ଭଦ୍ରକ, ୨୬।୧: ବେଆଇନ ବାଲି ଘାଟ ବନ୍ଦ କରିବାକୁ ଦାବି କରିଛନ୍ତି ଟ୍ରକ୍ ମାଲିକ । ୩ ଦିନ ଧରି ଅହୋରାତ୍ର ଧାରଣାରେ ବସିରହିଛନ୍ତି । ବାଟରେ ଧର ନାହିଁ, ଘାଟରେ ଧର । ବେଆଇନ ବାଲି ଘାଟ ବନ୍ଦ କର । ଏଭଳି କିଛି ଦାବି କରି ଧାରଣାରେ ବସିଛନ୍ତି ଭଦ୍ରକ ଜିଲ୍ଲା ଟ୍ରକ ମାଲିକ ସଂଘ । ଭଦ୍ରକ ଜିଲ୍ଲାରେ ବେଆଇନ ବାଲି ଚାଲାଣ ଅଭିଯୋଗରେ ବାଲି ବୋଝେଇ ଗାଡ଼ିଗୁଡ଼ିକୁ ଲକ୍ଷାଧିକ ଟଙ୍କାର ଜୋରିମାନା କରାଯାଉଛି । ଅନେକ ସମୟରେ ଗାଡ଼ିକୁ ଜବତ କରାଯାଉଛି । କିନ୍ତୁ, ପ୍ରଶାସନ ବେଆଇନ ବାଲି ଘାଟ ବନ୍ଦ କରିବା ପାଇଁ କୌଣସି ପଦକ୍ଷେପ ନେଉନଥିବା ଟ୍ରକ୍ ମାଲିକ ଅଭିଯୋଗ କରିଛନ୍ତି ।
ପ୍ରଶାସନ ଏଯାଏ କୌଣସି ପଦକ୍ଷେପ ନ ନେବାରୁ ଭଦ୍ରକ ଜିଲ୍ଲା ଟ୍ରକ ମାଲିକମାନେ ୧୧ ଦଫା ଦାବିରେ ୩ ଦିନ ଧରି ଭଣ୍ଡାରୀପୋଖରୀ ତହସିଲ ସମ୍ମୁଖରେ ଅହୋରାତ୍ର ଧାରଣା ଦେଇଛନ୍ତି । ଅନେକ ସମୟରେ ବାଲି ଘାଟରୁ ବାଲି, ଚିପ୍ସ, ମୋରମ ଆଦି ଆଣିବା ବେଳେ ମିଳୁଥିବା ଟିପିକୁ ନକଲି ଦର୍ଶାଇ ଲକ୍ଷାଧିକ ଟଙ୍କାର ଜୋରିମାନା କରୁଛନ୍ତି । ତେଣୁ ଟ୍ରକ ମାଲିକମାନେ କହିଛନ୍ତି ଯେ, ଯେଉଁ ଖାଦାନ ଗୁଡ଼ିକ ନକଲି କାଗଜପତ୍ର ଦେଉଛନ୍ତି ସେମାନଙ୍କ ବିରୋଧରେ କାର୍ଯ୍ୟନୁଷ୍ଠାନ ଦାବି କରିଛନ୍ତି । ଏପରିକି ବେଆଇନ ବାଲି ଘାଟଗୁଡ଼ିକ ଉପରେ ପ୍ରଶାସନ ଚଢ଼ାଉ କରୁନାହିଁ । ଯେଉଁ ଖାଦାନ ବା ଘାଟରୁ ଗାଡ଼ି ଲୋଡ୍ ହେଉଛି ସେହି ଘାଟ କିମ୍ବା ଖାଦାନରେ ପୋଲିସ ଚଢ଼ାଉ କରି ଭୁଲ୍ କାଗଜପତ୍ର ଥିଲେ କାର୍ଯ୍ୟନୁଷ୍ଠାନ ନିଆଯାଉ ବୋଲି ଦାବି ହେଉଛି । ଯେ ପର୍ଯ୍ୟନ୍ତ ଦାବି ପୂରଣ ନ ହୋଇଛି ସେ ପର୍ଯ୍ୟନ୍ତ ଧାରଣା ଜାରି ରହିବ ବୋଲି କହିଛି ଭଦ୍ରକ ଜିଲ୍ଲା ଟ୍ରକ ମାଲିକ ସଂଘ । ପ୍ରଶାସନ ତାଙ୍କ ଦାବି ନ ମାନିଲେ ଆଗକୁ ସପରିବାର ସହ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେବେ ବୋଲି ଭଦ୍ରକ ଜିଲ୍ଲା ଟ୍ରକ ମାଲିକ ସଂଘର ଜଣେ ସଦସ୍ୟ ସୁଶାନ୍ତ କୁମାର ସାହୁ କହିଛନ୍ତି ।
