ନୂଆଦିଲ୍ଲୀ,୨୮/୦୨: ମାର୍ଚ୍ଚ ପହିଲାରୁ ହେବାକୁ ଯାଉଛି ବଡ଼ ପରିବର୍ତ୍ତନ। ଯାହା ସାଧାରଣ ଲୋକଙ୍କ ଜୀବନଶୈଳୀ ଉପରେ ପ୍ରଭାବ ପକାଇପାରେ । ମାର୍ଚ୍ଚ ୨୦୨୬ରେ ଅନେକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ମଧ୍ୟ ଘଟୁଛି । ଯେଉଁଥିରେ LPG ଗ୍ୟାସ ଠାରୁ ଆରମ୍ଭ କରି SIM କାର୍ଡ ଏବଂ ରେଳ ଟିକେଟ ନିୟମ ଅନ୍ତର୍ଭୁକ୍ତ। ତେବେ ମାର୍ଚ୍ଚ ୧ ତାରିଖରୁ କ'ଣ ସବୁ ପରିବର୍ତ୍ତନ ହେବାର ସମ୍ଭାବନା ରହିଛି ଆସନ୍ତୁ ଜାଣିବା..
ମେସେଜିଂ ଆପ୍ ପାଇଁ ସିମ୍ ବାଧ୍ୟତାମୂଳକ: ଡିଜିଟାଲ୍ ଫ୍ରଡ୍ ରୋକିବା ପାଇଁ ସରକାର ସିମ୍-ବାଇଣ୍ଡିଂ ବ୍ୟବସ୍ଥାକୁ କଡ଼ାକଡ଼ି କରିପାରନ୍ତି । ଏହା ଅଧୀନରେ, ହ୍ୱାଟ୍ସଆପ୍, ଟେଲିଗ୍ରାମ୍ ଏବଂ ସିଗନାଲ୍ ଭଳି ମେସେଜିଂ ଆପ୍ କେବଳ ସିମ୍ କାର୍ଡ ସକ୍ରିୟ ଥିଲେ ହିଁ ଚାଲିପାରିବ । ଯଦି ମୋବାଇଲରୁ ସିମ୍ କାଢ଼ି ଦିଆଯାଏ କିମ୍ବା ନମ୍ବର ନିଷ୍କ୍ରିୟ ହୋଇଯାଏ, ତେବେ ଏହି ଆପ୍ର ବ୍ୟବହାର ପ୍ରଭାବିତ ହୋଇପାରେ । ଗତ କିଛି ବର୍ଷ ମଧ୍ୟରେ, ସିମ୍ ସ୍ୱାପ୍ ଏବଂ ନକଲି ପଞ୍ଜିକରଣ ମାମଲାରେ ବୃଦ୍ଧି ପାଇଛି, ଯାହାକୁ ରୋକିବା ପାଇଁ ଏହି ପଦକ୍ଷେପ ନିଆଯାଉଛି । ତେଣୁ ସିମ୍ ସକ୍ରିୟ ରଖିବା ସହ ସମୟ ସମୟରେ KYC ଅପଡେଟ୍ କରିବା ଆବଶ୍ୟକ ହେବ ।
ଏଲପିଜି ଗ୍ୟାସ ସିଲିଣ୍ଡର: ପ୍ରତି ମାସ ଆରମ୍ଭରେ ଏଲପିଜି ମୂଲ୍ୟ ପରିବର୍ତ୍ତନ ହୁଏ। କିଛି ସମୟ ଧରି, କେବଳ ବାଣିଜ୍ୟିକ ଗ୍ୟାସ ସିଲିଣ୍ଡରର ମୂଲ୍ୟରେ ପରିବର୍ତ୍ତନ ଦେଖାଯାଇଛି। ଏଲପିଜି ସିଲିଣ୍ଡର ମୂଲ୍ୟ ସ୍ଥିର ରହିଛି। ଗତ ମାସରେ, କମ୍ପାନୀଗୁଡ଼ିକ ୧୯ କିଲୋଗ୍ରାମ ବାଣିଜ୍ୟିକ LPG ସିଲିଣ୍ଡରର ମୂଲ୍ୟ ପ୍ରାୟ ୪୯ ଟଙ୍କା ବୃଦ୍ଧି କରିଥିଲେ। ଏହି ମାସରେ ମଧ୍ୟ ଏକ ପରିବର୍ତ୍ତନ ଆଶା କରାଯାଉଛି।
