ନୂଆଦିଲ୍ଲୀ: କଂଗ୍ରେସ କାର୍ଯ୍ୟକାରିଣୀ କମିଟି (CWC) ଏପ୍ରିଲ ୨୨ ରେ ପହଲଗାମରେ ହୋଇଥିବା ବର୍ବର ଆତଙ୍କବାଦୀ ଆକ୍ରମଣ ସମ୍ପର୍କରେ ଶୁକ୍ରବାର ଏକ ପ୍ରସ୍ତାବ ପାରିତ କରିଛି । କଂଗ୍ରେସ ଏଥିରେ କହିଛି ଯେ, ପହଲଗାମରେ ହୋଇଥିବା ବର୍ବର ଆତଙ୍କବାଦୀ ଆକ୍ରମଣରେ ସେମାନଙ୍କ ପ୍ରିୟଜନଙ୍କୁ ହରାଇଥିବା ୨୬ ପରିବାରଙ୍କ ପାଇଁ ଦଳ ଏକତା ଏବଂ ସମବେଦନା ପ୍ରକାଶ କରୁଛି । ଏହି ପରିବାରର ଯନ୍ତ୍ରଣା ସମଗ୍ର ଦେଶର ଯନ୍ତ୍ରଣା । ଆଜି ସାରା ଦେଶ ଦାୟିତ୍ୱ, ସ୍ପଷ୍ଟତା ଏବଂ ନ୍ୟାୟ ପାଇଁ ଅପେକ୍ଷା କରିଛି। ଏହି ଆକ୍ରମଣ ପରେ ଭାରତୀୟ ଜାତୀୟ କଂଗ୍ରେସ ବିଶ୍ୱାସ କରେ ଯେ, ଏହା ରାଜନୀତି କରିବାର ସମୟ ନୁହେଁ । ଏହା ଏପରି ଏକ ମୁହୂର୍ତ୍ତ ଯେତେବେଳେ ଦେଶକୁ ଏକତା, ଦୃଢ଼ତା ଏବଂ ଜାତୀୟ ସଂକଳ୍ପ ଦେଖାଇବାକୁ ପଡିବ । 

ଆମକୁ ରାଜନୈତିକ ମତଭେଦରୁ ଉପରକୁ ଉଠି ଏକ ସ୍ପଷ୍ଟ ବାର୍ତ୍ତା ଦେବାକୁ ପଡିବ ଯେ, ଭାରତର ଏକତାକୁ କୌଣସି ପରିସ୍ଥିତିରେ ଦୁର୍ବଳ କରାଯାଇପାରିବ ନାହିଁ। କଂଗ୍ରେସ ଆହୁରି କହିଛି ଯେ, ଏହା ଆମର ଜାତୀୟ ସଂକଳ୍ପ ଦେଖାଇବାର ସମୟ, ଯାହା ଦ୍ଵାରା ଆମେ ପାକିସ୍ତାନକୁ ଶିକ୍ଷା ଦେଇପାରିବା ଏବଂ ଆତଙ୍କବାଦକୁ ନିର୍ଣ୍ଣାୟକ ଭାବରେ ଦମନ କରିପାରିବା। ଏହି କାପୁରୁଷ ଆକ୍ରମଣର ଅପରାଧୀମାନଙ୍କୁ ସେମାନଙ୍କର କାର୍ଯ୍ୟର ସମ୍ପୂର୍ଣ୍ଣ ପରିଣାମ ଭୋଗ କରିବାକୁ ପଡିବ । ଆମ ଦେଶରେ ଆତଙ୍କବାଦ ପ୍ରସାର କରିବାକୁ ପ୍ରୟାସ କରୁଥିବା ପାକିସ୍ତାନକୁ ବିଶ୍ୱ ସ୍ତରରେ ଏକାକୀ କରିବା ଏବଂ ଦଣ୍ଡ ଦେବା ପାଇଁ କଂଗ୍ରେସ ଦଳ ଭାରତ ସରକାରଙ୍କୁ ଶକ୍ତି, ରଣନୈତିକ ସ୍ପଷ୍ଟତା ଏବଂ ଅନ୍ତର୍ଜାତୀୟ ସମନ୍ୱୟ ସହିତ କାର୍ଯ୍ୟ କରିବାକୁ ଅନୁରୋଧ କରୁଛି । 

କଂଗ୍ରେସ ସରକାରଙ୍କ ନିକଟରେ ଆହୁରି ଦାବି କରିଛି ଯେ, ପୀଡିତ ପରିବାରକୁ ଦୀର୍ଘକାଳୀନ ନୈତିକ ଏବଂ ସାଂଗଠନିକ ସହାୟତା ଦିଆଯିବା ଉଚିତ । କେବଳ କ୍ଷତିପୂରଣ ଯଥେଷ୍ଟ ନୁହେଁ, ଦୀର୍ଘକାଳୀନ ପୁନର୍ବାସ, ମାନସିକ ସ୍ୱାସ୍ଥ୍ୟ ସହାୟତା ଏବଂ ଜାତୀୟ ସ୍ତରରେ ସମ୍ମାନ ଏବଂ ନାଗରିକ ସ୍ମୃତି ମାଧ୍ୟମରେ ସହିଦଙ୍କ ସ୍ମୃତିକୁ ଜୀବିତ ରଖିବା ମଧ୍ୟ ସମାନ ଭାବରେ ଜରୁରୀ । ସରକାରଙ୍କୁ ଆହୁରି ପ୍ରଶ୍ନ କରି କଂଗ୍ରେସ କହିଛି ଯେ, ଦେଶର ଏକ ଅତ୍ୟନ୍ତ ସୁରକ୍ଷିତ ଅଞ୍ଚଳରେ ଘଟିଥିବା ଏହି ଘଟଣାକୁ CWC ସୁରକ୍ଷାରେ ଏକ ଗୁରୁତର ତ୍ରୁଟି ବୋଲି ବିବେଚନା କରେ ଏବଂ ସମୟୋଚିତ ଓ  ସ୍ପଷ୍ଟ ଦାୟିତ୍ୱ ପାଇଁ ପୂର୍ବ ଦାବିକୁ ଦୋହରାଉଛି । କମିଟି ସମସ୍ତ ନାଗରିକଙ୍କୁ ଶାନ୍ତି, ଏକତା ଏବଂ ସଂକଳ୍ପ ବଜାୟ ରଖିବାକୁ ନିବେଦନ କରିଛି କଂଗ୍ରେସର କାର୍ଯ୍ୟକାରିଣୀ କମିଟି ।