ନୂଆଦିଲ୍ଲୀ, ୨୦।୫: ପଞ୍ଜାବ, ହରିୟାଣା ଏବଂ ରାଜସ୍ଥାନ ଭଳି ଉତ୍ତର ଭାରତର ବିଭିନ୍ନ ରାଜ୍ୟରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ସନ୍ଥ ରାମପାଲ ପୁଣି ଥରେ ଚର୍ଚ୍ଚାର ପରିସରକୁ ଆସିଛନ୍ତି । ନିକଟରେ ସୋସିଆଲ ମିଡିଆରେ ତାଙ୍କର ଏକ ଭିଡିଓ ବେଶ୍ ଭାଇରାଲ ହେବାରେ ଲାଗିଛି, ଯାହାକୁ ନେଇ ଚର୍ଚ୍ଚା ଓ ସମାଲୋଚନା ଜୋର ଧରିଛି । ଏହି ଭିଡିଓରେ ସନ୍ଥ ରାମପାଲ ନିଜ ଆଶ୍ରମ ପରିସରରେ ବୁଲାବୁଲି କରୁଥିବା ଦେଖିବାକୁ ମିଳୁଛି । କିନ୍ତୁ ଆଶ୍ଚର୍ଯ୍ୟଜନକ କଥା ହେଉଛି, ସେ ଯେଉଁଆଡ଼େ ଯାଉଛନ୍ତି, ତାଙ୍କ ପଛେ ପଛେ ତାଙ୍କର କିଛି ଅନୁଯାୟୀ ଏକ ବଡ଼ ଏୟାର କୁଲର୍ ଧରି ଚାଲୁଛନ୍ତି, ଯେପରି ବାବାଙ୍କୁ ଆଦୌ ଗରମ ନ ଲାଗିବ । ବର୍ତ୍ତମାନ ଏହି ଭାଇରାଲ ଭିଡିଓକୁ ନେଇ ଦେଶର ପ୍ରତିଷ୍ଠିତ ଶିଳ୍ପପତି ତଥା ଆରପିଜି ଏଣ୍ଟରପ୍ରାଇଜେସର ଚେୟାରମ୍ୟାନ୍ ହର୍ଷ ଗୋଏନକା ନିଜ ସୋସିଆଲ ମିଡିଆ ହ୍ୟାଣ୍ଡେଲରେ ସେୟାର କରି ଏକ ବଡ଼ କଟାକ୍ଷ କରିଛନ୍ତି ।
ହର୍ଷ ଗୋଏନକାଙ୍କ ଟ୍ୱିଟ୍: ‘ଏତେ ବଡ଼ ଫ୍ୟାନ୍ ଫଲୋଇଙ୍ଗ୍ ସହ ସେ କେତେ କୁଲ୍’
ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ ରେ ଭିଡିଓଟିକୁ ସେୟାର କରି ହର୍ଷ ଗୋଏନକା ଲେଖିଛନ୍ତି, “ଦେଖନ୍ତୁ, ବାବା ଗରମ ଦିନରେ କେମିତି ବୁଲିବାକୁ ଯାଉଛନ୍ତି । ଏତେ ବଡ଼ ‘ଫ୍ୟାନ୍ ଫଲୋଇଙ୍ଗ୍’ ସହିତ ବାବା କେତେ ‘କୁଲ୍’ ଦେଖାଯାଉଛନ୍ତି ।” ଏହି ଟ୍ୱିଟ୍ ପରେ ସୋସିଆଲ ମିଡିଆରେ ଲୋକମାନେ ବାବାଙ୍କ ଏଭଳି ଅନ୍ଧଭକ୍ତି ଏବଂ ଆରାମଦାୟକ ଜୀବନଶୈଳୀକୁ ନେଇ ବିଭିନ୍ନ ପ୍ରକାର ପ୍ରତିକ୍ରିୟା ଦେଉଛନ୍ତି ।
ଗତ ଏପ୍ରିଲ ମାସରେ ଜେଲ୍ରୁ ବାହାରିଥିଲେ ରାମପାଲ:
କହିରଖୁଛୁ ଯେ, ବହୁ ବିବାଦ ଘେରରେ ଥିବା ଏହି ଆଧ୍ୟାତ୍ମିକ ପ୍ରବଚକ ରାମପାଲ ଦୀର୍ଘ ୧୧ ବର୍ଷରୁ ଅଧିକ ସମୟ ଜେଲ୍ରେ କାଟିବା ପରେ ଗତ ଏପ୍ରିଲ ୧୦ ତାରିଖରେ ହରିୟାଣାର ହିସାର ଜିଲ୍ଲା ଜେଲ୍ରୁ ମୁକ୍ତ ହୋଇଛନ୍ତି । ବର୍ଷ ୨୦୧୪ରେ ଘଟିଥିବା ଏକ ବଡ଼ ହିଂସା ମାମଲାରେ ପଞ୍ଜାବ ଏବଂ ହରିୟାଣା ହାଇକୋର୍ଟଙ୍କଠାରୁ ଜାମିନ ମିଳିବା ପରେ ସେ ଜେଲ୍ରୁ ବାହାରକୁ ଆସିଥିଲେ । ଜେଲ୍ରୁ ମୁକ୍ତ ହେବା ସମୟରେ ତାଙ୍କ ପରିବାର ସଦସ୍ୟ ଏବଂ ଆଇନଜୀବୀମାନେ ତାଙ୍କୁ ସ୍ୱାଗତ କରିବା ପାଇଁ ଜେଲ୍ ପରିସରରେ ଉପସ୍ଥିତ ଥିଲେ ।
ହାଇକୋର୍ଟରୁ ମିଳିଥିଲା ଜାମିନ: କ’ଣ ଥିଲା ପୂରା ମାମଲା ?
