ନୂଆଦିଲ୍ଲୀ : ପଶ୍ଚିମବଙ୍ଗ ବିଧାନସଭା ନିର୍ବାଚନ-୨୦୨୬ରେ ବିଜେପି ଐତିହାସିକ ବିଜୟ ଆଡ଼କୁ ବଢୁଛି। ଏହି ମଧ୍ୟରେ, ପୂରା ରାଜ୍ୟରେ ତୃଣମୂଳ କଂଗ୍ରେସର କାର୍ଯ୍ୟାଳୟରେ ଭଙ୍ଗାରୁଜା ଓ ସେଠାରେ ଲାଗି ଥିବା ଫ୍ଲେକ୍ସ ବୋର୍ଡ, ବ୍ୟାନର ଓ ପତାକାକୁ ଚିରା ଯିବାର ଘଟଣା ସାମ୍ନାକୁ ଆସିଛି। ହେଲେ, ବିଜେପି ଏହି ଘଟଣାରେ କୌଣସି ପ୍ରକାରର ସାମିଲ ହେବାକୁ ମନା କରିଛି। ଟିଏମସି ଦାବି କରିଛନ୍ତି ଯେ, ନିର୍ବାଚନ ଟ୍ରେଣ୍ଡ ସ୍ପଷ୍ଟ ହେବାର କିଛି ଘଣ୍ଟା ପରେ ଦକ୍ଷିଣ ୨୪ ପରଗନାର ବରୁଇପୁର, କୁଚ ବିହାରର ତୁଫାନଗଞ୍ଜ ଓ ଉତ୍ତର ୨୪ ପରଗନାର ପାନିହାଟି ସ୍ଥିତ ଏହାର କାର୍ଯ୍ୟାଳୟ ବାହାରେ ଉପଦ୍ରବୀ ଜମା ହୋଇ ସେଠାରେ ଭଙ୍ଗାରୁଜା କରୁଛନ୍ତି।
ବରୁଇପୁରରେ ସ୍ଥାନୀୟ ତୃଣମୂଳ କଂଗ୍ରେସ (TMC) ନେତା ଅଭିଯୋଗ କରିଛନ୍ତି ଯେ, କିଛି ଦୁର୍ବୃତ୍ତ ଦଳୀୟ କାର୍ଯ୍ୟାଳୟରେ ଲାଗିଥିବା ଫ୍ଲେକ୍ସ ବୋର୍ଡ ଏବଂ ବ୍ୟାନରଗୁଡ଼ିକୁ ଚିରି ପକାଇଛନ୍ତି। ସେମାନେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କ ଫଟୋକୁ ତଳେ ଫିଙ୍ଗି ଦେଇଥିବା ଅଭିଯୋଗ ହୋଇଛି। ବରିଷ୍ଠ ପୁଲିସ ଅଧିକାରୀଙ୍କ ସୂଚନା ଅନୁଯାୟୀ, ସମ୍ପୃକ୍ତ ଅଞ୍ଚଳରେ ସୁରକ୍ଷା ବଳ ମୁତୟନ କରାଯାଇଛି ଏବଂ କାର୍ଯ୍ୟାଳୟ ବାହାରେ ଜମା ହୋଇଥିବା ଭିଡ଼କୁ ହଟାଇ ଦିଆ ଯାଇଛି। ସେହିପରି ପଶ୍ଚିମ ବର୍ଦ୍ଧମାନ ଜିଲ୍ଲାର ଜମୁରିଆରେ ଅଜ୍ଞାତ ବ୍ୟକ୍ତିମାନେ ଟିଏମସି କାର୍ଯ୍ୟାଳୟରେ ନିଆଁ ଲଗାଇ ଦେଇଛନ୍ତି।
