ବେଲବାହାଳି,୧୦/୧୨ : ଆନନ୍ଦପୁର ଉପଖଣ୍ଡ ଶାଳପଡା କଲୋନୀ ସାମ୍ନା ୨୦ନଂ ଜାତୀୟ ରାଜପଥ ଉପରେ ସନ୍ଧ୍ୟା ସମୟରେ ବାଇକ୍ ଉପରେ ଚଢ଼ିଗଲା ଅଜଣା ଗାଡି । ଫଳରେ ଜଣେ ଯୁବକର ଘଟଣାସ୍ଥଳରେ ମୃତ୍ୟୁ ଘଟିଛି । ଯୁବକଙ୍କ ପରିଚୟ ବର୍ତ୍ତମାନ ସୁଦ୍ଧା ମିଳିପାରିନଥିବାବେଳେ ଗାଡି ନଂ OR04N-1996 ବୋଲି ଜଣା ପଡ଼ିଛି । 

ସୂଚନା ମୁତାବକ  ଯାଜପୁର ପଟୁ ଦ୍ରୁତଗତିରେ କୌଣସି ଏକ ଅଜଣା ଗାଡି କେନ୍ଦୁଝର ଆଡକୁ ଯାଉଥିବାବେଳେ ଯୁବକ ଜଣକ ବାଇକରେ କେନ୍ଦୁଝର ପଟୁ ଯାଜପୁର ଆଡକୁ ଯାଉଥିଲେ । ସମ୍ନାସାମ୍ନି ଧକ୍କା ହୋଇ ଯୁବକ ଜଣକ ତଳେ ପଡିଯାଇଥିଲେ । ଫଳରେ ବାଇକ ସହ ଯୁବକଙ୍କ ମୁଣ୍ଡ ଉପରେ ଅଜଣା ଗାଡିଟି ଚଢି ଯାଇ ଖସି ପଳାଇଥିବା ସୂଚନା ମିଳିଛି । ସଙ୍ଗେ ସଙ୍ଗେ ଲୋକମାନେ ଏକତ୍ରିତ ହେବା ପରେ ରାସ୍ତାରେ ଗାଡ଼ି ଜାମ ହୋଇଥିଲା । ପରେ ପୋଲିସକୁ ଖବର ଦେବା ସହ ଅଗ୍ନିଶମ ବିଭାଗକୁ ଖବର ଦେବା ପରେ ପୋଲିସ ଏବଂ ଅଗ୍ନିଶମ ଗାଡି ଘଟଣାସ୍ଥଳରେ ପହଞ୍ଚି ଥିଲା । ଶବ ବ୍ୟବଚ୍ଛେଦ ପାଇଁ ଆନନ୍ଦପୁର ମେଡ଼ିକାଲକୁ ଶବକୁ ନେବା ସହ ଘଟଣାସ୍ଥଳରୁ ବାଇକ ଜବତ କରିବା ସହିତ ଅଧିକ ତଦନ୍ତ କରୁଛି ଘଷିପୁରା ପୋଲିସ। ପରେ ଲୋକମାନଙ୍କୁ ବୁଝାସୁଝା କରି ରାସ୍ତା ଖାଲି କରିଥିବା ଜଣା ପଡିଛି । ଦୀର୍ଘ ଦିନ ଧରି ଗୋଟିଏ ଲାଇନ୍ ରାସ୍ତାରେ ଗାଡ଼ି ଯିବା ଆସିବା କରୁଥିବାରୁ ପ୍ରତ୍ୟେକ ଦିନ କିଛିନା କିଛି ଦୁର୍ଘଟଣା ଘଟି ସାଧାରଣ ଲୋକଙ୍କ ଧନଜୀବନ ନଷ୍ଟ ହେଉଛି । ଏଥିପ୍ରତି ଯଥାଶୀଘ୍ର ଜିଲ୍ଲା ପ୍ରଶାସନ ତୁରନ୍ତ ଦୁଷ୍ଟି ଦେଇ ଏହାର ସମାଧାନ କରିବା ପାଇଁ ସାଧାରଣ ଲୋକେ ଦାବି କରିଛନ୍ତି ।