ନୂଆଦିଲ୍ଲୀ,୧୪/୦୬: ଦୁଇଟି ସଂସ୍କରଣ ସଫଳତାର ସହ ଆୟୋଜିତ ହେବା ପରେ ଆସନ୍ତା ନଭେମ୍ବର ୨୯ ତାରିଖରୁ ଅଲଟିମେଟ୍ ଖୋ ଖୋର ତୃତୀୟ ସଂସ୍କରଣ ଆରମ୍ଭ ହେବ । ଏ ବିଷୟରେ ଭାରତୀୟ ଖୋ ଖୋ ସଂଘର ସଭାପତି ସୁଧାଂଶୁ ମିତ୍ତଲ ଘୋଷଣା କରିଛନ୍ତି । ସିଜନ-୩ ବିଶେଷତ୍ବ ହେଉଛି, ପ୍ରଥମ ଥର ବିଦେଶୀ ଖେଳାଳିଙ୍କୁ ସାମିଲ କରାଯିବ । ଯାହା ପ୍ରଥମ ସଂସ୍କରଣରୁ ଦାବି ହୋଇ ଆସୁଥିଲା ।
ଶ୍ରୀ ମିତ୍ତଲଙ୍କ ସୂଚନା ଅନୁସାରେ, ଅଲଟିମେଟ୍ ଖୋ ଖୋକୁ ଅଧିକ ପରିବ୍ୟାପ୍ତ କରାଯିବା ନେଇ ଯୋଜନା ହୋଇଛି । ତେଣୁ ବିଦେଶୀ ଖେଳାଳିଙ୍କୁ ସାମିଲ କରାଯିବା ନେଇ ନିଷ୍ପତ୍ତି ହୋଇଛି । ଆଗାମୀ ଦିନରେ ଖେଳାଳି ନିଲାମୀ ଏବଂ ଅନ୍ୟାନ୍ୟ ବିଷୟରେ ବିସ୍ତୃତ ସୂଚନା ଦିଆଯିବ । ଅଲଟିମେଟ୍ ଖୋ ଖୋ ପ୍ରଥମ ସଂସ୍କରଣରେ ଓଡ଼ିଶା ଜଗରନଟ୍ସ ଚାମ୍ପିଅନ ହୋଇଥିଲା । ୨୦୨୩-୨୪ ସଂସ୍କରଣ କଟକରେ ଆୟୋଜିତ ହେବା ସହ ଗୁଜରାଟ ଜାଏଣ୍ଟସ ଟାଇଟଲ ହାସଲ କରିଥିଲା । ଓଡ଼ିଶା ଜଗରନଟ୍ସକୁ ଓଡ଼ିଶା ସରକାର ପ୍ରୋତ୍ସାହିତ କରୁଥିଲେ । ଆଗାମୀ ସଂସ୍କରଣରେ ଦଳ ଖେଳିବ କି ନାହିଁ ନୂଆ ସରକାର ନିଷ୍ପତ୍ତି ନେବେ । ଆଶା କରାଯାଉଛି ପାରମ୍ପରିକ କ୍ରୀଡ଼ା ଖୋ ଖୋର ପ୍ରଚାର ପ୍ରସାର ଦିଗରେ ରାଜ୍ୟ ସରକାର ଆଦୌ କୁଣ୍ଠା ପ୍ରକାଶ କରିବେ ନାହିଁ । ତେଣୁ ଜଗରନଟ୍ସ ଆଗାମୀ ସଂସ୍କରଣରେ ଖେଳିବାର ଯଥେଷ୍ଟ ସମ୍ଭାବନା ରହିଛି ।
