ୍ପ୍ରତ୍ତି ରାସନ ବା କିରାଣା ସାମଗ୍ରୀର ଦର ଆମେରିକା ଉପଭୋକ୍ତା ମାନଙ୍କ ପାଇଁ ଚିନ୍ତାର କାରଣ ପାଲଟିଛି। କାରଣ ଆମେରିକାରେ କିରାଣା ସାମଗ୍ରୀର ମୁଦ୍ରାସ୍ପିତି ୨.୯% ଭିତରେ ସ୍ଥିର ରହୁଥିବା ବେଳେ ଏହା ବର୍ତ୍ତମାନ ୩.୪%ରେ ପହଞ୍ଚିଛି। ଯାହା ବିଗତ ୨୦ ବର୍ଷ ମଧ୍ୟରେ ସର୍ବାଧିକ। ନିକଟରେ ହୋଇଥିବା ସର୍ଭେରୁ ଜଣାପଡିଛି ଯେ ୫୩% ଆମେରିକୀୟ ଏହି ବର୍ଦ୍ଧିତ ଦରକୁ ନେଇ ଚିନ୍ତା ପ୍ରକାଶ କରିଛନ୍ତି। ସେହିଭଳି ୩୩% ଆମେରିକୀୟ ଏହାକୁ ନେଇ ସାମାନ୍ୟ ଚିନ୍ତିତ ଥିବା ବେଳେ ୧୪% ଆମେରିକୀୟ ଏଥି ନିମନ୍ତେ ଅଧିକ ଭାବିବାର ଆବଶ୍ୟକତା ନାହିଁ ବୋଲି ସୂଚନା ଦେଇଛନ୍ତି।
ଟ୍ରମ୍ପ ଆମେରିକାର ସବୁଠୁ ବଡ ପଣ୍ୟ ରପ୍ତାନିକାରୀ ଦେଶ ମେକ୍ସିକୋ ଓ କାନାଡା ଉପରେ ୪୪% ଟାରିଫ ଲଗାଇଛନ୍ତି। ଯାହାଫଳରେ ଅଣ୍ଡାଠୁ ଆରମ୍ଭ କରି ବିଫ୍ ପର୍ଯ୍ୟନ୍ତି ସମସ୍ତ ସାମଗ୍ରୀ ଲୋକମାନଙ୍କୁ ମହଙ୍ଗା ଦରରେ କିଣିବାକୁ ପଡୁଛି। ଏହାଛଡା ଚାଇନା, ଭିଏତନାମ, ଭାରତ, ଇଣ୍ଡୋନେସିଆ, ଭିଏତନାମ ଓ ଇକ୍ୱାଡୋର ଉପରେ ଭାରି ଟାରିଫ କାରଣରୁ ଆମେରିକାର ପ୍ରାୟ ସମସ୍ତ ସାମଗ୍ରୀ ଉପରେ ଲୋକଙ୍କୁ ଅଧିକ ଟଙ୍କା ଗଣିବାକୁ ପଡୁଛି।
ଲୋକଙ୍କୁ ଆମେରିକା ବଜାରକୁ ଶସ୍ତା କରିବାକୁ ସ୍ୱପ୍ନ ଦେଖାଇ ସରକାରକୁ ଆସିଥିବା ଟ୍ରମ୍ପ ସରକାର ବର୍ତ୍ତମାନ ଆମେରିକାର ସାଧାରଣ ଜନତାଙ୍କ ପାଇଁ ଏକ ଭୟଙ୍କର ସ୍ୱପ୍ନ ସାବ୍ୟସ୍ତ ହୋଇଛି। ନିଜ ଦ୍ୱିତୀୟ ପାଳିରେ ସେ ଆମେରିକା ଉପରେ ତିନିଗୁଣରୁ ଅଧିକ ମହଙ୍ଗାମାଡ ବୃଦ୍ଧି କରିବାରେ ସହାୟକ ହୋଇଛନ୍ତି। ଏହାସହ ସେ ଆମେରିକାକୁ ପୁଣିଥରେ ଅନଆପର୍ଡେବଲ ବନେଇବାର ସହଯୋଗ କରିଚାଲିଛନ୍ତି।
