ନୂଆଦିଲ୍ଲୀ,୨୭।୩: ଋଷ ରାଷ୍ଟ୍ରପତି ବ୍ଲାଡିମିର ପୁଟିନ୍ ଖୁବ୍ ଶୀଘ୍ର ମରିଯିବେ। ତାଙ୍କ ଦେହ ବହୁତ ଖରାପ। ଆଉ ଏକଥା ପୁରା ସତ। ତାଙ୍କର ମୃତ୍ୟୁ ପରେ ଦୁଇ ଦେଶ ଭିତରେ ଚାଲିଥିବା ଯୁଦ୍ଧ ମଧ୍ୟ ଶେଷ ହୋଇଯିବ। ଏଭଳି ଏକ ବୟାନ ଦେଇଛନ୍ତି ୟୁକ୍ରେନ୍ ରାଷ୍ଟ୍ରପତି ଭୋଲ୍ଡିମିର ଜେଲେନସ୍କି। ତାଙ୍କର ଏହି ଦାବି ପରେ ବିଶ୍ବ ରାଜନୀତିରେ ବଢିଛି ଚର୍ଚ୍ଚା।
ଅସ୍ତ୍ରବିରତୀ ନେଇ ସହମତି ପରେ ମଧ୍ୟ ଋଷ-ୟୁକ୍ରେନ୍ ମଧ୍ୟରେ ଜାରି ରହିଛି ଡ୍ରୋନ୍ ଆକ୍ରମଣ। ଏହା ମଧ୍ୟରେ ପୁଟିନ୍ଙ୍କ ସ୍ବାସ୍ଥ୍ୟବସ୍ଥାକୁ ନେଇ ଜେଲେନସ୍କି ଦେଇଛନ୍ତି ବଡ଼ ବୟାନ। ସେ କହିଛନ୍ତି, ପୁଟିନ୍ଙ୍କ ମୃତ୍ୟୁ ଖୁବ୍ ନିକଟ। ବୁଧବାର ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରୋନ୍ଙ୍କ ସହ ବୈଠକ ପରେ ଏଭଳି ବୟାନ ଦେଇଛନ୍ତି ଜେଲେନସ୍କି। ସେ କହିଛନ୍ତି ଶାନ୍ତି ଆଲୋଚନା ପରେ ବି ଋଷ ଲଢେଇକୁ ଲମ୍ବା ଟାଣିବାକୁ ଚାହୁଁଛନ୍ତି। ଏହାର ଅର୍ଥ ଋଷ ଯୁଦ୍ଧ ଚାହେଁ। ହେଲେ ଆମକୁ ଋଷ ଉପରେ ଚାପ ପକାଇବା ଦରକାର ଯେ, ଯୁଦ୍ଧ କିଭଳି ଶେଷ କରୁ।
ଗତ କିଛି ମାସ ଧରି ମଧ୍ୟ ପୁଟିନ୍ଙ୍କ ସ୍ବାସ୍ଥ୍ୟବସ୍ଥାକୁ ନେଇ ବିଭିନ୍ନ ପ୍ରକାର ଚର୍ଚ୍ଚା ଚାଲିଛି। ପୁଟିନ୍ଙ୍କୁ ଲଗାତାର କାଶୁଥିବାର ଓ ହାତ-ଗୋଡ଼ ଥରିବାର ଭିଡିଓ ଗଣମାଧ୍ୟମରେ ଦେଖିବାକୁ ମିଳିଥିଲା। ଏପରିକି ଚେୟାରରେ ବସିବା ବେଳେ ସେ ଟେବଲକୁ ଜୋରରେ ଧରିକି ବସିଥିଲେ। ଏହି ଭିଡିଓ ପରେ ଜେଲେନସ୍କିଙ୍କ ଏଭଳି ଦାବି ପୁଟିନ୍ଙ୍କ ସ୍ବାସ୍ଥ୍ୟବସ୍ଥାକୁ ନେଇ ଚିନ୍ତା ସୃଷ୍ଟି କରିଛି। ବହୁ ରିପୋର୍ଟରେ ଦାବି କରାଯାଉଛି ଯେ, ପୁଟିନ୍ ପାର୍କିନସନ୍ ଓ କ୍ୟାନସରରେ ପୀଡିତ। ତେବେ ଗଣମାଧ୍ୟମର ସମସ୍ତ ରିପୋର୍ଟକୁ ଖଣ୍ଡନ କରିଆସୁଛି କ୍ରେମାଲିନ୍।
