ବାଲେଶ୍ଵର, ୧୮। ୭: ଫକୀରମୋହନ କଲେଜ ଛାତ୍ରୀ ସୌମ୍ୟାଶ୍ରୀ ବିଶିଙ୍କ ଆତ୍ମାହୁତି ଘଟଣା । ଶୁକ୍ରବାର ପ୍ରାୟ ୧୨ଟା ସମୟରେ ତଦନ୍ତ ପାଇଁ ଗଠିତ ୟୁଜିସି ଫ୍ୟାକ୍ଟ ଫାଇଣ୍ଡିଂ ଟିମ୍ ଏଫ୍ଏମ୍ କଲେଜରେ ପହଞ୍ଚିଛି । ପ୍ରଫେସର ରାଜ୍ କୁମାର ମିତ୍ତଲଙ୍କ ଅଧ୍ୟକ୍ଷତାରେ ୪ଜଣିଆ ଟିମ୍ ବାଲେଶ୍ୱର ଆସିଛନ୍ତି । ପ୍ରଫେସର ସୁଷମା ଯାଦବ, ଡକ୍ଟର ନିରଜା ଗୁପ୍ତା ଓ ୟୁଜିସିର ଯୁଗ୍ମ ସଚିବ ଡକ୍ଟର ଅସୀମା ମଙ୍ଗଲା ଟିମ୍ରେ ସଦସ୍ୟ ଭାବେ ଅଛନ୍ତି । ଏହି ଟିମ୍ ଏଫ୍ଏମ୍ କଲେଜରେ ପହଞ୍ଚିବା ପରେ ଭାରପ୍ରାପ୍ତ ଅଧ୍ୟକ୍ଷ ପ୍ରଫେସର ଫିରୋଜ ପାଢ଼ୀଙ୍କୁ ଭେଟିଥିଲେ । ପାରିପାର୍ଶ୍ଵିକ ସ୍ଥିତି ଯାଞ୍ଚ କରିବା ସହ କଲେଜରେ ଛାତ୍ରୀ ନିର୍ଯାତନା ସମ୍ପର୍କରେ ପୁଙ୍ଖାନୁପୁଙ୍ଖ ତଦନ୍ତ ଆରମ୍ଭ କରିଛନ୍ତି । ଅଧ୍ୟକ୍ଷଙ୍କ ଚାମ୍ବରରେ ଦୀର୍ଘ ସମୟ ଧରି ବିଭିନ୍ନ ବିଷୟ ଆଲୋଚନା କରିଥିଲେ ।
ସେହିପରି ଦ୍ଵିତୀୟ ପର୍ଯ୍ୟାୟରେ ଆଇସିସି କମିଟିରେ ଥିବା ସମସ୍ତ ସଦସ୍ୟଙ୍କୁ ଭେଟି ସେମାନଙ୍କୁ ପଚରାଉଚରା କରିବେ । ଶୁକ୍ରବାର ଓ ଶନିବାର ଦୁଇଦିନ ଧରି ଏହି ପ୍ରକ୍ରିୟା ଚାଲିବ ବୋଲି ଜଣାପଡ଼ିଛି । ଏହା ପୂର୍ବରୁ ଗୁରୁବାର କ୍ରାଇମବ୍ରାଞ୍ଚ ଟିମ୍ କଲେଜରେ ତଦନ୍ତ କରିଥିଲେ ।
