ନୂଆଦିଲ୍ଲୀ, ୧୯।୫: ବିଶ୍ୱରାଜନୀତି ଓ ପ୍ରତିରକ୍ଷା କ୍ଷେତ୍ରରୁ ଏକ ବଡ଼ ଖବର ସାମ୍ନାକୁ ଆସିଛି । ଭାରତର ସାମରିକ ସାମର୍ଥ୍ୟକୁ ଆହୁରି ସୁଦୃଢ଼ କରିବା ପାଇଁ ଆମେରିକା ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି । ଭାରତୀୟ ସେନାର ଅତ୍ୟନ୍ତ ଶକ୍ତିଶାଳୀ 'ଅପାଚେ ହେଲିକପ୍ଟର' ଏବଂ 'M777A2 ଅଲ୍ଟ୍ରା-ଲାଇଟ୍ ହାୱିଜର୍ ତୋପ' ପାଇଁ ଆବଶ୍ୟକୀୟ ସେବା, ଯନ୍ତ୍ରାଂଶ ଏବଂ ବୈଷୟିକ ସହାୟତା ଯୋଗାଇଦେବାକୁ ଆମେରିକା ମଞ୍ଜୁରୀ ପ୍ରଦାନ କରିଛି। ଏହି ବଡ଼ ଡିଲ୍ ପରେ ଶତ୍ରୁପକ୍ଷ ଚୀନ୍ ଏବଂ ପାକିସ୍ତାନର ନିଦ ହଜିଯାଇଛି । ଆମେରିକା ବୈଦେଶିକ ମନ୍ତ୍ରାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ, ପ୍ରାୟ ୪୨.୮୨ କୋଟି ଆମେରିକୀୟ ଡଲାରର ଦୁଇଟି ପୃଥକ ପ୍ରତିରକ୍ଷା ସହାୟତା ଚୁକ୍ତିକୁ ଗ୍ରୀନ୍ ସିଗନାଲ୍ ମିଳିଛି ।
କେତେ କୋଟିର ହେବ ଏହି ମେଗା ଡିଲ୍ ?
ଭାରତର ପ୍ରତିରକ୍ଷା ବ୍ୟବସ୍ଥାକୁ ଅଧିକ ଦୀର୍ଘସ୍ଥାୟୀ ଏବଂ ଶାଣିତ କରିବା ପାଇଁ ଏହି ଚୁକ୍ତିନାମା ସ୍ୱାକ୍ଷରିତ ହେବାକୁ ଯାଉଛି । ଏହାକୁ ମୁଖ୍ୟତଃ ଦୁଇଟି ଭାଗରେ ବିଭକ୍ତ କରାଯାଇଛି ।
ଅପାଚେ ହେଲିକପ୍ଟର ସପୋର୍ଟ ଡିଲ୍: ଭାରତୀୟ ବାୟୁସେନା ଏବଂ ସ୍ଥଳସେନା ଦ୍ୱାରା ବ୍ୟବହୃତ ହେଉଥିବା AH-64E ଅପାଚେ ହେଲିକପ୍ଟରଗୁଡ଼ିକର ରକ୍ଷଣାବେକ୍ଷଣ ଏବଂ ଲଜିଷ୍ଟିକ୍ ସପୋର୍ଟ ପାଇଁ ୧୯.୮୨ କୋଟି ଆମେରିକୀୟ ଡଲାର ମଞ୍ଜୁର ହୋଇଛି ।
ହାୱିଜର୍ ତୋପ ସହାୟତା ଡିଲ୍: ସୀମାରେ ମୁତୟନ ଥିବା ଶକ୍ତିଶାଳୀ M777A2 ଅଲ୍ଟ୍ରା-ଲାଇଟ୍ ହାୱିଜର୍ ତୋପର ରକ୍ଷଣାବେକ୍ଷଣ ଏବଂ ସାମରିକ ସହାୟତା ପାଇଁ ପ୍ରାୟ ୨୩ କୋଟି ଆମେରିକୀୟ ଡଲାରର ବିକ୍ରିକୁ ମଞ୍ଜୁରୀ ମିଳିଛି ।
