ଇସଲାମାବାଦ: ପାକିସ୍ତାନରେ ଅଶାନ୍ତି ବୃଦ୍ଧି ପାଇଛି । ଇମ୍ରାନ୍ ଖାନଙ୍କ ସମର୍ଥନରେ ଆରମ୍ଭ ହୋଇଥିବା ଆନ୍ଦୋଳନ ଏବେ ହିଂସାର ରୂପ ନେଇଛି । ଜେଲରେ ଥିବା ଦେଶର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କ ଆହ୍ବାନ କ୍ରମେ ଏହି ବିକ୍ଷୋଭ ଆରମ୍ଭ ହୋଇଛି । ଲଗାତାର ୩ ଦିନ ହେଲା ଆନ୍ଦୋଳନ ଜାରି ରହିଛି । ରାଜଧାନୀ ଇସଲାମାବାଦରେ ପଶିଛନ୍ତି ଇମ୍ରାନଙ୍କ ହଜାର ହଜାର ସମର୍ଥକ। ଏତିକି ବେଳେ ହିଂସାତ୍ମକ ପରିସ୍ଥିତି ସୃଷ୍ଟି ହୋଇଛି । ଇମ୍ରାନଙ୍କ ସମର୍ଥକମାନେ ଶ୍ରୀନଗର ରାଜପଥରେ ୪ ରେଞ୍ଜର୍ସଙ୍କ ଉପରେ ଗାଡ଼ି ଚଢ଼ାଇ ଦେଇଛନ୍ତି । ଫଳରେ ସେମାନଙ୍କର ମୃତ୍ୟୁ ହୋଇଛି ।
ଏ ପର୍ଯ୍ୟନ୍ତ ୪ ଜଣ ରେଞ୍ଜର୍ସ ଏବଂ ଦୁଇ ଜଣ ପୋଲିସ ଅଧିକାରୀ ପ୍ରାଣ ହରାଇଛନ୍ତି। ସେହିପରି ୧୦୦ରୁ ଅଧିକ ଯବାନ ଆହତ ହୋଇଛନ୍ତି । ଧାରା ୨୪୫ ଅନୁଯାୟୀ ପାକିସ୍ତାନୀ ସେନାକୁ ଡକାଯାଇଛି । ଅଶାନ୍ତି ଏବଂ ଆତଙ୍କବାଦୀଙ୍କ ସହ କଡା ମୁକାବିଲା କରିବାକୁ ନିର୍ଦ୍ଦେଶ ଦିଆଯାଇଛି । ସବୁଠୁ ବଡ଼ କଥା ହେଉଛି, ପାକିସ୍ତାନ ସେନାକୁ ‘ସୁଟ୍ ଆଟ୍ ସାଇଟ୍’ ଅର୍ଡର ମଧ୍ୟ ଜାରି କରାଯାଇଛି । ବିକ୍ଷୋଭକାରୀମାନେ ଇମ୍ରାନ ଖାନ୍ଙ୍କୁ ମୁକ୍ତ କରିବା ଦାବିରେ ସଂସଦ ଯାଏଁ ରାଲି କରିବାକୁ ଏବଂ ଧାରଣା ଦେବାକୁ ଘୋଷଣା କରିଛନ୍ତି । ଏ ନେଇ ସରକାର କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରିଛନ୍ତି ।
ବିକ୍ଷୋଭକାରୀଙ୍କୁ ଅଟକାଇବା ପାଇଁ ଜାତୀୟ ରାଜପଥରେ ବ୍ୟାରିକେଡ୍ ଲଗାଯାଇଛି । କିନ୍ତୁ ଇମ୍ରାନଙ୍କ ସମର୍ଥକମାନେ ବଡ଼ ବଡ଼ ମେସିନ ଲଗାଇ ବ୍ୟାରିକେଡ୍ ଭାଙ୍ଗି ଦେଇଛନ୍ତି । ଏହା ସହ ସେମାନେ ଇସଲମାବାଦରେ ଧସେଇ ପଶିଛନ୍ତି । ଏହି ସମୟରେ ପିଟିଆଇ କର୍ମଚାରୀମାନ ଏବଂ ପୁଲିସ ମଧ୍ୟରେ ହିଂସାତ୍ମକ ସଂଘର୍ଷ ହୋଇଛି । ରାଜଧାନୀ ଇସଲାମାବାଦର ଅନେକ ଅଞ୍ଚଳରେ ମୋବାଇଲ ଏବଂ ଇଣ୍ଟରନେଟ୍ ସେବା ବନ୍ଦ କରାଯାଇଛି ।
ଅନ୍ୟପଟେ ସଂଘର୍ଷରେ ୪ ଜଣ ରେଞ୍ଜର୍ସ ଏବଂ ଦୁଇ ଜଣ ପୋଲିସ ଅଧିକାରୀ ପ୍ରାଣ ହରାଇଛନ୍ତି । ଏହା ପଛରେ ଥିବା ବ୍ୟକ୍ତିଙ୍କୁ ଚିହ୍ନଟ କରି କଠୋର ଦଣ୍ଡ ଦେବା ଲାଗି ପ୍ରଧାନମନ୍ତ୍ରୀ ଶେହବାଜ ଶରିଫ ନିର୍ଦ୍ଦେଶ ଦେଇଛନ୍ତି । ସୂଚନାଯୋଗ୍ୟ, ବିକ୍ଷୋଭ ଲାଗି ଘୋଷଣା କରି ଇମ୍ରାନ୍ ଖାନ ନିଜର ସମର୍ଥକମାନଙ୍କୁ କହିଥିଲେ, ‘ ଆପଣ ମାର୍ଶାଲ ଲ'ରେ ରହିବାକୁ ଚାହୁଁଛନ୍ତି ନା ସ୍ୱାଧୀନତାରେ ରହିବାକୁ ଚାହୁଁଛନ୍ତି ତାହା ଆପଣଙ୍କୁ ସ୍ଥିର କରିବାକୁ ପଡ଼ିବ । ଆଉ ଏହା ପରେ ପାକିସ୍ତାନରେ ଜୋର ଧରିଛି ଇମ୍ରାନ ଖାନଙ୍କ ସମର୍ଥିତ ଆନ୍ଦୋଳନ ।
