ନୂଆଦିଲ୍ଲୀ,୧୩।୯: ପାକିସ୍ତାନର ଅଶାନ୍ତ ଉତ୍ତର-ପଶ୍ଚିମ ଅଞ୍ଚଳରେ ଶନିବାର ଘଟିଛି ଆତଙ୍କବାଦୀ ଆକ୍ରମଣ। ପାକିସ୍ତାନୀ ତାଲିବାନ (ଟିଟିପି) ଦ୍ବାରା କରାଯାଇଥିବା ଏହି ଘାତକ ଆକ୍ରମଣରେ ୧୨ ଜଣ ସୈନିକଙ୍କ ମୃତ୍ୟୁ ହୋଇଛି। ସେଭଳି ୪ ଜଣ ଆହତ ହୋଇଛନ୍ତି। ସ୍ଥାନୀୟ ପ୍ରଶାସନ ଓ ସୁରକ୍ଷା ଅଧିକାରୀମାନେ ଏହି ଆକ୍ରମଣ ସମ୍ପର୍କରେ ସୂଚନା ଦେଇଛନ୍ତି। ଏହି ଆକ୍ରମଣ ଦକ୍ଷିଣ ଓ୍ବଜରିସ୍ଥାନ ଜିଲ୍ଲାରେ ସକାଳ ପ୍ରାୟ ୪ଟା ବେଳେ ହୋଇଥିଲା, ଯେତେବେଳେ ସେନାର ଏକ ଗାଡି ସେହି ଅଞ୍ଚଳ ଦେଇ ଯାଉଥିଲା।
ସ୍ଥାନୀୟ ଅଧିକାରୀ କହିଛନ୍ତି ଯେ, ଦୁଇ ପଟୁ ଜୋରଦାର ଗୁଳିମାଡ଼ ହୋଇଥିଲା। ଏଥିରେ ୧୨ ଜଣ ସୁରକ୍ଷାକର୍ମୀଙ୍କ ମୃତ୍ୟୁ ହୋଇଛି। ଆକ୍ରମଣକାରୀମାନେ ଘଟଣାସ୍ଥଳରୁ ସେନା ହତିଆର ଏବଂ ଜରୁରୀ ଜିନିଷ ଲୁଟି ନେଇଥିଲେ। ପାକିସ୍ତାନୀ ତାଲିବାନ (TTP) ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରିଛି। ଏହି ଗୋଷ୍ଠୀ ଦାବି କରିଛି ଯେ ଆକ୍ରମଣ ସମୟରେ ଏହାର ଯୋଦ୍ଧାମାନେ ପାକିସ୍ତାନୀ ସୈନିକଙ୍କଠାରୁ ଅସ୍ତ୍ରଶସ୍ତ୍ର ମଧ୍ୟ ଛଡ଼ାଇ ନେଇଥିଲେ। ଏହି ଆକ୍ରମଣ ଅଞ୍ଚଳରେ ବୃଦ୍ଧି ପାଉଥିବା ସୁରକ୍ଷାର ଚିନ୍ତାକୁ ଆହୁରି ବୃଦ୍ଧି କରିଛି। ସ୍ଥିତିକୁ ନିୟନ୍ତ୍ରଣପାଇଁ ସ୍ଥାନୀୟ ପ୍ରଶାସନ ଏବଂ ସୁରକ୍ଷା ଏଜେନ୍ସିଗୁଡ଼ିକ ସର୍ଚ୍ଚ ଅପରେସନ୍ କରୁଛନ୍ତି। ଅଧିକାରୀମାନେ ନାଗରିକଙ୍କୁ ସତର୍କ ରହିବାକୁ ଏବଂ ଯେକୌଣସି ସନ୍ଦିଗ୍ଧ କାର୍ଯ୍ୟକଳାପ ବିଷୟରେ ରିପୋର୍ଟ କରିବାକୁ ନିବେଦନ କରିଛନ୍ତି।
ଏହି ଘଟଣାଟି ଖୈବର ପଖତୁନଖ୍ୱା ପ୍ରଦେଶରେ ଗତ କିଛି ମାସ ମଧ୍ୟରେ ହୋଇଥିବା ସବୁଠାରୁ ଭୟଙ୍କର ଆକ୍ରମଣ ମଧ୍ୟରୁ ଗୋଟିଏ, ଯେଉଁଠାରେ ଟିଟିପି ପୂର୍ବରୁ ବଡ଼ ଅଞ୍ଚଳ ନିୟନ୍ତ୍ରଣ କରୁଥିଲା କିନ୍ତୁ ୨୦୧୪ ସାମରିକ ଅଭିଯାନ ପରେ ପଛକୁ ହଟିବାକୁ ବାଧ୍ୟ ହୋଇଥିଲା। ୨୦୨୧ରେ ଆଫଗାନିସ୍ତାନକୁ ତାଲିବାନ ଶାସନ ଫେରିବା ପରଠାରୁ, ଆଫଗାନ-ପାକିସ୍ତାନ ସୀମାବର୍ତ୍ତୀ ଅଞ୍ଚଳରେ ଆତଙ୍କବାଦୀ କାର୍ଯ୍ୟକଳାପ ବୃଦ୍ଧି ହୋଇଛି। ପୃଥକ ସଂଗଠନ ହେବା ସତ୍ତ୍ୱେ, ଟିଟିପି ଆଫଗାନ ତାଲିବାନ ସହିତ ଘନିଷ୍ଠ ସମ୍ପର୍କ ବଜାୟ ରଖିଛି। ପାକିସ୍ତାନ ଦାବି କରୁଛି ଯେ, ଆମ ଉପରେ ଆକ୍ରମଣ କରୁଥିବା ଆତଙ୍କବାଦୀମାନଙ୍କୁ ହଟାଇବାରେ ଆଫଗାନିସ୍ତାନ ବିଫଳ। ତେବେ କାବୁଲ ଅଧିକାରୀମାନେ ଏହି ଦାବିଗୁଡ଼ିକୁ ପ୍ରତ୍ୟାଖ୍ୟାନ କରିଛନ୍ତି।