ଆମେରିକା ପ୍ରତିରକ୍ଷା ମନ୍ତ୍ରାଳୟର ସୂଚନା ମୁତାବକ, ଏହି ଚୁକ୍ତି ଅଧୀନରେ ଭାରତୀୟ ସେନାକୁ ବିଶ୍ୱର ସବୁଠାରୁ ଆଧୁନିକ ଟେକ୍ନୋଲୋଜି ଓ ସେବା ମିଳିବ । "ଅପାଚେ ହେଲିକପ୍ଟର ସହ ଜଡ଼ିତ ସମସ୍ତ ଗୁରୁତ୍ୱପୂର୍ଣ୍ଣ ସେବା ବିଶ୍ୱର ପ୍ରତିଷ୍ଠିତ ପ୍ରତିରକ୍ଷା କମ୍ପାନୀ 'ବୋଇଂ' ଏବଂ 'ଲକହିଡ୍ ମାର୍ଟିନ୍' ପ୍ରଦାନ କରିବେ । ସେହିପରି M777A2 ହାୱିଜର୍ ତୋପର ରକ୍ଷଣାବେକ୍ଷଣ ଦାୟିତ୍ୱ ବ୍ରିଟେନର ପ୍ରସିଦ୍ଧ କମ୍ପାନୀ 'ବିଏଇ ସିଷ୍ଟମ୍ସ' ତୁଲାଇବ ।" ଏହି ଡିଲ୍ ପାଇଁ ଭାରତ ସରକାର ଆମେରିକା ନିକଟରେ ଅପାଚେ ହେଲିକପ୍ଟରର ରକ୍ଷଣାବେକ୍ଷଣ, ବୈଷୟିକ ସହାୟତା, ଇଞ୍ଜିନିୟରିଂ ସପୋର୍ଟ, ଲଜିଷ୍ଟିକ୍ସ, ଟେକ୍ନିକାଲ୍ ଡକ୍ୟୁମେଣ୍ଟେସନ୍ ଏବଂ ସେନା ବାହିନୀ ପାଇଁ ପ୍ରଶିକ୍ଷଣ କାର୍ଯ୍ୟକ୍ରମ ଯୋଗାଇ ଦେବାକୁ ଅନୁରୋଧ କରିଥିଲେ, ଯାହାକୁ ଏବେ ସ୍ୱୀକୃତି ମିଳିଛି ।
ଶତ୍ରୁ ପାଇଁ କାଳ ଏହି ଦୁଇ ପ୍ରାଣଘାତୀ ଅସ୍ତ୍ର:
ଭାରତୀୟ ପ୍ରତିରକ୍ଷା ବାହିନୀରେ ଅପାଚେ ହେଲିକପ୍ଟର ଏବଂ M777 ହାୱିଜର୍ ତୋପ ପୂର୍ବରୁ ହିଁ ସାମିଲ ଅଛନ୍ତି ଏବଂ ଏମାନେ ଯୁଦ୍ଧକ୍ଷେତ୍ରରେ ଗେମ୍-ଚେଞ୍ଜର ସାବ୍ୟସ୍ତ ହୋଇଛନ୍ତି ।
AH-64E ଅପାଚେ ହେଲିକପ୍ଟର: ଏହାକୁ ବିଶ୍ୱର ସବୁଠାରୁ ଘାତକ 'ଆଟାକ୍ ହେଲିକପ୍ଟର' କୁହାଯାଏ । ଏହା ଶତ୍ରୁ ଶିବିରରେ ପଶି ଅତ୍ୟନ୍ତ ସଠିକତାର ଅସ୍ତ୍ରଶସ୍ତ୍ର ପ୍ରହାର କରିବାରେ ସକ୍ଷମ । ରାଡାରକୁ ଏଡ଼ାଇ ଅନ୍ଧାର ରାତିରେ ମଧ୍ୟ ଏହା ଅପରେସନ କରିପାରେ ।
M777A2 ଅଲ୍ଟ୍ରା-ଲାଇଟ୍ ହାୱିଜର୍: ଏହି ତୋପଗୁଡ଼ିକ ଅତ୍ୟନ୍ତ ହାଲୁକା ହୋଇଥିବାରୁ ଏହାକୁ ହେଲିକପ୍ଟର ସାହାଯ୍ୟରେ ଚୀନ୍ ଏବଂ ପାକିସ୍ତାନ ସୀମାରେ ଥିବା ଦୁର୍ଗମ ପାର୍ବତ୍ୟ ଅଞ୍ଚଳ ଯେପରିକି ଲଦାଖ ଓ ଅରୁଣାଚଳ ପ୍ରଦେଶକୁ ସହଜରେ ନିଆଯାଇପାରିବ । ଏହାର ଲକ୍ଷ୍ୟଭେଦ କ୍ଷମତା ଅତି ଭୟଙ୍କର ।
