ଉତ୍ତରପ୍ରଦେଶ ୩୧/୦୩: ଉତ୍ତରପ୍ରଦେଶର ଜଣେ ବ୍ୟକ୍ତି ୯ କିମି ଦଣ୍ଡବତ ଯାତ୍ରା କରି ସ୍ଥାନୀୟ ଅଞ୍ଚଳରେ ସବୁରି ଧ୍ୟାନ ଆକର୍ଷଣ କରିଛନ୍ତି । ଏପରି କରି ସେ ବିବାହ ବିଚ୍ଛେଦର ଖୁସି ପାଳିଛନ୍ତି । ଦାମ୍ପତ୍ୟ ଜୀବନରେ କଳହ ସମୟରେ ତାଙ୍କର ଏଭଳି ମାନସିକ ଚର୍ଚ୍ଚାର ବିଷୟ ହୋଇଛି । ସୋନହା ଥାନା ଅଞ୍ଚଳର ଯୋଗେଶ ୨ ବର୍ଷ ପୂର୍ବେ ବିବାହ କରିଥିଲେ । ଦାମ୍ପତ୍ୟ ଜୀବନରେ ବେଳେବେଳେ ଝଗଡ଼ା ହେଉଥିଲା । ଧୀରେ ଧୀରେ ଝଗଡ଼ା ବଢ଼ିବାରୁ ତାଙ୍କ ମାନସିକ ସ୍ଥିତି ବିଗିଡ଼ିଗଲା । ମାମଲା ଗମ୍ଭୀର ହେବାରୁ ସମ୍ପର୍କ ଭାଙ୍ଗିବା ସ୍ଥିତିରେ ପହଞ୍ଚିଲା । ଯୋଗେଶ ଗମ୍ଭୀର ରୂପେ ଅବସାଦରେ ରହିଲେ । ଏଥିରୁ ମୁକ୍ତି ପାଇବାକୁ ସେ ଆସ୍ଥାର ସାହାରା ନେଲେ । ବଡ଼ୱା ମାତା ମନ୍ଦିରରେ ସେ ଏକ ଅଜବ ଶପଥ ନେଲେ । ଯଦି ସେ ବିବାହରୁ ମୁକ୍ତି ପାଆନ୍ତି, ନିଜ ଗାଁରୁ ରାସ୍ତାସାରା ଦଣ୍ଡବତ ଯାତ୍ରା କରି ମନ୍ଦିରକୁ ଫେରିବେ ।
ପତ୍ନୀଙ୍କଠୁ ଆଇନ ଅନୁସାରେ ଅଲଗା ହେବା ପରେ ଯୋଗେଶ ନିଜ ପ୍ରତିଶ୍ରୁତି ରକ୍ଷା କଲେ । ଦିନେ ସକାଳେ ଖାଦ୍ୟ-ପାନୀୟ ବିନା ସେ ୯ କିମି ଦଣ୍ଡବତ ଯାତ୍ରା ଆରମ୍ଭ କଲେ । ପ୍ରତିଥର ରାସ୍ତାରେ ସାଷ୍ଟାଙ୍ଗ ପ୍ରଣାମ କରି ମନ୍ଦିର ଅଭିମୁଖେ ଯାତ୍ରା କଲେ । ଯାତ୍ରାରେ ତାଙ୍କ ମାତାପିତା ଓ ଅନେକ ଗାଁ ଲୋକ ସାଙ୍ଗରେ ରହିଲେ । ଭକ୍ତିପୂର୍ଣ୍ଣ ସ୍ଲୋଗାନ ଜରିଆରେ ସେମାନେ ତାଙ୍କୁ ସମର୍ଥନ କଲେ । ସନ୍ଧ୍ୟା ପ୍ରାୟ ୬ଟାରେ ଯୋଗେଶ ମନ୍ଦିରରେ ପହଞ୍ଚିଲେ । ତାଙ୍କ ଶରୀରରେ ଯାତ୍ରାର କ୍ଲାନ୍ତି ସ୍ପଷ୍ଟ ଦିଶୁଥିଲା । ଆଣ୍ଠୁ ଛିଣ୍ଡି ରକ୍ତାକ୍ତ ହୋଇଥିଲା । ସେ ଅତ୍ୟନ୍ତ ଦୁର୍ବଳ ହୋଇପଡ଼ିଥିଲେ । ଭୀଷଣ ଶାରୀରିକ ପୀଡ଼ା ସତ୍ତେ୍ୱ ସେ ଶାନ୍ତ ଜଣାପଡୁଥିଲେ । ମନ୍ଦିରରେ ପ୍ରାର୍ଥନା ପରେ ମନସ୍କାମନା ପୂରଣ ଲାଗି ସେ ଦେବୀ ମା’ଙ୍କୁ କୃତଜ୍ଞତା ଜଣାଇଲେ ।
ଆହୁରି ପଢ଼ନ୍ତୁ..
