ନୂଆଦିଲ୍ଲୀ ୦୯/୦୯: ଆଜି ଉପରାଷ୍ଟ୍ରପତି ନିର୍ବାଚନ ଲାଗି ମତଦାନ ଅନୁଷ୍ଠିତ ହେବ । ଏହି ହାଇଭୋଲ୍ଟେଜ୍ ନିର୍ବାଚନ ପାଇଁ ସବୁ ପ୍ରକାର ପ୍ରସ୍ତୁତି ଶେଷ ହୋଇସାରିଛି । ଉଭୟ ଶାସକ ଓ ବିରୋଧୀ ଦଳ ନିଜର ରଣନୀତି ଚୂଡ଼ାନ୍ତ କରି ରଖିଛନ୍ତି । ସଂସଦ ଭବନରେ ପୂର୍ବାହ୍ନ ୧୦ଟାରୁ ଆରମ୍ଭ ହୋଇ ଅପରାହ୍ନ ୫ଟା ଯାଏ ମତଦାନ ଚାଲିବ। ଏହାପରେ ସନ୍ଧ୍ୟା ୬ଟାରେ ଭୋଟ ଗଣତି ସହ ଫଳାଫଳ ଘୋଷିତ ହେବ । ଏଥିସହ ୫୦ ଦିନ ପରେ ଦେଶକୁ ଜଗଦୀପ ଧନଖଡ୍ଙ୍କ ସ୍ଥାନରେ ନୂଆ ଉପରାଷ୍ଟ୍ରପତି ମିଳିବେ । ସ୍ୱାସ୍ଥ୍ୟଗତ କାରଣ ଦର୍ଶାଇ ଜୁଲାଇ ୨୧ ତାରିଖରେ ଧନଖଡ୍ ନିଜ ପଦରୁ ଇସ୍ତଫା ଦେବା ପରେ ଏହି ନିର୍ବାଚନ ହେଉଛି ।
ଏଥରକ ନିର୍ବାଚନରେ ଏନ୍ଡିଏ ପ୍ରାର୍ଥୀ ସିପି ରାଧାକ୍ରିଷ୍ଣନ୍ ଓ ବିରୋଧୀ ଇଣ୍ଡିଆ ବ୍ଲକ୍ର ପ୍ରାର୍ଥୀ ସୁପ୍ରିମକୋର୍ଟର ପୂର୍ବତନ ବିଚାରପତି ବି.ସୁଦର୍ଶନ ରେଡ୍ଡୀଙ୍କ ମଧ୍ୟରେ ମୁକାବିଲା ହେଉଛି । ସଂଖ୍ୟାର ସ୍ଥିତିକୁ ଦେଖିଲେ ଏନ୍ଡିଏ ପ୍ରାର୍ଥୀ ବିଜୟୀ ହେବା ସୁନିଶ୍ଚିତ ବୋଲି କୁହାଯାଉଛି । ତେବେ ସଂସଦରେ ବିରୋଧୀ ଦଳଙ୍କର ମଜଭୁତ ସ୍ଥିତି ଯୋଗୁ ଗତ ଦୁଇ ଦଶନ୍ଧି ମଧ୍ୟରେ ପ୍ରଥମ ଥର ଲାଗି ଶାସକ-ବିରୋଧୀ ଦଳ ପ୍ରାର୍ଥୀଙ୍କ ମଧ୍ୟରେ କଡ଼ା ଟକ୍କର ହେବାର ସମ୍ଭାବନା ରହିଛି ।
ଇତିମଧ୍ୟରେ କେସିଆର୍ଙ୍କ ଦଳ ବିଆରଏସ୍ ଓ ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦଳ ବିଜେଡି ଉପରାଷ୍ଟ୍ରପତି ନିର୍ବାଚନରେ କୌଣସି ମେଣ୍ଟକୁ ସମର୍ଥନ ଦେବେ ନାହିଁ ବୋଲି ଘୋଷଣା କରିଛନ୍ତି । ଅର୍ଥାତ୍ ଏହି ଦୁଇଦଳର ସାଂସଦମାନେ ଭୋଟିଂରୁ ବିରତ ରହିବେ । ରାଜ୍ୟସଭାରେ ବିଆରଏସ୍ର ୪ ଓ ବିଜେଡିର ୭ ସଦସ୍ୟ ଅଛନ୍ତି । ମତଦାନର ଅବ୍ୟବହିତ ପୂର୍ବରୁ ଦିଲ୍ଲୀରେ ସୋମବାର ବିଜେପି ଓ ବିରୋଧୀ ଦଳ ନିଜ ନିଜର ସାଂସଦମାନଙ୍କୁ ଉପରାଷ୍ଟ୍ରପତି ନିର୍ବାଚନ ଲାଗି ଭୋଟିଂ ପ୍ରକ୍ରିୟା ସମ୍ପର୍କରେ ବୁଝାଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଏନ୍ଡିଏ ସାଂସଦମାନଙ୍କର କର୍ମଶାଳାରେ ଯୋଗ ଦେଇଥିଲେ । ଏହି ଅବସରରେ ମକ୍ ପୋଲ୍ ସେସନ୍ ମଧ୍ୟ ଅନୁଷ୍ଠିତ ହୋଇଥିଲା । ମତଦାନ ସମୟରେ ଯେଭଳି କୌଣସି ତ୍ରୁଟି ନ ରହିବ ତାହା ସୁନିଶ୍ଚିତ କରିବା ଏହି ମକ ପୋଲ୍ର ମୁଖ୍ୟ ଉଦ୍ଦେଶ୍ୟ ଥିଲା । ମେଣ୍ଟ ଦଳର ସାଂସଦମାନଙ୍କୁ ଭୋଟିଂ ପ୍ରକ୍ରିୟା ବିଷୟରେ ଅବଗତ କରାଯାଇଥିଲା ।