ଚୀନ୍-ପାକିସ୍ତାନ ସୀମାରେ ମଜବୁତ ହେବ ଭାରତୀୟ ସେନା:
ଏହି ପ୍ରତିରକ୍ଷା ଚୁକ୍ତି କେବଳ କିଣାବିକା ମଧ୍ୟରେ ସୀମିତ ନୁହେଁ, ବରଂ ଏହାର ରଣନୀତିକ ମହତ୍ତ୍ୱ ବହୁତ ଅଧିକ । ବର୍ତ୍ତମାନ ସମୟରେ ଯେତେବେଳେ ଭାରତ ଚୀନ୍ ସହ ନିୟନ୍ତ୍ରଣ ରେଖା (LAC) ଏବଂ ପାକିସ୍ତାନ ସହ ନିୟନ୍ତ୍ରଣ ରେଖା (LoC) ରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରୁଛି, ସେତେବେଳେ ଏହି ଡିଲ୍ ସେନାକୁ ଏକ ବଡ଼ ଶକ୍ତି ଦେବ । ହେଲିକପ୍ଟର ଏବଂ ତୋପଗୁଡ଼ିକୁ ଦୀର୍ଘ ସମୟ ଧରି କାର୍ଯ୍ୟକ୍ଷମ ରଖିବା ପାଇଁ ନିୟମିତ ସର୍ଭିସିଂ ଏବଂ ସ୍ପେୟାର ପାର୍ଟସର ଆବଶ୍ୟକତା ଥାଏ । ଆମେରିକାର ଏହି ମଞ୍ଜୁରୀ ପରେ ଭାରତୀୟ ସେନା ଯେକୌଣସି ଜରୁରୀକାଳୀନ ସ୍ଥିତିର ସାମ୍ନା କରିବାକୁ ସର୍ବଦା ପ୍ରସ୍ତୁତ ରହିବ ।
ଭାରତ-ଆମେରିକା ବନ୍ଧୁତ୍ୱରେ ନୂଆ ଅଧ୍ୟାୟ:
ଏହି ଘଟଣା ପ୍ରମାଣିତ କରୁଛି ଯେ ଭାରତ ଏବଂ ଆମେରିକା ମଧ୍ୟରେ ସାମରିକ ଓ ରଣନୀତିକ ସମ୍ପର୍କ ଏକ ନୂଆ ଶିଖରରେ ପହଞ୍ଚିଛି । ବିଶେଷ କରି ଇଣ୍ଡୋ-ପାସିଫିକ୍ କ୍ଷେତ୍ରରେ ଚୀନର ଦାଦାଗିରିକୁ ରୋକିବା ପାଇଁ ଆମେରିକା, ଭାରତକୁ ଏକ ଶକ୍ତିଶାଳୀ ଅଂଶୀଦାର ଭାବେ ଦେଖୁଛି । ଭାରତ ନିଜର ପ୍ରତିରକ୍ଷା କ୍ଷମତାକୁ ଆଧୁନିକୀକରଣ କରୁଥିବା ବେଳେ ଆମେରିକାର ଏହି ସହଯୋଗ ଦେଶର ସୀମା ସୁରକ୍ଷାକୁ ଆହୁରି ଅଭେଦ୍ୟ କରିବ ଏଥିରେ କୌଣସି ସନ୍ଦେହ ନାହିଁ ।
ଆହୁରି ପଢ଼ନ୍ତୁ... Shivraj Singh Chouhan: କେନ୍ଦ୍ର କୃଷିମନ୍ତ୍ରୀଙ୍କ ବଡ଼ ଘୋଷଣା, ଚାଷୀଙ୍କ ପାଇଁ ଆସିବ ଫାର୍ମର ଆଇଡି, ରହିବ ଟିକନିକ ତଥ୍ୟ, ଦୁଇ ମିନିଟରେ ମିଳିବ ଲୋନ୍
