ନୂଆଦିଲ୍ଲୀ, ୩୦/୦୧: ଉତ୍ତର ପ୍ରଦେଶର ପ୍ରୟାଗରାଜରେ ଚାଲିଛି ଦିବ୍ୟ ଓ ଭବ୍ୟ ମହାକୁମ୍ଭ ମେଳା। ଏନେଇ ଜମୁଛି ଶ୍ରଦ୍ଧାଳୁଙ୍କ ଭିଡ଼। ଆଉ ଏହାରି ମଧ୍ୟରେ ମହାକୁମ୍ଭ ମେଳାରୁ ସାମ୍ନାକୁ ଆସିଛି ଏକ ଦୁଃଖଦ ଖବର । ଗତକାଲି ମେଳାରେ କାର୍ଯ୍ୟରତ ଥିବା ଜଣେ ପୋଲିସ ଅଧିକାରୀଙ୍କ ମୃତ୍ୟୁ ହୋଇଛି । ତେବେ ପଲିସ ଅଧିକାରୀଙ୍କ ମୃତ୍ୟୁକୁ ନେଇ ପରିବାର ସମେତ ପୋଲିସ ବିଭାଗରେ ଶୋକର ଲହରୀ ଖେଳିଯାଇଛି ।
ତେବେ ଗାଜିପୁରା ଜିଲ୍ଲା ଗହମର ଥାନା ସ୍ଥିତ ବସୁକା ଗାଁର ବାସିନ୍ଦା ସବ୍-ଇନ୍ସପେକ୍ଟର ଅଞ୍ଜନୀ ରାୟ । ସେ ବହରାଇଚ ଜିଲ୍ଲାରେ ପୋଷ୍ଟିଂ ହୋଇଥିଲା । ହେଲେ ବର୍ତ୍ତମାନ ସେ କୁମ୍ଭମେଳାରେ ଡ୍ୟୁଟିରେ ଥିବା ବେଳେ କାର୍ଯ୍ୟରତ ଅବସ୍ଥାରେ ହଠାତ୍ ସେ ଅସୁସ୍ଥ ହୋଇପଡିଥିଲେ । ହସ୍ପିଟାଲ ନେବାବେଳେ ତାଙ୍କର ଅଧାବାଟରେ ମୃତ୍ୟୁ ହୋଇଥିବା ବେଳେ ତାଙ୍କୁ ଡାକ୍ତର ମୃତ ଘୋଷଣା କରିଛନ୍ତି । ଏନେଇ ଏସପି ଦୁର୍ଗା ପ୍ରସାଦ ତିୱାରୀ କହିଛନ୍ତି, "ଅଧିକାରୀମାନେ ମୃତକଙ୍କ ପରିବାର ସଦସ୍ୟଙ୍କୁ ଏହି ଘଟଣା ସମ୍ପର୍କରେ ସୂଚନା ଦେଇଛନ୍ତି । ପ୍ରକାଶ ଥାଉକି,ପ୍ରୟାଗରାଜ କୁମ୍ଭମେଳାରେ ଘଟିଥିବା ଦଳାଚକଟା ଘଟଣା ସାରା ଦେଶକୁ ସ୍ତବ୍ଧ କରିଛି । ଏହି ଅଘଟଣରେ ୩୦ ଜଣଙ୍କ ଜୀବନ ଯାଇଥିବାବେଳେ ପାଖାପାଖି ୬୦ ରୁ ଉର୍ଦ୍ଧ୍ବ ଆହତ ହୋଇଛନ୍ତି । ତେବେ ମୃତକଙ୍କ ପରିବାରକୁ ୨୫ ଲକ୍ଷ ଟଙ୍କା ଲେଖାଏଁ ଅନୁକମ୍ପା ରାଶି ଘୋଷଣା କରିଛନ୍ତି ଉତ୍ତରପ୍ରଦେଶ ସରକାର । ଏହାସହ ଘଟଣା ସମ୍ପର୍କରେ ନ୍ୟାୟିକ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ।
