କରଞ୍ଜିଆ,୧୧/୧୨: ଶିମିଳିପାଳରେ ପୁଣି ଶିକାରୀଙ୍କୁ ଧରିଲା ଟ୍ରାପ୍ କ୍ୟାମେରା । ଶିକାର ପାଇଁ ଆସିଥିବା ବେଳେ ଟ୍ରାପ୍ କ୍ୟାମେରା ମାଧ୍ୟମରେ ୬ ଜଣ ଶିକାରୀଙ୍କୁ ଧରିଲା ବନବିଭାଗ । ସମସ୍ତ ଅଭିଯୁକ୍ତ କରଞ୍ଜିଆ ଥାନା ଅଞ୍ଚଳ ରାମଯୋଡ଼ି ଗାଁର ବୋଲି ଜଣା ପଡ଼ିଛି । ସେମାନଙ୍କ ନିକଟରୁ ଧନୁ, ତୀର, ଫାସ, ବଣ ଘୁଷୁରୀ ମାଂସ ଓ ସମ୍ବର ମାଂସ ଇତ୍ୟାଦି ଜବତ କରାଯାଇଛି । ମୟୂରଭଞ୍ଜ ଜିଲ୍ଲା ଶିମିଳିପାଳ ଅଭୟାରଣ୍ୟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ମଙ୍ଗଳବାର ରାତିରେ ୬ ଜଣ ଶିକାରୀ ଶିମିଳିପାଳର କୋର୍ ଅଞ୍ଚଳରେ ଶିକାର କରିବା ପାଇଁ ଆସିଥିଲେ । ଏହି ସମୟର କିଛି ଦୃଶ୍ୟ ଟ୍ରାପ୍ କ୍ୟାମେରାରେ କଏଦ ହୋଇଥିଲା । ସେହି କ୍ୟାମେରା ସାହାଯ୍ୟରେ ବନ ବିଭାଗ ସେମାନଙ୍କୁ ଧରିବାରେ ସଫଳ ହୋଇଛି । ସେମାନଙ୍କ ନିକଟରୁ ଧନୁ, ତୀର, ଫାସ, ବଣ ଘୁଷୁରୀ ମାଂସ ଓ ସମ୍ବର ମାଂସ ଜବତ କରଯାଇଛି । ସମସ୍ତ ଅଭିଯୁକ୍ତଙ୍କୁ ବୁଧବାର କୋର୍ଟ ଚାଲାଣ କରାଯିବା ନେଇ ସୂଚନା ମିଳିଛି ।
