ନୂଆଦିଲ୍ଲୀ, ୨୧/୦୬: ମଧ୍ୟ-ପ୍ରାଚ୍ୟ ସଙ୍କଟରେ ଫସିଥିବା ଇରାନର ଇସ୍ଲାମିକ ଶାସନ ଆମେରିକୀୟ ଚାପ ଓ ଇସ୍ରାଏଲ ମିସାଇଲ ଆଗରେ ମୁଣ୍ଡ ନ ନୁଆଇଁବାକୁ ଶପଥ ନେଇଛି । ତେବେ ଖୁବ୍ କମ୍ ଜାଣନ୍ତି ଯେ ଏହି ଶାସନର ସଂସ୍ଥାପକ ତେହରାନର ଉଚ୍ଚ-ପଦସ୍ଥ ମୌଲବୀଙ୍କ ମୂଳ ଭାରତର ଏକ ଅଖ୍ୟାତ ପଲ୍ଲୀ ସହ ଜଡ଼ିତ । ଆୟାତୋଲ୍ଲା ରୁହୋଲ୍ଲା ମୁସାଭି ଖୋମେନେଇ ଇରାନରେ ଇସ୍ଲାମିକ ବିପ୍ଳବର ନେତୃତ୍ୱ ନେଇଥିଲେ ଏବଂ ୧୯୭୯ ମସିହାରେ ଏହାର ପ୍ରଥମ ସର୍ବୋଚ୍ଚ ମୁଖ୍ୟ ହୋଇଥିଲେ । ତାଙ୍କ ଜେଜେବାପା ସୟେଦ ଅହମଦ ମୁସାଭି ଊନବିଂଶ ଶତାବ୍ଦୀ ପ୍ରାରମ୍ଭରେ ବାରାବାଙ୍କୀ ନିକଟସ୍ଥ କିନ୍ତୂର ଗାଁରେ ଜନ୍ମଗ୍ରହଣ କରିଥିଲେ । କିନ୍ତୂର ଶିୟା ଛାତ୍ରବୃତ୍ତିର ଏକ କେନ୍ଦ୍ର ରହିଛି ।
ପରେ ସେ ଇରାକର ନଜାଫକୁ ଚାଲିଗଲେ ଏବଂ ୧୮୩୪ ମସିହାରେ ଇରାନର ଖୋମେନ ସହରରେ ସ୍ଥାୟୀ ଭାବେ ରହିଲେ । ସେଠାରେ ଧାର୍ମିକ ଓ ରାଜନୈତିକ ଶକ୍ତି ପାଇଁ ତାଙ୍କ ପରିବାରର କ୍ଷୁଧା ଆରମ୍ଭ ହେଲା । ମୁସାଭି ନିଜର ‘ହିନ୍ଦୀ’ ଟାଇଟଲକୁ ବଜାୟ ରଖିଲେ, ଯାହା ଇରାନୀ ରେକର୍ଡରେ ବି ରହିଛି ଏବଂ ତାଙ୍କ ବଂଶର ପ୍ରମାଣ ମଧ୍ୟ ଦିଏ । ମୁସାଭି ହିଁ ଖୋମେନେଇର ଆଧ୍ୟାତ୍ମିକତାରେ ରୁଚି ପଛରେ ପ୍ରେରକ ଶକ୍ତି ଥିଲେ ବୋଲି ବିଶ୍ୱାସ କରାଯାଏ, ଯାହା ଗୋଟିଏ ଶତାବ୍ଦୀ ପରେ ଇରାନର ରାଜନୀତିକୁ ବଦଳାଇ ଦେଲା । ଆୟାତୋଲ୍ଲା ଖୋମେନେଇ ଇରାନର ଇସ୍ଲାମିକ ବିପ୍ଳବର ମୁଖିଆ ଥିଲେ । ସେ ୧୯୭୯ରେ ଇରାନର ପ୍ରୋ-ୱେଷ୍ଟର୍ନ ପୂର୍ବତନ ସମର୍ଥକ ଶାହ ମହମ୍ମଦ ରେଜା ପହଲାଭିଙ୍କୁ ପଦଚ୍ୟୁତ କରିଥିଲେ ଏବଂ ଇରାନର ଇସ୍ଲାମିକ ଗଣରାଜ୍ୟ ପ୍ରତିଷ୍ଠା କରିଥିଲେ ।
ତା’ପରେ ସେ ଇରାନର ପ୍ରଥମ ସର୍ବୋଚ୍ଚ ନେତା ହେଲେ । ଖୋମେନେଇଙ୍କୁ ଜଣେ ନମ୍ର ନେତା କୁହାଯାଏ । ଇରାନରେ ସର୍ବୋଚ୍ଚ ରାଜନୈତିକ ଓ ଧାର୍ମିକ ସ୍ଥିତିରେ ପହଞ୍ଚି ମଧ୍ୟ ସେ ତେହରାନରେ ଏକ ମହଲାଯୁକ୍ତ ଘରେ ରହୁଥିଲେ । ଏହି ଘରକୁ ସୟିଦ ମାହଦି ଇମାମ ଜମାହ ତାଙ୍କୁ ମାଗଣାରେ ପ୍ରଦାନ କରିଥିଲେ । ସେ କିନ୍ତୁ ଜମାହଙ୍କୁ ୧ ହଜାର ରିୟାଲ ଦେଇଥିଲେ । ତାଙ୍କ ଘର ତାଙ୍କର ନମ୍ର ବ୍ୟକ୍ତିତ୍ୱର ଉଦାହରଣ ଦିଏ । ସମର୍ଥକମାନେ ତାଙ୍କ ଘର କାନ୍ଥରେ ଟାଇଲ ଲଗାଇବାକୁ ଅଫର୍ କରିଥିଲେ । କିନ୍ତୁ ସେ ନିଜର ବିଳାସ ପାଇଁ ଲୋକଙ୍କ ଟଙ୍କା ନେବାକୁ ମନା କରିଥିଲେ । ଖୋମନେଇଙ୍କ ଉତ୍ତରାଧିକାରୀ ଅଲି ଖାମେନେଇ ଏବେ ଇରାନର ଶୀର୍ଷ ନେତୃତ୍ୱ ନେଉଛନ୍ତି । ଗତ ବୁଧବାର ଟେଲିଭିଜନ୍ରେ ସେ ଘୋଷଣା କରିଥିଲେ, ଆମେରିକାର ଚାପ ଓ ଇସ୍ରାଏଲର ମିସାଇଲ ଆକ୍ରମଣ ସତ୍ତେ୍ୱ ତେହରାନ ମୁଣ୍ଡ ନୁଆଁଇବ ନାହିଁ । ଯୁଦ୍ଧଗ୍ରସ୍ତ ମଧ୍ୟପ୍ରାଚ୍ୟରେ ଲଗାତାର ୭ମ ଦିନ ପାଇଁ ଇରାନ ଓ ଇସ୍ରାଏଲ ମଧ୍ୟରେ ମିସାଇଲ ଯୁଦ୍ଧ ଜାରି ରହିଥିବାବେଳେ ସେ ଏହି ବୟାନ ଦେଇଥିଲେ ।
