ଭୁବନେଶ୍ୱର,୧୯/୦୫: ଉତ୍କଳ ବିଶ୍ୱବିଦ୍ୟାଳୟ କୁଳପତି ପ୍ରଫେସର ସବିତା ଆଚାର୍ଯ୍ୟଙ୍କ କାର୍ଯ୍ୟକାଳ ଆସନ୍ତା ୨୩ରେ ଶେଷ ହେବ । ଏହାପୂର୍ବରୁ ତାଙ୍କ କାର୍ଯ୍ୟକାଳକୁ ପୁଣି ଆଉ ଏକ ବର୍ଷ ପର୍ଯ୍ୟନ୍ତ ବୃଦ୍ଧି କରିବାକୁ ରାଜ୍ୟପାଳଙ୍କ କାର୍ଯ୍ୟାଳୟରୁ ଉଚ୍ଚଶିକ୍ଷା ବିଭାଗକୁ ଚିଠି କରାଯାଇଛି । ଯାହାକୁ ନେଇ କ୍ଷୋଭ ପ୍ରକାଶ କରିଛନ୍ତି ଶିକ୍ଷାବିତ୍ ଓ ବରିଷ୍ଠ ଅଧିକାରୀ ।
ରାଜ୍ୟପାଳଙ୍କ ସଚିବାଳୟର ଉଚ୍ଚଶିକ୍ଷା ବିଭାଗର ଦାୟିତ୍ୱରେ ଥିବା ଅଧିକାରୀ ଚିତ୍ତରଞ୍ଜନ ମହାନ୍ତି ବିଭାଗୀୟ କମିଶନରଙ୍କୁ ଉତ୍କଳ ବିଶ୍ୱବିଦ୍ୟାଳୟ କୁଳପତିଙ୍କ କାର୍ଯ୍ୟାଳୟ ବୃଦ୍ଧି ସଂପର୍କରେ ଏକ ଚିଠି ଲେଖିଛନ୍ତି । ଏଥିରେ ଉଲ୍ଲେଖ କରାଯାଇଛି, ପ୍ରଫେସର ଆଚାର୍ଯ୍ୟଙ୍କର ଆଗରୁ ବର୍ଦ୍ଧିତ ହୋଇଥିବା କାର୍ଯ୍ୟକାଳକୁ ୧ ବର୍ଷ ପାଇଁ କିମ୍ବା ନୂଆ କୁଳପତି ନିଯୁକ୍ତି ହେବା ଯାଏ ବୃଦ୍ଧି କରାଯାଉ । ଯାହା ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ଆଇନ ୨୦୨୪ର ସବ୍ ସେକ୍ସନ୍ (୬) ଅନୁଯାୟୀ ବିଚାରକୁ ନିଆଯାଉ ବୋଲି କୁହାଯାଇଛି ।
ଏହାକୁ ନେଇ ଜଣେ ବରିଷ୍ଠ ଅଧିକାରୀ ଅଭିଯୋଗ କରିଛନ୍ତି ଯେ ଓଡ଼ିଶା ବିଶ୍ୱବିଦ୍ୟାଳୟ ସଂଶୋଧନ ଆଇନ ୨୦୨୪ରେ କେବଳ ସବ୍ ସେକ୍ସନ୍-୬ରେ କୁହାଯାଇଥିବା କଥାକୁ ଚିଠିରେ ଉଲ୍ଲେଖ କରାଯାଇଛି । କିନ୍ତୁ ସବ୍ ସେକ୍ସନ-୧୦ରେ ରହିଛି ଯେ ଯଦି କୌଣସି ବିଶ୍ୱବିଦ୍ୟାଳୟର କୁଳପତିଙ୍କ କାର୍ଯ୍ୟାକାଳ ଶେଷ ହେଉଛି ତାଙ୍କ ସ୍ଥାନରେ ନିକଟ ବିଶ୍ୱବିଦ୍ୟାଳୟର କୁଳପତିଙ୍କୁ ଦାୟିତ୍ୱ ଦିଆଯାଇପାରିବ । ତେବେ ଏହାକୁ କାହିଁକି ବିଚାରକୁ ନିଆଯିବ ନାହିଁ ବୋଲି ସେ ପ୍ରଶ୍ନ କରିଛନ୍ତି ।
ସୂଚନାଯୋଗ୍ୟ, ଉତ୍କଳ ବିଶ୍ୱବିଦ୍ୟାଳୟ କୁଳପତି ପ୍ରଫେସର ଆଚାର୍ଯ୍ୟଙ୍କର କାର୍ଯ୍ୟକାଳ ଗତ ୨୦୨୪ ନଭେମ୍ବର ୨୬ ତାରିଖରେ ଶେଷ ହୋଇଥିଲା । ନୂଆ କୁଳପତି ନିଯୁକ୍ତି ହେବା ଯାଏ କିମ୍ବା ୬ ମାସ ପାଇଁ ତାଙ୍କର କାର୍ଯ୍ୟକାଳକୁ ଉଚ୍ଚଶିକ୍ଷା ବିଭାଗ ବୃଦ୍ଧି କରିଥିଲା । ଅର୍ଥାତ୍ ୨୦୨୫ ମେ ୨୩ ତାରିଖ ଯାଏ ତାଙ୍କ କାର୍ଯ୍ୟକାଳ ବୃଦ୍ଧି କରାଯାଇଥିଲା । ତେବେ ତାଙ୍କ କାର୍ଯ୍ୟକାଳ ଶେଷ ହେବା ପୂର୍ବରୁ ଗତକାଲି ରାଜଭବନ ପକ୍ଷରୁ ପ୍ରଫେସର ଆଚାର୍ଯ୍ୟଙ୍କ କାର୍ଯ୍ୟକାଳକୁ ପୁନଃ ଏକ ବର୍ଷ କିମ୍ବା ନୂଆ କୁଳପତି ନିଯୁକ୍ତି ହେବା ଯାଏ ବୃଦ୍ଧି କରିବାକୁ ଚିଠି କରାଯାଇଛି ।
