ସୁବର୍ଣ୍ଣପୁର ,୨୩/୦୫: ସୁବର୍ଣ୍ଣପୁର ଜିଲ୍ଲା ଦେଇ ଯାଇଥିବା ସୋନପୁର- ବଲାଙ୍ଗୀର NH-୫୭ର ହରଡ଼ଖୋଲ ଛକ ନିକଟରେ ମର୍ମନ୍ତୁଦ ଦୁର୍ଘଟଣା । ଭାରସାମ୍ୟ ହରାଇ ରାସ୍ତା ତଳକୁ ଖସିପଡ଼ିଲା ଦୁଲଦୁଲି ବାଜା ଗାଡ଼ି । ଘଟଣାସ୍ଥଳରେ ୨ଜଣଙ୍କ ମୃତ୍ୟୁ ହୋଇଥିବା ବେଳେ ୨୫ଜଣ ଆହତ ହୋଇଛନ୍ତି । ମୃତକ ହେଲେ ମଣ୍ଟୁ ଛତ୍ରିଆ ଓ ସୁଦାମ ଶିକା । ସମସ୍ତ ଆହତଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ସୂଚନା ମୁତାବକ, ବରଗଡ଼ ଜିଲ୍ଲାର ତୁରା ଗାଁର ଦିଲଖୁସ୍ ଦୁଲଦୁଳି ବାଜା ଗାଡ଼ି ଗୁରୁବାର ରାମପୁରରୁ ବୌଦ୍ଧ ଜିଲ୍ଲା ମନମୁଣ୍ଡାକୁ ଏକ ବାହାଘର କାର୍ଯ୍ୟକ୍ରମରେ ଯାଇଥିଲା । ସେଠାରେ ପ୍ରସେଶନ୍ ସାରି ଭୋର୍ରୁ କଳାହାଣ୍ଡି ଫେରୁଥିଲା । ଏହି ସମୟରେ ହରଡ଼ଖୋଲ ଛକ ନିକଟରେ ଏକ ଟ୍ରକ୍କୁ ସାଇଡ୍ ଦେବାକୁଯାଇ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା । ଫଳରେ ଘଟଣାସ୍ଥଳରେ ୨ଜଣଙ୍କ ମୃତ୍ୟୁ ହୋଇଛି । ଏହି ଗାଡ଼ିରେ ଯାତ୍ରା କରୁଥିବା ୨୫ଜଣ ଆହତଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଘଟଣାସ୍ଥଳରେ ହରଡ଼ଖୋଲ ପୋଲିସ ପହଞ୍ଚି ତନାଘନା କରୁଛି ।
