ଭୁବନେଶ୍ୱର, ୨୩/୦୪: ରାଜ୍ୟ ସରକାର ଅଗ୍ନିଶମ ବିଭାଗକୁ ଅଧିକରୁ ଅଧିକ ମଜଭୁତ କରିବାକୁ ଲାଗି ପଡ଼ିଛନ୍ତି । ଜରୁରିକାଳୀନ ପ୍ରତିକ୍ରିୟା ଭିତ୍ତିଭୂମିକୁ ବୃଦ୍ଧି କରିବା ପାଇଁ ସରକାର ଦୁଇଟି ସ୍ୱତନ୍ତ୍ର ବସ୍ କିଣିଛନ୍ତି । ଉକ୍ତ ୨ଟି ବସ୍ର ନାଁ ହେଲା ମୋବାଇଲ୍ କମାଣ୍ଡ ଭେଇକିଲ୍ (ଏମ୍ସିଭି) । ସରଳ ଭାବରେ ଏହାକୁ ଚଳନ୍ତା କାର୍ଯ୍ୟାଳୟ’ କହିଲେ ଅତ୍ୟୁକ୍ତି ହେବନାହିଁ । ଯାହା ବଡ଼ ଧରଣର ଅଗ୍ନିକାଣ୍ଡ, ଟ୍ରେନ୍ ଦୁର୍ଘଟଣା ଏବଂ ପ୍ରାକୃତିକ ବିପର୍ଯ୍ୟୟ ସମୟରେ ମୋବାଇଲ୍ କମାଣ୍ଡ ସେଣ୍ଟର ଭାବରେ କାର୍ଯ୍ୟ କରିବ । ସେହି ହିସାବରେ ଏହି ଗାଡି ୨ଟିକୁ ଡିଜାଇନ୍ କରାଯାଇଛି ।
ରାଜ୍ୟ ଅଗ୍ନିଶମ ଏବଂ ଜରୁରିକାଳୀନ ସେବା ନିର୍ଦ୍ଦେଶାଳୟ ଏହି ୨ଟି ଉନ୍ନତ ଏମ୍ସିଭି ପାଇଛି । ଗୋଟିଏ ଉପକୂଳବର୍ତ୍ତୀ ଅଞ୍ଚଳ ପାଇଁ ଏବଂ ଅନ୍ୟଟି ପଶ୍ଚିମାଞ୍ଚଳ ପାଇଁ । ଯାହାକୁ ଖୁବ୍ ଶୀଘ୍ର ମୁଖ୍ୟମନ୍ତ୍ରୀ ଉଦ୍ଘାଟନ କରିବେ । ଏହି ୟୁନିଟ୍ ଗୁଡ଼ିକ ବିପର୍ଯ୍ୟୟ ସ୍ଥାନରୁ ସିଧାସଳଖ ଉଦ୍ଧାର କାର୍ଯ୍ୟ ପରିଚାଳନା କରିବାକୁ ସକ୍ଷମ ହେବା ସହ ପୁନଃ-ପ୍ରତିକ୍ରିୟା ଦକ୍ଷତା ବୃଦ୍ଧି କରିବ । ଏଥିରେ ଭିଡିଓ କନଫରେନ୍ସିଂ ସିଷ୍ଟମ, ଅତ୍ୟାଧୁନିକ ଯୋଗାଯୋଗ ଉପକରଣ ଏବଂ ରିଅଲ୍ ଟାଇମ୍ ଡାଟା ପ୍ରକ୍ରିୟାକରଣ ୟୁନିଟ୍ ସମେତ ଅନେକ ପ୍ରଯୁକ୍ତିବିଦ୍ୟା ରହିଛି ।
ଏହି ଗାଡ଼ି ଗ୍ରାଉଣ୍ଡ ଅପଡେଟ୍ ଉପରେ ଆଧାରିତ ନିଷ୍ପତ୍ତିକୁ ସହଜ କରିବା ସହିତ ବିଭିନ୍ନ ଏଜେନ୍ସି ସହିତ ନିରନ୍ତର ଯୋଗାଯୋଗ ସୁନିଶ୍ଚିତ କରିପାରିବ । ଆଧୁନିକ ଯୋଗାଯୋଗ ଉପକରଣ, ସାଟେଲାଇଟ୍ ଫୋନ୍, ଇଣ୍ଟରନେଟ୍ ସଂଯୋଗ, କମ୍ପ୍ୟୁଟର ଏବଂ ପ୍ରିଣ୍ଟର ବି ଗାଡ଼ିରେ ରହିଛି । ସେଗୁଡ଼ିକରେ ରିଅଲ୍ ଟାଇମ୍ ପରିସ୍ଥିତି ମନିଟରିଂ ପାଇଁ ସିସିଟିଭି କ୍ୟାମେରା, ଡ୍ରୋନ୍ ସହିତ ଡିସପ୍ଲେ ସ୍କ୍ରିନ୍ ବ୍ୟବସ୍ଥା କରାଯାଇଛି । ଖାଲି ସେତିକି ନୁହେଁ, ମିନି କନ୍ଫରେନ୍ସ ରୁମ୍, ବରିଷ୍ଠ ଅଧିକାରୀଙ୍କ ପାଇଁ ଏକ ଛୋଟ ଅଫିସ୍ କକ୍ଷ, ବାଥରୁମ୍ ଓ ମିନି କିଚେନ୍ ବ୍ୟବସ୍ଥା ରହିଛି ।
ଏହି ଗାଡ଼ି କେମିତି ଡିଜାଇନ୍ ହେବ ତାହା ଅଗ୍ନିଶମର ବରିଷ୍ଠ ଅଧିକାରୀମାନେ ନିଷ୍ପତ୍ତି ନେଇଥିଲେ । ଦୁଇଟି ଗାଡ଼ି ବରିଷ୍ଠ ଅଧିକାରୀ ଏବଂ ବୈଷୟିକ ବିଶେଷଜ୍ଞଙ୍କ ପାଇଁ ଉତ୍ସର୍ଗୀକୃତ କାର୍ଯ୍ୟକ୍ଷେତ୍ର ହେବ । ଜରୁରିକାଳୀନ ପରିସ୍ଥିତିରେ ପ୍ରତ୍ୟେକ ମିନିଟ୍ ଗୁରୁତ୍ୱପୂର୍ଣ୍ଣ । ସେଥିପାଇଁ ସରକାର ଏହି ଗାଡ଼ିର ବ୍ୟବସ୍ଥା କରିଛନ୍ତି । ଏହି ଗାଡି ସେନା,ଏନ୍ଏସ୍ଜି ଏବଂ ବିଭିନ୍ନ ରାଜ୍ୟ ପୁଲିସ୍ ବାହିନୀ ପ୍ରମୁଖ କାର୍ଯ୍ୟ ସମନ୍ୱୟ କ୍ଷେତ୍ରରେ ବ୍ୟବହାର ହେଉଛି ।
