ମାଲକାନଗିରି, ୧୮/୬ (ଆପ୍ର): ମାଲକାନଗିରି ଜିଲ୍ଲାର ଗୌରବ ବଢ଼ାଇବାକୁ ଯାଉଛନ୍ତି ସ୍ୱାଭିମାନ ଅଞ୍ଚଳର ଦୁଇ ଶ୍ରବଣ ଓ ବୋଧନ ଶକ୍ତି ହୀନ ଦିବ୍ୟାଙ୍ଗ ଆଦିବାସୀ ବାଳକ ରୁକୁନାଥ ସିଶା ଓ ରବିନାଥ ଜିଗିଡି। ପଙ୍ଗୁ ଲଙ୍ଗେୟତେ ଗିରି ଭଳି ଏହି ଦୁଇ ଦିବ୍ୟାଙ୍ଗ ବାଳକ ଉତ୍ତରପ୍ରଦେଶ କାନପୁର ଠାରେ ଆୟୋଜିତ ହେଉଥିବା ଜାତୀୟ ଜୁଡୋ ଚାମ୍ପିଅନସିପ ପ୍ରତିଯୋଗିତାରେ ଭାଗ ନେବାପାଇଁ ମନୋନୀତ ହୋଇଛନ୍ତି।
ଏହି ବାଳକ ଦ୍ୱୟ ମାଲକାନଗିରି ଜିଲ୍ଲା ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ବଡପଦର ପଞ୍ଚାୟତ ଅବସ୍ଥିତ ସ୍ୱାଭିମାନ ଅଞ୍ଚଳର ଦୁର୍ଗମ ଇଲାକା ଲାମ୍ବାସିଙ୍ଗ ଆଦିବାସୀ ଗ୍ରାମର ଅଟନ୍ତି। ସେମାନେ ନାୟକଗୁଡ଼ା ସ୍ଥିତ ଈର୍ମବାକା ଦିବ୍ୟାଙ୍ଗ ବିଦ୍ୟାଳୟର ପୂର୍ବତନ ଛାତ୍ର। ଏହି ଦୁଇ ଶ୍ରବଣ ଓ ବୋଧନ ଶକ୍ତି ହୀନ ଯୁବକ ଆସନ୍ତା ୨୦ଜୁନ ରୁ ୨୩ଜୁନ୍ ପର୍ଯ୍ୟନ୍ତ କାନପୁର, ଉତ୍ତରପ୍ରଦେଶରେ ହେବାକୁ ଯାଉଥିବା ରାଷ୍ଟ୍ରୀୟ ବଧିର କ୍ରୀଡା ଚାମ୍ପିୟନ୍ସିପ୍ ପାଇଁ ମନୋନୀତ ହୋଇଛନ୍ତି। ଖୁସିର କଥା ଯେ ସାରା ଓଡିଶାରୁ ଚାରିଜଣ ଖେଳାଳିଙ୍କ ମଧ୍ୟରେ ମାଲକାନଗିରିର ସର୍ବାଧିକ ଏହି ଦୁଇଜଣ ଖେଳାଳୀ ରହିଛନ୍ତି।
ଏମାନେ ମାନସିକ ଓ ଶାରୀରିକ ବାଧା ସହିତ ସଂଘର୍ଷ କରି, ଅନନ୍ୟ ପ୍ରତିଭା ଓ ଦୃଢ଼ ସଂକଳ୍ପ ଦ୍ୱାରା ଖେଳ କ୍ଷେତ୍ରରେ ଏକ ଅଲଗା ପରିଚୟ ସୃଷ୍ଟି କରିପାରିଛନ୍ତି। ମାଲକାନଗିରି ଆଓମା ଗୁରୁକୂଳ ଓ ଜୁଡୋ ଏସୋସିଏସନର ମିଳିତ ପ୍ରୟାସ ଏଵଂ ଜିଲ୍ଲା ପ୍ରଶାସନର ସାହାଯ୍ୟ ଏଵଂ ସହୋଯୋଗ ଦ୍ୱାରା ଏହା ସମ୍ଭବ ହୋଇ ପାରିଛି ବୋଲି ଅନୁଷ୍ଠାନର ମୂଖ୍ୟ ବିକାଶ କୁମାର ମିଶ୍ର ପ୍ରକାଶ କରିଛନ୍ତି।