ସେପଟେ ସମ୍ବିଧାନ ସଦନ(ପୁରୁଣା ସଂସଦ ଭବନ)ର ସେଣ୍ଟ୍ରାଲ ହଲ୍ରେ ବିରୋଧୀ ଦଳଗୁଡ଼ିକ ବୈଠକ ଓ ମକ୍ ପୋଲ୍ ସେସନ୍ କରିଥିଲେ । ସେଥିରେ କଂଗ୍ରେସ ଅଧ୍ୟକ୍ଷ ମଲିକାର୍ଜୁନ ଖଡ୍ଗେ, ଦଳର ବରିଷ୍ଠ ନେତ୍ରୀ ସୋନିଆ ଗାନ୍ଧୀ, ସପା ନେତା ଅଖିଳେଶ ଯାଦବ ଓ ଆରଜେଡି ନେତା ତେଜସ୍ୱୀ ଯାଦବଙ୍କ ସମେତ ଇଣ୍ଡି ମେଣ୍ଟର ବହୁନେତା ଉପସ୍ଥିତ ଥିଲେ । ତେବେ ଲୋକସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ବିଦେଶରେ ଥିବାରୁ ଏହି ବୈଠକରେ ଯୋଗ ଦେଇପାରିନଥିଲେ । ସେହିପରି ସାଂସଦମାନେ ଯେପରି ମତଦାନ ପ୍ରକ୍ରିୟାରେ କୌଣସି ଭୁଲ୍ ନ କରିବେ ସେଥିଲାଗି ମକ୍ ପୋଲ୍ ସେସନ୍ ଜରିଆରେ ଭୋଟଦାନର ପୂରା ପ୍ରକ୍ରିୟାକୁ ଦୋହରାଯାଇଥିଲା । କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜ୍ଜୁନ ଖଡ୍ଗେ ଆଜି ବିରୋଧୀ ସାଂସଦମାନଙ୍କୁ ଡିନର ଦେବାର କାର୍ଯ୍ୟକ୍ରମ ରହିଥିଲା । କିନ୍ତୁ ଦେଶରେ ବନ୍ୟାସ୍ଥିତିକୁ ଦେଖି ତାକୁ ରଦ୍ଦ କରାଯାଇଛି।
ଉପରାଷ୍ଟ୍ରପତି ନିର୍ବାଚନରେ ଲୋକସଭା ଓ ରାଜ୍ୟସଭାର ସଦସ୍ୟମାନେ ଭୋଟ୍ ଦେଇଥାନ୍ତି । କିନ୍ତୁ ଏଥିଲାଗି କୌଣସି ହ୍ୱିପ୍ ଜାରି ହୋଇନଥାଏ । ଏପରିସ୍ଥଳେ ଯଦି ସମସ୍ତ ସାଂସଦ ଦଳୀୟ ନିଷ୍ପତ୍ତି ଅନୁସାରେ ଭୋଟ ଦିଅନ୍ତି ତେବେ ଏନ୍ଡିଏ ପ୍ରାର୍ଥୀ ରାଧାକ୍ରିଷ୍ଣନ୍ଙ୍କୁ ୪୩୯ ଓ ଇଣ୍ଡି ମେଣ୍ଟ ପ୍ରାର୍ଥୀ ରେଡ୍ଡୀଙ୍କୁ ୩୨୪ ଖଣ୍ଡ ଭୋଟ୍ ମିଳିପାରେ । ତେବେ ଗୁପ୍ତ ମତଦାନରେ କ୍ରସ୍ ଭୋଟିଂ ଉଭୟ ପକ୍ଷର ସମୀକରଣ ବିଗିଡା଼ଇ ଦେଇପାରେ ବୋଲି ଆଶଙ୍କା କରାଯାଉଛି । ସେଥିଲାଗି ଶାସକ ଓ ବିରୋଧୀ ସଂପୂର୍ଣ୍ଣ ସତର୍କତା ଅବଲମ୍ବନ କରୁଛନ୍ତି । ଗୋଟିଏ ବି ଭୋଟ୍ ଯେପରି ନାକଚ ନ ହେବ ସେଥିନେଇ ସାଂସଦଙ୍କୁ ଭୋଟିଂ ପ୍ରକ୍ରିୟା ବିଷୟରେ ସବୁକିଛି ଅବଗତ କରାଯାଇଛି ।