ରେଳ ଟିକେଟ: ସାଧାରଣ ଏବଂ ପ୍ଲାଟଫର୍ମ ଟିକେଟ ବୁକିଂ ପାଇଁ ନିୟମ ୧ ମାର୍ଚ୍ଚ, ୨୦୨୬ରୁ ପରିବର୍ତ୍ତନ ହେବାକୁ ଯାଉଛି। ପୁରୁଣା ଭାରତୀୟ ରେଳବାଇ UTS ଆପ୍ ୧ ମାର୍ଚ୍ଚରୁ ବନ୍ଦ ହୋଇଯିବ, ଏହାକୁ ନୂତନ RailOne ଆପ୍ ସହିତ ବଦଳାଇ ଦିଆଯିବ। ସାଧାରଣ ଟିକେଟ୍, ପ୍ଲାଟଫର୍ମ ଟିକେଟ୍ ଏବଂ ସ୍ଥାନୀୟ ଯାତ୍ରା ସହିତ ଜଡିତ ସବୁକିଛି ଏହି ନୂତନ ଆପ୍ ରେ ଉପଲବ୍ଧ ହେବ।
ୟୁପିଆଇ ପେମେଣ୍ଟ:ମାର୍ଚ୍ଚ ୧ରୁ ଡିଜିଟାଲ୍ ପେମେଣ୍ଟ ସିଷ୍ଟମରେ ସୁରକ୍ଷା ଆହୁରି ସୁଦୃଢ଼ କରାଯିବ। ବଡ଼ ପରିମାଣର ଅନଲାଇନ୍ ଟ୍ରାନ୍ସଫର ଆଉ କେବଳ UPI PIN ସହିତ କରାଯିବ ନାହିଁ, ବରଂ ବ୍ୟାଙ୍କଗୁଡ଼ିକ ଉଚ୍ଚ-ମୂଲ୍ୟ କାରବାର ପାଇଁ ଅତିରିକ୍ତ ବାୟୋମେଟ୍ରିକ୍ସ କିମ୍ବା ମଲ୍ଟି-ଫ୍ୟାକ୍ଟର ପ୍ରମାଣୀକରଣକୁ ମଧ୍ୟ ବାଧ୍ୟତାମୂଳକ କରିବେ।
ଆହୁରି ପଢନ୍ତୁ- ଆଉ ୨୪ ଘଣ୍ଟା ବାକି ବନ୍ଦ ହେବ ହ୍ୱାଟ୍ସଆପ୍ ? କରିନିଅନ୍ତୁ ଏହି ୩ କାମ, ନଚେତ୍ ସିମ୍ ବାଇଣ୍ଡିଂ ପରେ ଭାବୁଥିବେ
ନ୍ୟୁନତମ ବ୍ୟାଲାନ୍ସ ନିୟମରେ ପରିବର୍ତ୍ତନ: କିଛି ବ୍ୟାଙ୍କ ଏବେ ନ୍ୟୁନତମ ଶେଷ ରାଶିର ଗଣନା ପୁରା ମାସର ଆଭରେଜ ବ୍ୟାଲାନ୍ସ ଆଧାରରେ କରିଥାନ୍ତି । ତେବେ ପୂର୍ବରୁ ଗୋଟିଏ ଦିନ ପାଇଁ ବ୍ୟାଲାନ୍ସ କମ୍ ହେଲେ ଜୋରିମାନା ଲାଗୁଥିଲା । ଏବେ କିନ୍ତୁ ‘ଆଭରେଜ ମାସିକ ବ୍ୟାଲାନ୍ସ’ଆଧାରରେ ନିଷ୍ପତ୍ତି ନିଆଯାଇପାରିବ, ଯାହା ଫଳରେ ଗ୍ରାହକମାନେ କିଛି ରିହାତି ପାଇବେ ବୋଲି ଆଶା କରାଯାଉଛି । ମାସିକ ଖାତାରେ ସନ୍ତୁଳିତ ରାଶି ରଖିବା ପାଇଁ ଏହି ଯୋଜନା କାର୍ଯ୍ୟକାରୀ ହେବାକୁ ଯାଉଛି ବୋଲି ଜଣାପଡ଼ିଛି ।
