ଭୁବନେଶ୍ୱର ୧୯/୧୨: କିଛି ଲୋକଙ୍କ ପାଦ, ଗୋଡ଼ର ଶିରା ବଡ଼ କିମ୍ବା ମୋଡ଼ି ମୋଡ଼ି ହୋଇଥିବା ଦେଖାଯାଏ । ଏହି ସମସ୍ୟାକୁ ଭେରିକୋଜ୍ ଭେନ୍ ବା ଲୋଚାକୋଚା ଶିରା କୁହାଯାଏ । କେବଳ ଗୋଡ଼ରେ ନୁହେଁ, ହାତ ଓ ଶରୀରର ଅନ୍ୟ ସ୍ଥାନରେ ମଧ୍ୟ ଏଭଳି ଶିରା ଦେଖା ଯାଇଥାଏ । କିନ୍ତୁ ଗୋଡ଼ରେ ଅଧିକ ଦେଖା ଦେଖାଯାଏ । ପ୍ରାୟ ଲୋକ ଏହାକୁ ଏତେ ଗୁରୁତ୍ୱ ଦିଅନ୍ତିନି କି ଚିକିତ୍ସା ଉପରେ ଧ୍ୟାନ ଦେଇ ନ ଥାନ୍ତି । ଶେଷରେ ବହୁ ଜଟିଳ ସମସ୍ୟାର ସମ୍ମୁଖୀନ ହେବାକୁ ପଡ଼େ । ବିଭିନ୍ନ ସମୟରେ ହର୍ମୋନ ପରିବର୍ତ୍ତନ ଯୋଗୁଁ ଭେରିକୋଜ୍ ଭେନ୍ ଜନିତ ସମସ୍ୟା ପୁରୁଷଙ୍କ ଅପେକ୍ଷା ମହିଳାଙ୍କଠାରେ ଅଧିକ ଦେଖା ଦେଇଥାଏ । ଭେରିକୋଜ୍ ଭେନ୍ ସମସ୍ୟାରେ ଶିରାଗୁଡ଼ିକ ଫୁଲିଯାଏ । ରକ୍ତ ପ୍ରବାହରେ ବାଧା ଏବଂ ଶିରାଗୁଡ଼ିକ ଭିତରେ ଥିବା ଭାଲ୍ଭର ତ୍ରୁଟିରୁ ଏହା ସୃଷ୍ଟି ହୋଇଥାଏ ।
ଲକ୍ଷଣ
- ପାଦରେ ଫୁଲିଥିବା ନୀଳ କିମ୍ବା ଜାମୁକୋଳି ରଙ୍ଗର ଶିରା ଦେଖା ଦେବା
- ପାଦରେ ପ୍ରବଳ ଯନ୍ତ୍ରଣା ସାଙ୍ଗକୁ ଓଜନିଆ ଅନୁଭବ ହେବା
- ଶିରା ଦରଜ ହେବା, ଜ୍ୱଳନ ଅନୁଭବ ହେବା ସହ ମାଂସପେଶୀରେ ଯନ୍ତ୍ରଣା ଅନୁଭବ ହେବା
- ପାଦରେ ରକ୍ତ ଜମାଟ ବାନ୍ଧିବା ସହ ଗୋଡ଼ ମାଂସପେଶୀରେ ରକ୍ତ ସଞ୍ଚାଳନରେ ସମସ୍ୟା ଦେଖାଦେବା
- ରାତିରେ ମାଂସପେଶୀ ଯନ୍ତ୍ରଣା ହେବା ଏବଂ ଗୋଡ଼ର ତଳ ଭାଗରେ ପ୍ରଦାହ ହେବା
- ତ୍ୱଚାର ରଙ୍ଗରେ ପରିବର୍ତ୍ତନ ଆସିବା ସହ ଘା’ ହେବା, ଏପରିକି ଅଚାନକ ଶିରାରୁ ରକ୍ତ ବାହାରିବା
ଚିକିତ୍ସା
ସ୍କେଲରୋଥେରାପି (Sclerotherapy) ଏହି ଚିକିତ୍ସାରେ ଶିରାରେ ଏକ ଇଞ୍ଜେକସନ୍ ଦିଆଯାଇଥାଏ, ଯାହା ଶିରାକୁ ସଙ୍କୁଚିତ କରିବା ସହ ଲୋଚାକୋଚା ଶିରା ଧୀରେ ଧୀରେ ଅଦୃଶ୍ୟ ହୋଇଯାଏ ।
ଲେଜର ଥେରାପି (Laser Therapy) ଲେଜର ଆଲୋକ ଦ୍ୱାରା ଶିରାଗୁଡ଼ିକର ଚିକିତ୍ସା କରାଯାଇଥାଏ । ଏହାଦ୍ୱାରା ତ୍ୱଚା ଉପରେ ଥିବା ଛୋଟ ଓ ମଧ୍ୟମ ଆକାରର ଶିରାଗୁଡ଼ିକ ଆଉ ରହେ ନାହିଁ ।
ରେଡିଓ ଫ୍ରିକ୍ୱେନ୍ସି ଏବଂ ଏଣ୍ଡୋଭେନସ୍ ଲେଜର ଟ୍ରିଟ୍ମେଣ୍ଟ (Radiofrequency and Endovenous Laser Treatment) ବଡ଼ ବଡ଼ ଶିରାଗୁଡ଼ିକର ଚିକିତ୍ସା ପାଇଁ ଏହି ପଦ୍ଧତି ଅବଲମ୍ବନ କରାଯାଇଥାଏ । ଏହି ଚିକିତ୍ସାରେ ଲେଜର୍ ମାଧ୍ୟମରେ ଶିରା ଭିତରକୁ ଉଚ୍ଚ ତାପମାତ୍ରା ପ୍ରୟୋଗ କରି ଚିକିତ୍ସା କରାଯାଏ । ଯାହାଦ୍ୱାରା ଶିରାର ପ୍ରଦାହ କମିଯାଏ ।
ଡା. ସମ୍ବିତ୍ କୁମାର ପଟ୍ଟନାୟକ
