ରଗଡି, ୯।୬ : କୋରେଇ ଥାନା ଅନ୍ତର୍ଗତ ରଗଡି ଛକ ନିକଟ ମା' ବାଗେଶ୍ବରୀ ହୋଟେଲ ନିକଟରେ ବଜ୍ରପାତରେ ଜଣେ ଟ୍ରକ ହେଲପରର ଘଟଣା ସ୍ଥଳରେ ମୃତ୍ୟୁ ଘଟିଛି। ଡ୍ରାଇଭର ସାମାନ୍ୟ ଆହତ ହୋଇଛି। ମୃତକ ହେଲେ ଅନୁଗୁଳ ଜିଲା ବଜ୍ରୋକୋଟ ଗ୍ରାମର ଦିଲ୍ଳୀପ ନାୟକ। ଆହତ ଡ୍ରାଇଭର ହେଲେ କେନ୍ଦୁଝର ଜିଲ୍ଲା କଲଣ୍ଡା ଗ୍ରାମର ପପୁ ଖୁଣ୍ଟିଆ।
କେନ୍ଦୁଝରରୁ ଲୁହାପଥର ଗୁଣ୍ଡ ନେଇ ଟ୍ରକ ପାରାଦ୍ବୀପ ଅଭିମୁଖେ ଯାଉଥିଲା। ଖାଇବା ପାଇଁ ହୋଟେଲ ନିକଟରେ ଟ୍ରକ ରଖି ଉଭୟ ସିମେଣ୍ଟ କୁଣ୍ଡରେ ଗାଧୋଉଥିବା ବେଳେ ବଜ୍ରପାତର ଶିକାର ହୋଇଥିଲେ । ଏଥିରେ ହେଲପରର ମୃତ୍ୟୁ ଘଟିଥିବା ବେଳେ ଡ୍ରାଇଭର ଆହତ ହୋଇଥିଲା। ଖବର ପାଇ କୋରେଇ ପୋଲିସ ପହଞ୍ଚି ଶବ ଜବତ କରି ଏକ ଅପମୃତ୍ୟୁ ମାମଲା ରୁଜୁ କରିଛି । କୋରେଇ ଅଞ୍ଚଳରେ ଅପରାହ୍ନରେ ବର୍ଷା ସହିତ ପ୍ରବଳ ଭାବରେ ବିଜୁଳି ଘଡଘଡି ମାରିଥିଲା । ଏହାଦ୍ୱାରା ଲୋକମାନେ ଭୟଭୀତ ହୋଇ ପଡ଼ିଥିଲେ । ବଜ୍ରପାତରେ କେଉଁଠି ଘରର ଆଜବେଷ୍ଟସ ଭାଙ୍ଗି ଯାଇଛି ତ ଆଉ କେଉଁଠି ପଙ୍ଖା, ଇନଭର୍ଟର ଓ ଅନ୍ୟ ବିଦ୍ୟୁତ ଉପକରଣ ପୋଡି ଯାଇଥିବା ଜାଣିବାକୁ ମିଳିଛି ।