ବାଳକ ଦ୍ୱୟଙ୍କ ନିକଟରେ ପ୍ରତିଭା ଥିଲେ ମଧ୍ୟ ଏମାନଙ୍କ ପରିବାର ଅତି ଗରିବ ହୋଇଥିବାରୁ ଯାତ୍ରା, ରହଣୀ, ଖାଦ୍ୟ ଓ ଅନ୍ୟାନ୍ୟ ଖର୍ଚ୍ଚ ପାଇଁ ସମ୍ପୂର୍ଣ୍ଣ ଭାବେ ଅସମର୍ଥ ଥିଲେ। ଏହି ପରିସ୍ଥିତିକୁ ଦୃଷ୍ଟିରେ ରଖି ଜିଲ୍ଲାପାଳ ଆଶିଷ ଇଶ୍ୱର ପାଟିଲ ସେମାନଙ୍କୁ ଜିଲ୍ଲା ରେଡକ୍ରସ୍ ତରଫରୁ ଆବଶ୍ୟକ ସାହାଯ୍ୟ ସହଯୋଗ ପ୍ରଦାନ କରିବା ସହ ସେମାନଙ୍କ ସଫଳତା କାମନା କରିଛନ୍ତି। ଜିଲ୍ଲା ମୂଖ୍ୟ ଉନ୍ନୟନ ଅଧିକାରୀ ତଥା ଜିଲ୍ଲା ପରିଷଦ ନିର୍ବାହୀ ଅଧିକାରୀ ନରେଶ ଚନ୍ଦ୍ର ଶବର, ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ ମାନସ ମିଶ୍ର, ଆଓମା ଗୁରୁକୁଳର ଅଧକ୍ଷ ରତ୍ନାକର ଦାଶ, ସହକାରୀ ଜିଲ୍ଲା ସାମାଜିକ ସୁରକ୍ଷା ଅଧିକରୀ ନିର୍ମଳ ଧାରୁଆ, ଜିଲ୍ଲା କ୍ରୀଡ଼ାଧିକାରୀ ଅଜୟ ମାଣ୍ଡାଙ୍ଗୀ, ଜିଲ୍ଲା ସହକାରି ସାମାଜିକ ସୁରକ୍ଷା ଅଧିକାରୀ ସଶ୍ମିତା ସ୍ୱାଇଁ, ଜିଲ୍ଲା ସୂଚନା ଲୋକସମ୍ପର୍କ ଅଧିକାରୀ ପ୍ରମିଳା ମାଝୀ, ଜିଲ୍ଲା ଶିଶୁ ସୁରକ୍ଷା ଅଧିକାରୀ ନାରାୟଣ ଦାସ, ଏପିଡି ହିମାଂଶୁ ମହାରଣା ପ୍ରମୁଖ ଅଧିକାରୀ ଏହି ଦୁଇ ଦିବ୍ୟାଙ୍ଗ ବାଳକଙ୍କ ଯାତ୍ରାର ସଫଳତା କାମନା କରି ଦୁଇ କ୍ରୀଡାବିତଙ୍କୁ ପ୍ରଶଂସା କରିବା ସହିତ ଆହୁରି ଆଗକୁ ଯିବା ପାଇଁ ପ୍ରେରଣା ଦେଇଛନ୍ତି।
ଏହି ଦୁଇ ଖେଳାଳିଙ୍କ ପ୍ରୟାସ କେବଳ ଏକ ବ୍ୟକ୍ତିଗତ ଜିତ ନୁହେଁ, ବରଂ ଏହା ସ୍ୱାଭିମାନ ଅଞ୍ଚଳର ଅନେକ ଦିବ୍ୟାଙ୍ଗ ଶିଶୁମାନଙ୍କ ପାଇଁ ଏକ ପ୍ରେରଣା ହେବା ସହିତ ଜିଲ୍ଲାକୁ କ୍ରୀଡା ମାନଚିତ୍ରରେ ଅନ୍ୟ ଏକ ମାନ୍ୟତା ଦେଇପାରିବ ବୋଲି କହିଛନ୍ତି। ଜିଲ୍ଲା ପ୍ରଶାସନର ସହଯୋଗକୁ ଅଲ ଓଡିଶା ମାର୍ଶାଲ ଆର୍ଟ ଏକାଡେମୀର ମୂଖ୍ୟ ବିନାଶ ମିଶ୍ର ଓ ଅଧକ୍ଷ ଆର.କେ. ଦାଶ ଏବଂ ଆଓମା ଗୁରୁକୁଳ ଜୁଡୋ ଏସୋସିଏସନର ସମସ୍ତ ସଦସ୍ୟ ଜିଲ୍ଲାପ୍ରଶାସନଙ୍କୁ ଆନ୍ତରିକ ଧନ୍ୟବାଦ ଜଣାଇଛନ୍ତି।