ହାଇକୋର୍ଟ ଗତ ଅପ୍ରେଲ ୮ ତାରିଖରେ ରାମପାଲଙ୍କ ଜାମିନ ମଞ୍ଜୁର କରିଥିଲେ । ଏହା ପୂର୍ବରୁ ହିସାରର ଏକ ନିମ୍ନ ଅଦାଲତ ସେପ୍ଟେମ୍ବର ୨୫, ୨୦୨୫ରେ ରାମପାଲଙ୍କ ନିୟମିତ ଜାମିନ ଆବେଦନକୁ ଖାରଜ କରିଦେଇଥିଲେ । ଏହି ଆଦେଶ ବିରୋଧରେ ରାମପାଲ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।
ରାମପାଲଙ୍କ ବିରୋଧରେ ରୁଜୁ ହୋଇଥିବା ମାମଲା ଅନୁଯାୟୀ:
୨୦୧୪ ହିଂସାକାଣ୍ଡ: ୨୦୧୪ ମସିହାରେ ଯେତେବେଳେ ପୁଲିସ ରାମପାଲଙ୍କୁ ଗିରଫ କରିବାକୁ ଯାଇଥିଲା, ସେତେବେଳେ ସେ ନିଜର ୯୦୦ରୁ ଅଧିକ ସମର୍ଥକଙ୍କ ସହ ମିଶି ହିସାର ଜିଲ୍ଲାର ବରୱାଲା ସ୍ଥିତ ‘ସତଲୋକ ଆଶ୍ରମ’ ଭିତରେ ଗିରଫଦାରୀକୁ ଜୋରଦାର ବିରୋଧ କରିଥିଲେ ।
ମହିଳା ଓ ଶିଶୁଙ୍କୁ କରାଯାଇଥିଲା ଢାଲ: ଅଭିଯୋଗ ହୋଇଥିଲା ଯେ, ଆଶ୍ରମ ଭିତରେ ବହୁ ସଂଖ୍ୟାରେ ରାମପାଲଙ୍କ ସମର୍ଥକ ଏକାଠି ହୋଇଥିଲେ, ଯେଉଁମାନଙ୍କ ମଧ୍ୟରୁ କିଛି ଲୋକ ହତିଆର ସହ ଥିଲେ । ପୁଲିସ ଆକ୍ରମଣରୁ ବଞ୍ଚିବା ପାଇଁ ରାମପାଲ କୁଆଡ଼େ ମହିଳା ଏବଂ ଶିଶୁମାନଙ୍କୁ ଢାଲ ଭାବରେ ବ୍ୟବହାର କରିଥିଲେ । ଏହାକୁ ନେଇ ସେତେବେଳେ ବଡ଼ ଧରଣର ହିଂସା ସୃଷ୍ଟି ହୋଇଥିଲା, ଯେଉଁଥିରେ କେତେକ ଜୀବନ ମଧ୍ୟ ଯାଇଥିଲା । ଦୀର୍ଘ ଦିନ ଜେଲ୍ରେ ରହିବା ପରେ ବାହାରକୁ ଆସିଥିବା ସନ୍ଥ ରାମପାଲ ଏବେ ନିଜର ଏହି ‘କୁଲର୍ ସେବା’ ଭିଡିଓ ଯୋଗୁଁ ପୁଣି ଥରେ ଇଣ୍ଟରନେଟରେ ଟ୍ରୋଲ୍ର ଶିକାର ହେବାରେ ଲାଗିଛନ୍ତି ।
ଆହୁରି ପଢ଼ନ୍ତୁ... Suryastra tested: ପ୍ରତିରକ୍ଷା କ୍ଷେତ୍ରରେ ଇତିହାସ ରଚିଲା ଘରୋଇ କମ୍ପାନୀ, ଚାନ୍ଦିପୁରରେ ଗର୍ଜିଲା ‘ସୂର୍ଯ୍ୟାସ୍ତ୍ର’ ରକେଟ୍
