ମାଲକାନଗିରି/ମାଥିଲି,୭/୧୧ : ମାଥିଲି ବନାଞ୍ଚଳ ପକ୍ଷରୁ ବିଭିନ୍ନ ଗାଁରେ ଚଢଉ କରାଯାଇ ଲକ୍ଷାଧିକ ଟଙ୍କାର ମୂଲ୍ୟବାନ କାଠ ପଟା ଜବତ କରାଯାଇଛି । ମାଲକାନଗିରି ବନଖଣ୍ଡ ଅଧିକାରୀ ପ୍ରତାପ କୋଟାପଲ୍ଲୀଙ୍କ ନିର୍ଦ୍ଦେଶକ୍ରମେ ମାଥିଲି ବନାଞ୍ଚଳ ଅଧିକାରୀ ବାସୁଦେବ ନାୟକଙ୍କ ନେତୃତ୍ୱରେ ଗୋବିନ୍ଦପାଲ୍ଲୀ ନିକଟରେ ଥିବା କାନ୍ଦୁଗୁଡା ଗ୍ରାମର ଦୁଇଟି ସ୍ଥାନରେ ଚଢଉ କରି ୧ ଲକ୍ଷରୁ ଊର୍ଦ୍ଧ୍ବ ଟଙ୍କାର ଶାଳ ଓ ପିଆଶାଳ କାଠ ଜବତ କରାଯାଇଛି ।
ସୂଚନା ଅନୁଯାୟୀ ଏକ ବିଶ୍ୱସ୍ତ ସୂତ୍ରରୁ ଖବରପାଇ ମାଥିଲି ବନ କର୍ମଚାରୀମାନେ କାନ୍ଦୁଗୁଡା ଗାଁରେ ପହଞ୍ଚିଥିଲେ। ସେଠାରେ ରାମ ଆନମାଳିଆ ଘର ନିକଟରୁ ପଟା ଓ ସାଇଜ କାଠ ମିଶି ମୋଟ ୫୨ଖଣ୍ଡ କାଠ ଜବତ କରାଯାଇଥିଲା। ଏହି ସମୟରେ ରାମ ଆନମାଳିଆ ଅନୁପସ୍ଥିତ ରହିଥିଲେ। ସେହିପରି ତୁଳସୀ ଅନମାଳିଆଙ୍କ ଏକ ଅର୍ଦ୍ଧ ନିର୍ମିତ ଘରୁ ୩୫ଖଣ୍ଡ ପଟ୍ଟା ଓ କାଠ ଜବତ ହୋଇଥିଲା । ଚଢଉ ସମୟରେ ସେ ମଧ୍ୟ ଅନୁପସ୍ଥିତ ରହିଥିବା ଜଣାପଡିଛି । ବନ କର୍ମଚାରୀମାନେ ସମସ୍ତ କାଠ ସହ ଅନେକ କାଠ କାଟିବା ସରଞ୍ଜାମ ମଧ୍ୟ ଘଟଣାସ୍ଥଳରୁ ଜବତ କରିଥିଲେ । ରାମ ଆନମାଳିଆ ଏବଂ ତୁଳସୀ ଆନମାଳିଆ ନାମରେ ପୃଥକ ପୃଥକ ଭାବେ ଦୁଇଟି ମାମଲା ରୁଜୁ କରାଯାଇଛି । ଏହି ଚଢଉରେ ବନପାଳ ପବିତ୍ର ଦାସ, ମୂରଲୀ ମହାରଣା, ସମରା ଖରା, ଏ.ପିଙ୍କି ରାଓ, ଋଷିକେଶ ପାଣିଗ୍ରାହୀ, ବନରକ୍ଷୀ ଜଗବନ୍ଧୁ ପାତ୍ର, ଅର୍ଜୁନ ବଟେ, ଦିଲ୍ଲୀପ ଡାକୁଆ, ସୁବ୍ରତ ପରିଡ଼ା, ଦିପ୍ତିରଞ୍ଜନ ନାୟକ, ସୁଶାନୁ ସ୍ବାଇଁ, ପାରା ପ୍ଲୁଆର୍ଡ ଏବଂ ୱାଇଲ୍ଡ ଲାଇଫ ସ୍କ୍ବାର୍ଡ ଯୋଗଦେଇଥିଲେ।
