ନୂଆଦିଲ୍ଲୀ,୧୩/୦୭: ଜାତିସଂଘର ଏଡ୍ସ କାର୍ଯ୍ୟକ୍ରମକୁ ପାଣ୍ଠି ଯୋଗାଇବାକୁ ଆମେରିକାର ଟ୍ରମ୍ପ ପ୍ରଶାସନ ମନା କରିଦେଇଛି । ପାଣ୍ଠି ଯୋଗାଣ ବନ୍ଦ ହେବା ଯୋଗୁ ଆସନ୍ତା ୨୦୨୯ ସୁଦ୍ଧା ୪୦ ଲକ୍ଷ ଲୋକ ଏଚ୍ଆଇଭି/ଏଡ୍ସରେ ପ୍ରାଣ ହରାଇବା ସହ ୬୦ ଲକ୍ଷରୁ ଅଧିକ ଲୋକ ସଂକ୍ରମିତ ହେବାର ଆଶଙ୍କା ସୃଷ୍ଟି ହୋଇଛି । ନିକଟରେ ପ୍ରକାଶ ପାଇଥିବା ୟୁଏନ୍ଏଡ୍ସର ଏକ ରିପୋର୍ଟରୁ ଏକଥା ସାମ୍ନାକୁ ଆସିଛି ।
ରିପୋର୍ଟରେ କୁହାଯାଇଛି ଯେ ୟୁଏନ୍ଏଡ୍ସ କାର୍ଯ୍ୟକ୍ରମ ପାଇଁ ଆମେରିକା ପାଣ୍ଠି ବନ୍ଦ କରିଦେବା ଫଳରେ ଅନ୍ୟ ସହଯୋଗୀ ଦେଶମାନେ ମଧ୍ୟ ଏଭଳି ପଦକ୍ଷେପ ନେବାର ସମ୍ଭାବନା ରହିଛି । ଏହା ଯୋଗୁ ୟୁଏନ୍ଏଡ୍ସ କାର୍ଯ୍ୟକ୍ରମ ପ୍ରଭାବିତ ହେବ । ଜାତିସଂଘ ଦ୍ୱାରା ପରିଚାଳିତ ବିଭିନ୍ନ ଦେଶରେ ଥିବା ଏଚ୍ଆଇଭି/ଏଡ୍ସ କ୍ଲିନିକ ବନ୍ଦ ହେବ । କର୍ମଚାରୀଙ୍କୁ ଦରମା ମିଳିବନି । ନିବାରଣ ଓ ସଚେତନତା କାର୍ଯ୍ୟକ୍ରମ ସମ୍ଭବ ହେବନାହିଁ । ଟେଷ୍ଟିଂ ମଧ୍ୟ କରିବା କଷ୍ଟକର ହୋଇପଡିବ । ଏଡ୍ସ କାର୍ଯ୍ୟକ୍ରମରେ ସାମିଲ ଅନ୍ୟାନ୍ୟ ସଙ୍ଗଠନ ଓ ସଂସ୍ଥାମାନେ ମଧ୍ୟ ଦୂରେଇ ଯିବେ । ଚଳିତ ବର୍ଷ ପାଇଁ ଆମେରିକା ୟୁଏନ୍ଏଡ୍ସ କାର୍ଯ୍ୟକ୍ରମ ଲାଗି ୪୦୦ କୋଟି ଡଲାର ଦେବା କଥା । କିନ୍ତୁ ଗତ ଜାନୁଆରୀରେ ଟ୍ରମ୍ପ ସମସ୍ତ ବିଦେଶୀ ଅନୁଦାନ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ । ପରବର୍ତ୍ତୀ ସମୟରେ ସେ ୟୁଏସ୍ଏଡ୍ ଏଜେନ୍ସିକୁ ବନ୍ଦ କରିଦେଇଥିଲେ ।
୨୦୦୩ରେ ଆମେରିକାର ତତ୍କାଳୀନ ରାଷ୍ଟ୍ରପତି ଜର୍ଜ ବୁଶ୍ ପିଇପିଏଫଏଆର (ଏଡ୍ସ ରିଲିଫ ପାଇଁ ଆମେରିକା ରାଷ୍ଟ୍ରପତିଙ୍କ ଜରୁରି ଯୋଜନା) ଆରମ୍ଭ କରିଥିଲେ । ପିଇପିଏଫଏଆରର ପୂର୍ବତନ ପ୍ରଧାନ ଉପସଂଯୋଜକ ଆଞ୍ଜେଲି ଆଚରେକରଙ୍କ ସୂଚନା ଅନୁଯାୟୀ ୟୁଏନ୍ଏଡ୍ସ କାର୍ଯ୍ୟକ୍ରମ ଉପରେ ବର୍ତ୍ତମାନ ଟ୍ରମ୍ପ ପ୍ରଶାସନ ସମୀକ୍ଷା କରୁଛି । ଏହାକୁ ସମ୍ପୂର୍ଣ୍ଣ ଭାବେ ବନ୍ଦ କରାଯାଇନାହିଁ । ଏଚ୍ଆଇ/ ଏଡ୍ସରେ ଜୀବନ ସହ ସଂଘର୍ଷ କରୁଥିବା ବ୍ୟକ୍ତିଙ୍କ ପାଇଁ ପାଣ୍ଠି ଯୋଗାଣ ଜାରି ରହିବ ବୋଲି ଆମେରିକା ବିଦେଶ ମନ୍ତ୍ରୀ ମାର୍କୋ ରୁବିଓ ସୂଚନା ଦେଇଛନ୍ତି । ବିଭିନ୍ନ ଦେଶ ପକ୍ଷରୁ ନିଜସ୍ୱ ଏଡ୍ସ କାର୍ଯ୍ୟକ୍ରମ ଚାଲିଛି । କିନ୍ତୁ ଆମେରିକା ସହାୟତା ବିନା ତାହା ଅଧୁରା ହୋଇଯିବ।