ତୃଣମୂଳ କଂଗ୍ରେସର ଜଣେ ନେତାଙ୍କ କହିବା ଅନୁଯାୟୀ, ଆସାନସୋଲରେ ମଧ୍ୟ ଦଳୀୟ କାର୍ଯ୍ୟାଳୟରେ ଭଙ୍ଗାରୁଜା କରାଯାଇଛି ଏବଂ ଏହି ଘଟଣା ପଛରେ ବିଜେପି ସମର୍ଥକଙ୍କ ହାତ ରହିଛି। ପାନିହାଟିରେ ଟିଏମସି ନେତାମାନେ ଅଭିଯୋଗ କରିଛନ୍ତି ଯେ, ସେମାନଙ୍କ କାର୍ଯ୍ୟାଳୟକୁ ଦଖଲ କରି ନିଆ ଯାଇଛି ଏବଂ ସେଠାରେ ଥିବା ଦଳୀୟ ପତାକା ଓ ସାଇନବୋର୍ଡ ହଟାଇ ଗେରୁଆ ପତାକା ଓ ପଦ୍ମ ଚିହ୍ନ ଲଗାଇ ଦିଆ ଯାଇଛି। ଅନ୍ୟପଟେ, ଉତ୍ତର ୨୪ ପରଗନାର ନୋଆପଡ଼ାରୁ ଟିଏମସି ପ୍ରାର୍ଥୀ ତ୍ରିନାଙ୍କୁର ଭଟ୍ଟାଚାର୍ଯ୍ୟ ବାରାକପୁରର ଏକ ଭୋଟ ଗଣତି କେନ୍ଦ୍ରରୁ ବାହାରୁ ଥିବା ସମୟରେ ବିଜେପି ସମର୍ଥକଙ୍କ ଦ୍ୱାରା ମାଡ଼ର ଶିକାର ହୋଇଛନ୍ତି। ତେବେ ବିଜେପି ନେତା ଅର୍ଜୁନ ସିଂହ ଏହି ଅଭିଯୋଗକୁ ଖଣ୍ଡନ କରି କହିଛନ୍ତି ଯେ, ଏହିସବୁ ଘଟଣା ଟିଏମସିର ଆଭ୍ୟନ୍ତରୀଣ କନ୍ଦଳର ପରିଣାମ।
ପୁଲିସ ବିରୋଧରେ ନିଷ୍କ୍ରିୟତାର ଅଭିଯୋଗ
ଟିଏମସି ନେତାମାନେ ଅଭିଯୋଗ କରିଛନ୍ତି ଯେ, ପୁଲିସର ନିଷ୍କ୍ରିୟତା କାରଣରୁ ବିଜେପି ସଂରକ୍ଷିତ ଅସାମାଜିକ ତତ୍ତ୍ୱମାନେ ଦଳୀୟ କର୍ମୀଙ୍କ ଉପରେ ଯୋଜନାବଦ୍ଧ ଭାବେ ଆକ୍ରମଣ କରୁଛନ୍ତି। ଜଣେ ପୁଲିସ ଅଧିକାରୀ କହିଛନ୍ତି ଯେ, ଗଣତି କେନ୍ଦ୍ରରୁ ବାହାରିବା ସମୟରେ ତ୍ରିନାଙ୍କୁର ଭଟ୍ଟାଚାର୍ଯ୍ୟଙ୍କର ବିଜେପି କର୍ମୀଙ୍କ ସହ ଝଗଡ଼ା ହୋଇଥିଲା, ଯାହା ପରେ ତାଙ୍କୁ ମାଡ଼ ମରାଯାଇ ଥିଲା। କେନ୍ଦ୍ରୀୟ ସୁରକ୍ଷା ବଳ ଏବଂ ସେଠାରେ ଉପସ୍ଥିତ ଅନ୍ୟମାନେ ତାଙ୍କୁ ସୁରକ୍ଷିତ ଭାବେ ଉଦ୍ଧାର କରି ଥିଲେ। ନିର୍ବାଚନ କମିଶନଙ୍କ ଅଧିକାରୀ କହିଛନ୍ତି ଯେ, ଶାନ୍ତି ବଜାୟ ରଖିବା ଏବଂ କୌଣସି ବି ଦଳର ପ୍ରାର୍ଥୀ କିମ୍ବା ସମର୍ଥକଙ୍କ ଉପରେ ଆକ୍ରମଣ ରୋକିବା ପାଇଁ ପୁଲିସ ଓ ସୁରକ୍ଷା ବଳକୁ କଡ଼ା ନିର୍ଦ୍ଦେଶ ଦିଆ ଯାଇଛି।
