ନୂଆପଡ଼ା,୧୩/୬(ଆପ୍ର): ସ୍ତ୍ରୀଙ୍କୁ ପ୍ରସୂତୀ କରି ଶ୍ୱଶୁର ଘରକୁ ଫେରିଥିଲେ । ସ୍ତ୍ରୀ ନବ ଜନ୍ମିତ ଶିଶୁକୁ ଧରି ମା ଘରେ ପହଞ୍ଚିଥିଲେ । କିନ୍ତୁ ସ୍ବାମୀ ପହଞ୍ଚି ପାରିନଥିଲେ । ଅଧା ବାଟରେ ଚାଲିଗଲା ସ୍ଵାମୀଙ୍କ ଜୀବନ । ଏମିତି ଏକ ଘଟଣା ଘଟିଛି ନୂଆପଡ଼ା ଜିଲ୍ଲା ଲଖନା ଥାନା ଦଲଦଳି ଗାଁରେ । ଏକ ବାଇକ ଦୁର୍ଘଟଣାରେ ଦିଆନମୁଣ୍ଡା ଗାଁର କ୍ଷମା ଧରୁଆ(୨୮) ଓ ପୁରନ ଧରୁଆ(୩୦)ଙ୍କ ମୃତ୍ୟୁ ହୋଇଛି ।
ସୂଚନା ମୁତାବକ, ଆଜି ମଧ୍ୟାହ୍ନରେ ଲଖନା ଥାନା ଦିଆନମୁଣ୍ଡା ଗାଁର କ୍ଷମାଙ୍କ ପତ୍ନୀ ବୃନ୍ଦା ଧରୁଆଙ୍କ ପ୍ରସବ ବେଦନା ହେବାରୁ ତରବୋଡ଼ ପ୍ରାଥମିକ ସ୍ଵାସ୍ଥ୍ୟ କେନ୍ଦ୍ରକୁ ନେଇଥିଲେ । ଅପରାହ୍ନରେ ବୃନ୍ଦାଙ୍କ ଗର୍ଭରୁ ଏକ ଶିଶୁପୁତ୍ର ଜନ୍ମ ହୋଇଥିଲା । ସନ୍ଧ୍ୟାରେ କ୍ଷମା ତାଙ୍କ ସ୍ତ୍ରୀ ଓ ନବ ଜାତକ ଶିଶୁ ପୁତ୍ରକୁ ସେବାଯତ୍ନ ପାଇଁ ଦଲଦଳି ସ୍ଥିତ ଶ୍ୱଶୁର ଘରକୁ ପଠାଇଥିଲେ । ରାତିରେ କ୍ଷମା ଓ ତାଙ୍କ ସମ୍ପର୍କୀୟ ଭାଇ ପୁରନ ଏକ ବାଇକ ଯୋଗେ ଦଲଦଳିକୁ ଆସୁଥିଲେ । ତେବେ ଶ୍ବଶୁର ଘରରେ ପହଞ୍ଚିବାକୁ ମାତ୍ର ଅଧା କିମି ବାକି ରହିଥିଲା । ଜାତୀୟ ରାଜପଥ ୩୫୩ ଦଲଦଳି ନିକଟ କପା ମିଲ ସମ୍ମୁଖରେ ବାଇକକୁ ଏକ ଅଜଣା ଟ୍ରକ ଧକ୍କା ଦେଇଥିଲା। ଏଥିରେ ଦୁଇ ବାଇକ ଆରୋହି ଛିଟିକି ପଡିଥିଲେ ।
ଦୁଇ ବାଇକ ଆରୋହୀଙ୍କ ମୁଣ୍ଡରେ କୌଣସି ଏକ ଭରିଯାନର ଚକ ଚଢ଼ି ଯାଇଥିବା ସ୍ଥାନୀୟ ଲୋକେ ଅନୁମାନ କରିଛନ୍ତି । ତେବେ ଘଟଣା ସ୍ଥଳରେ ଦୁଇ ଯୁବକଙ୍କ ମୃତ୍ୟୁ ହୋଇଛି । ଏଠି ସ୍ତ୍ରୀ ନିଜ ନବଜାତକ ଶୁଶୁକୁ ଧରି ମା ଘରେ ପହଞ୍ଚି ସ୍ଵାମୀଙ୍କୁ ଅପେକ୍ଷା କରିଥିଲେ । କିନ୍ତୁ ଶଶୁର ଘର ଫେରିବା ବାଟରେ ସ୍ଵାମୀଙ୍କ ଜୀବନ ଚାଲି ଯାଇଛି । ରାତି ପ୍ରାୟ ସାଢ଼େ ୧୦ଟାରେ ଲଖନା ଥାନା ପୁଲିସ ଘଟଣା ସ୍ଥଳରେ ପହଞ୍ଚି ଦୁଇ ଯୁବକଙ୍କ ମୃତଦେହ ଓ ଦୁର୍ଘଟଣା ଗ୍ରସ୍ତ ବାଇକକୁ ଜବତ କରି ତଦନ୍ତ ଚାଲିଥିବା ଲଖନା ଆଇଆଇସି ଦୁର୍ଗାମାଧବ ବାଘ ସୂଚନା ଦେଇଛନ୍ତି ।
